സ്വന്തം ലേഖകന്: കണ്ണൂര് വിമാനത്താവളത്തിന്റെ ഉദ്ഘാടനത്തിനുള്ള ഒരുക്കങ്ങള് തകൃതി; വിമാനത്താവളം കാണാന് വന് ജനത്തിരക്ക്. സുരക്ഷാ ക്രമീകരണങ്ങള് വിലയിരുത്താന് കണ്ണൂര് റേഞ്ച് ഐ.ജി. ബല്റാംകുമാര് ഉപാധ്യായ വിമാനത്താവളം സന്ദര്ശിച്ചു. കിയാല് അധികൃതരുമായി അദ്ദേഹം ചര്ച്ച നടത്തി. വിമാനത്താവളം സന്ദര്ശിക്കാനെത്തിയവരുടെ എണ്ണം നിയന്ത്രണാതീതമായ സാഹചര്യവും തുടര്ന്ന് ഏര്പ്പെടുത്തേണ്ട സുരക്ഷാക്രമീകരണങ്ങളും യോഗം വിലയിരുത്തി.
വിമാനത്താവളത്തില് ചൊവ്വാഴ്ച കസ്റ്റംസ്, ഇമിഗ്രേഷന് അധികൃതര് പരിശോധന നടത്തുന്നുണ്ട്. കസ്റ്റംസ്, ഇമിഗ്രേഷന് വിഭാഗങ്ങളുടെ പ്രവര്ത്തനം തുടങ്ങുന്നതിന് മുന്നോടിയായാണ് പരിശോധന. വിവിധ വിമാനക്കമ്പനി പ്രതിനിധികളുമായി ചൊവ്വാഴ്ച കിയാല് എം.ഡി. വി.തുളസീദാസ് ചര്ച്ച നടത്തും. സര്വീസ് തുടങ്ങാന് ധാരണയായ എയര് ഇന്ത്യ, ഇന്ഡിഗോ, ഗോ എയര് കമ്പനികളോടൊപ്പം സര്വീസിന് താത്പര്യമറിയിച്ച മറ്റുകമ്പനികളുടെ പ്രതിനിധികളും ചര്ച്ചയില് പങ്കെടുത്തേക്കും.
കണ്ണൂര് വിമാനത്താവളത്തില് പത്തുമുതല് സന്ദര്ശകര്ക്ക് നിയന്ത്രണങ്ങളോടെ പ്രവേശനം അനുവദിക്കും. 10, 11 തീയതികളില് കീഴല്ലൂര് പഞ്ചായത്തിലെയും മട്ടന്നൂര് നഗരസഭയിലെയും ആളുകള്ക്കും 12ന് സ്കൂള് വിദ്യാര്ഥികള്ക്കും മാത്രമായിരിക്കും പ്രവേശനം. മുഴുവനാളുകളും നിയന്ത്രണങ്ങളുമായി സഹകരിക്കണമെന്ന് കിയാല് എക്സിക്യുട്ടീവ് ഡയറക്ടര് അറിയിച്ചു.
കസ്റ്റംസ്, ഇമിഗ്രേഷന് വിഭാഗങ്ങളുടെ പരിശോധനയും യോഗങ്ങളും നടക്കുന്നതിനാല് എട്ട്, ഒന്പത് തീയതികളില് വിമാനത്താവളത്തില് പ്രവേശനം നിര്ത്തിവെച്ചിരുന്നു. സന്ദര്ശനം അനുവദിച്ച അഞ്ചുമുതല് നിയന്ത്രണാതീതമായ ജനത്തിരക്കാണ് വിമാനത്താവളത്തിലുണ്ടായത്.
നിങ്ങളുടെ അഭിപ്രായങ്ങള് ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള് എന് ആര് ഐ മലയാളിയുടെ അഭിപ്രായമാവണമെന്നില്ല