സ്വന്തം ലേഖകന്‍: മോഹന്‍ലാലിനും ആരാധകര്‍ക്കും നേരെ അധിക്ഷേപ വര്‍ഷവുമായി ബോളുവുഡ് നടന്‍ കെആര്‍കെ, ലാലിനെ കോമാളിയെന്നും ആരാധകരെ വിഢികളെന്നും വിശേഷിപ്പിച്ചു, പൊങ്കാലയുമായി ആരാധകര്‍. നേരത്തേ ഭീമനാവാനൊരുങ്ങുന്ന മോഹന്‍ലാലിനെ ഛോട്ടാ ഭീമെന്ന് വിളിച്ച് കളിയാക്കിയ കമാല്‍ റാഷിദ് ഖാന്‍ എന്ന കെആര്‍കെ ആരാധകരെ വിഢികളെന്ന് വിളിച്ച് വീണ്ടും രംഗത്ത് എത്തുകയായിരുന്നു.
രാം ഗോപാല്‍ വര്‍മച്ചിത്രങ്ങളില്‍ മോഹന്‍ലാലിനെ ഒരു കോമാളിയായിട്ടാണ് താന്‍ കണ്ടത് എന്നും പുതിയ ട്വീറ്റില്‍ പറയുന്നു. മണ്ടന്മാരായ മോഹന്‍ലാല്‍ ആരാധകരേ മധുര്‍ ഭണ്ഡാകറിനുപോലും 3 ദേശീയവാര്‍ഡും പദ്മശ്രീയുമുണ്ട്. ട്വിറ്ററില്‍ 1.7 മില്യന്‍ ആരാധകരേ മോഹന്‍ലാലിനുള്ളൂ തനിക്ക് 3.7 മില്യന്‍ ആരാധകരുണ്ടെന്നും അദ്ദേഹം ട്വിറ്ററില്‍ കുറിച്ചു.
1000 കോടി മുതല്‍ മുടക്കി ബി.ആര്‍. ഷെട്ടി നിര്‍മ്മിക്കുന്ന ചിത്രം എം.ടി.വാസുദേവന്‍ നായരുടെ രണ്ടാമൂഴം എന്ന നോവലിനെ അടിസ്ഥാനപ്പെടുത്തിയുള്ളതാണ്. കേന്ദ്രകഥാപാത്രമായ ഭീമനായി താന്‍ വരുമെന്ന് മോഹന്‍ലാല്‍ തന്നെയാണ് ഫെയ്‌സ്ബുക്കിലൂടെ അറിയിച്ചത്. ഇന്ത്യയിലെ ഏറ്റവും ചെലവേറിയ ചിത്രമായി ഒരുങ്ങുന്ന മഹാഭാരതം ബോളിവുഡിലടക്കം കോളിളക്കം സൃഷ്ടിച്ചിരുന്നു.
ഈ സാഹചര്യത്തിലാണ് മോഹന്‍ലാലിനെ ഛോട്ടാ ഭീമെന്ന നിലയില്‍ പരിഹസിച്ചുള്ള കെആര്‍കെയുടെ ട്വിറ്റര്‍ പോസ്റ്റ് എത്തിയത്. ‘മോഹന്‍ലാല്‍ സാറിനെ കണ്ടാല്‍ ഛോട്ടാഭീമിനെ പോലെയാണ് ഇരിക്കുന്നതെന്നും പിന്നെങ്ങനെയാണ് മഹാഭാരതത്തിലെ ഭീമന്റെ വേഷം ചെയ്യുക’യെന്നുമാണ് കെആര്‍കെ കഴിഞ്ഞ ദിവസം ട്വീറ്റ് ചെയ്തത്. ബി.ആര്‍.ഷെട്ടി ഇത്രയധികം പണം പാഴാക്കിക്കളയുകയാണെന്നും കെആര്‍കെ തട്ടിവിട്ടു.
എന്നാല്‍ വാര്‍ത്ത പുറത്ത് വന്നതോടെ കെആര്‍കെയെ മോഹന്‍ലാല്‍ ആരാധകര്‍ കൂട്ടായി പൊങ്കാലയിട്ടു. ഇംഗ്‌ളീഷിലും ഹിന്ദിയിലും മാത്രമല്ല, മലയാളത്തില്‍ പോലും ആരാധകര്‍ കെആര്‍കെയെ ചീത്തവിളി തുടങ്ങി. ഇതിന് പിന്നാലെയാണ് ഫാന്‍സിനെയും അധിക്ഷേപിച്ച് അദ്ദേഹം രംഗത്തെത്തിയത്.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല