എൻഎച്ച്എസിന് മൂന്ന് ബില്യൺ പൗണ്ട് അധിക ധനസഹായം; നികുതി വർദ്ധിപ്പിച്ചേക്കും

സ്വന്തം ലേഖകൻ: എൻ‌എച്ച്‌എസിനായി 3 ബില്യൺ പൗണ്ട് അധിക ധനസഹായം പ്രഖ്യാപിക്കാൻ ചാൻസലർ റി ഷി സുനക്ക്. ഒപ്പം കൊവിഡ് പ്രതിസന്ധി മറികടക്കാനുള്ള ശ്രമങ്ങളുടെ ഭാഗമായി ബ്രിട്ടൻ ഒരു നികുതി വർദ്ധനവിലൂടെ കടന്നുപോകേണ്ടി വരുമെന്നും ചാൻസലർ മുന്നറിയിപ്പ് നൽകി. എൻഎച്ച്എസിനുള്ള ഒരു വർഷത്തെ ധനസഹായം ബുധനാഴ്ചത്തെ ചെലവ് അവലോകനത്തിൽ പരിഗണനയ്ക്ക് വരും.

അതേസമയം, സമ്പദ്‌വ്യവസ്ഥയിൽ കൊവിഡിന്റെ ആഘാതം കുറയ്ക്കാനായി ഉയർന്ന തോതിലുള്ള വായ്പയെടുക്കൽ അനിശ്ചിതമായി തുടരാനാവില്ലെന്നും സുനക് പറഞ്ഞു. ഒക്ടോബറിൽ വായ്പ 22.3 ബില്യൺ പൗണ്ടിലെത്തിയതോടെ പൊതുമേഖലാ കടം 2 ട്രില്യൺ പൗണ്ടിലധികമായതായും അദ്ദേഹം പറഞ്ഞു. രാജ്യം സാമ്പത്തിക മാന്ദ്യത്തിലേക്ക് പോകുന്നത് തടയാനായി നികുതി വർദ്ധനവ് അനിവാര്യമാകുന്നത് ഈ സാഹചര്യത്തിലാണെന്നും സുനക് പറഞ്ഞു.

എൻ‌എച്ച്‌എസിനായുള്ള 3 ബില്യൺ പൗണ്ട് പാക്കേജ് ആരോഗ്യ സേവന മേഖലയിൽ പോരായ്മകൾ പരിഹരിക്കാൻ സഹായിക്കുമെന്ന് ട്രഷറി അറിയിച്ചു, പകർച്ചവ്യാധി കാരണം ആയിരക്കണക്കിന് ചികിത്സകളും നിർമാണ പ്രവർത്തനങ്ങളും വൈകിയിരിക്കുകയാണ്.

കൊവിഡ് ഇതര ചികിത്സകൾക്കായി ഒരു വർഷമായി കാത്തിരിക്കുന്നവരുടെ എണ്ണം ഫെബ്രുവരിയിൽ 1,500 ആയിരുന്നത് സെപ്റ്റംബറിൽ 140,000 ആയി ഉയർന്നതായും ട്രഷറി അഭിപ്രായപ്പെട്ടു.അധിക ധനസഹായം ഇംഗ്ലണ്ടിന് മാത്രമേ ബാധകമാകൂ, സ്കോട്ട്ലൻഡ്, വെയിൽസ്, വടക്കൻ അയർലൻഡ് എന്നിവിടങ്ങളിലെ ഭരണകൂടങ്ങൾക്ക് ബാർനെറ്റ് ഫോർമുല വഴി തുല്യമായ ധനസഹായം ലഭ്യമാക്കാനാണ് സർക്കാർ നീക്കം.

രണ്ടാം ദേശീയ ലോക്ക്ഡൗൺ അവസാനിക്കുന്ന ഡിസംബർ രണ്ടിന് ശേഷം ത്രിതല ലോക്ക്ഡൗൺ നിയന്ത്രണങ്ങളിൽ കൂടുതൽ കർശന നടപടികൾ കൊണ്ടുവരാൻ സർക്കാർ ആലോചിക്കുന്നതായി റിപ്പോർട്ടുകൾ. അതേസമയം പബ്ബുകളും റെസ്റ്റോറന്റുകളും രാത്രി 11 മണി വരെ തുറക്കാനുള്ള അനുമതിയും പ്രധാനമന്ത്രി നൽകുമെന്നാണ് കരുതപ്പെടുന്നത്. പബ്ബുകളിലും റെസ്റ്റോറന്റുകളിലും നിലവിലെ രാത്രി 10 മണി കർഫ്യൂ റദ്ദാക്കി ബ്രിട്ടന് ക്രിസ്മസ്സിന് മുമ്പുള്ള ഉത്തേജനം നൽകുക എന്നതാണ് സർക്കാർ നിലപാട്.

അവസാന ഓർഡറുകൾ രാത്രി 10 മണിക്ക് അവസാനിക്കുമെങ്കിലും ആളുകൾക്ക് പാനീയങ്ങളും ഭക്ഷണവും പൂർത്തിയാക്കാൻ അധിക ഒരു മണിക്കൂർ ലഭിക്കും. ഇത് വഴി നിലവിലെ തിരക്ക് ഒഴിവാക്കാനാകും. ക്രിസ്തുമസ് ന്യൂ ഇയർ ആഘോഷങ്ങൾ അടുക്കുന്നതോടെ പബ്ബുകളിലും റെസ്റ്റോറന്റുകളിലും കൂടുതൽ ആളുകൾ എത്തുമെന്നാണ് കരുതപ്പെടുന്നത്. ഹോസ്പിറ്റാലിറ്റി മേഖലയെ സഹായിക്കുന്നതിനൊപ്പം, ജനക്കൂട്ടം തെരുവിലിറങ്ങുന്നത് തടയാനും ഇത് സഹായിക്കും.

സെപ്റ്റംബറിൽ അവതരിപ്പിച്ച രാത്രി 10 മണിക്ക് കർഫ്യൂ വ്യാപകമായി വിമർശിക്കപ്പെട്ടു, പുതിയ നിർദ്ദേശത്തിന് വ്യാപകമായ പിന്തുണയുണ്ട്. രാത്രി 10 മണിക്ക് അവസാന ഓർഡറുകളും കൂടുതൽ നേരം തുടരാൻ അനുവദിക്കുന്നതും വളരെ വിവേകപൂർണ്ണമാണെന്ന് ഒരു സർക്കാർ വക്താവ് തന്നെ അഭിപ്രായപ്പെട്ടു. ഡിസംബർ 22 മുതൽ 28 വരെ ക്രിസ്തുമസ് ആഘോഷങ്ങൾക്ക് നാലു വരെ കുടുംബങ്ങൾക്ക് ഒരു ബബിളിൽ ഒരുമിച്ച് ചേരാൻ കഴിയുന്ന സംവിധാനങ്ങളും സർക്കാർ പ്രഖ്യാപിക്കുമെന്നാണ് കരുതപ്പെടുന്നത്.

വാഗ്ദാനം ചെയ്തതുപോലെ ഡിസംബർ 2 ന് ലോക്ക്ഡൗ ൺ അവസാനിക്കുമെന്ന് പ്രധാനമന്ത്രി ബോറിസ് ജോൺസൺ ഇന്ന് രാജ്യത്തോട് ടെലിവിഷൻ പ്രസംഗത്തിൽ അറിയിക്കും. ഇംഗ്ലണ്ടിലെ കർഫ്യൂ നീട്ടാനുള്ള വെസ്റ്റ്മിൻസ്റ്ററിന്റെ നീക്കം, സ്കോട്ട്ലൻഡിലും വെയ്ൽസിലും നോർത്തേൺ അയർലൻഡിലും പിന്തുടരാൻ സമ്മർദ്ദം ചെലുത്തുമെന്ന് പ്രതീക്ഷിക്കുന്നു.

ലോക്ക് ഡൗണിന് ശേഷം നിയന്ത്രണങ്ങൾക്കായി പുതുക്കിയ ത്രിതല ഘടന ഉൾപ്പെടെ കൊവിഡിനെ നേരിടാനുള്ള ഒരു പുതിയ ശീതകാല പദ്ധതിയുടെ വിശദാംശങ്ങളും പ്രധാനമന്ത്രി തയ്യാറാക്കും. വാക്സിനുകൾക്കും ഒരു വലിയ രോഗപ്രതിരോധ പദ്ധതിക്കും അംഗീകാരം നൽകുന്നതുൾപ്പെടെ ബിസിനസ്സുകൾക്കും പൊതുജനങ്ങൾക്കും കൂടുതൽ ആത്മവിശ്വാസവും വ്യക്തതയും നൽകുന്നതിനായുള്ള പദ്ധതികളും സർക്കാർ ആവിഷ്കരിക്കുന്നുണ്ട്.