1 $ = 0 INR
1 € = 0  INR
AssociationSpiritualEntertainmentFamily & KidsHealth & Life StyleArts & LteratureImmigrationGreetingsCookeryClassifieds
Posted By: Nri Malayalee July 21, 2019

സജീഷ് ടോം (യുക്മ നാഷണല്‍ പി ആര്‍ ഒ & മീഡിയ കോര്‍ഡിനേറ്റര്‍): ലോക പ്രവാസി മലയാളികളുടെ പ്രിയ പ്രസിദ്ധീകരണം ജ്വാല ഇമാഗസിന്‍ കെട്ടിലും മട്ടിലും കൂടുതല്‍ മാറ്റങ്ങളുമായി പുതിയ ലക്കം പ്രസിദ്ധീകരിച്ചു. മലയാളത്തിന്റെ മഹാ സാഹിത്യകാരന്‍ വൈക്കം മുഹമ്മദ് ബഷീറിന്റെ മുഖ ചിത്രത്തോടെ പുറത്തിറങ്ങിയ ജൂലൈ ലക്കം ഉള്ളടക്കത്തിലും ഉന്നത നിലവാരം പുലര്‍ത്തുന്നു.

കേരളത്തില്‍ നടക്കുന്ന ഭീതിതമായ രാഷ്ട്രീയ സാമൂഹ്യ സംഭവ വികാസങ്ങളെ കണ്ടുകൊണ്ട് എഴുതിയിരിക്കുന്ന എഡിറ്റോറിയലില്‍, പ്രവാസികള്‍ നേരിടുന്ന വിവിധ പ്രശ്‌നങ്ങളെ നേരിടുവാന്‍ യുക്മ പോലുള്ള ദേശീയ സംഘടനകള്‍ മുന്നോട്ട് വരണമെന്ന് ചീഫ് എഡിറ്റര്‍ റജി നന്തികാട്ട് ആവശ്യപ്പെടുന്നു.

എഡിറ്റോറിയല്‍ ബോര്‍ഡ് അംഗവും ചിത്രകാരനുമായ സി ജെ റോയി വരച്ച ചിത്രങ്ങള്‍ രചനകളെ കൂടുതല്‍ മനോഹരമാക്കുന്നു. അദ്ദേഹത്തിന്റെ ‘വിദേശ വിചാരം’ എന്ന കാര്‍ട്ടൂണ്‍ പംക്തിയും കേരളത്തിലെ സാമൂഹ്യ രാഷ്ട്രീയ ജീവിതത്തിന്റെ ജീര്‍ണ്ണാവസ്ഥയെ ചൂണ്ടിക്കാണിക്കുന്നു. ബീന റോയിയുടെ എസ്‌കോര്‍ട്ട് എന്ന കഥയും ‘ജ്വാല’ എഡിറ്റോറിയല്‍ അംഗവും സാഹിത്യകാരിയുമായ നിമിഷ ബേസില്‍ എഴുതിയ കവിതയും ഈ ലക്കത്തെ കൂടുതല്‍ സമ്പന്നമാക്കുന്നു.

ജ്വാലയുടെ മുന്‍ ചീഫ് എഡിറ്ററും സാഹിത്യകാരനുമായ കാരൂര്‍ സോമന്റെ ‘വര്‍ഷമേഘങ്ങള്‍’ എന്ന കവിതയും ജൂലൈ ലക്കത്തില്‍ പ്രസിദ്ധീകരിച്ചിരിക്കുന്നു. കൂടാതെ സോഷ്യല്‍ മീഡിയകളില്‍ സജീവമായി എഴുതുന്ന എഴുത്തുകാരുടെ കഥകളും കവിതകളുമായി ജ്വാല ഇമാഗസിന്‍ ജൂലൈ ലക്കം സാഹിത്യ രചനകളാല്‍ സമൃദ്ധമാണ്.

പ്രമുഖ സാഹിത്യകാരന്‍ ടി ഡി. രാമകൃഷ്ണനുമായുള്ള അഭിമുഖം അദ്ദേഹത്തിന്റെ കാഴ്ചപ്പാടുകളും നിരീക്ഷണങ്ങളും നന്നായി വെളിപ്പെടുത്തുന്നു. യു കെ യിലെ മലയാളി അസോസിയേഷനുകളുടെ ദേശീയ പ്രസ്ഥാനമായ യുക്മയുടെ കലാ സാംസ്‌ക്കാരിക വിഭാഗമായ യുക്മ സാംസ്‌ക്കാരികവേദിയുടെ നേതൃത്വത്തിലാണ് ജ്വാല ഇമാഗസിന്‍ പ്രസിദ്ധീകരിക്കുന്നത്. താഴെ കൊടുത്തിരിക്കുന്ന ലിങ്കിലൂടെ ജ്വാല ഇമാഗസിന്റെ ജൂലൈ ലക്കം വായിക്കുക

https://issuu.com/jwalaemagazine/docs/july_2019

നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക

ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല