സ്വന്തം ലേഖകന്: ബിഷപ്പിനെ കുറവിലങ്ങാട് മഠത്തിലെത്തിച്ച് തെളിവെടുപ്പ്; കസ്റ്റഡി കാലാവധി ഇന്ന് അവസാനിക്കും; ഫ്രാങ്കോ മുളയ്ക്കല് ജാമ്യത്തിനായി മേല്ക്കോടതിയെ സമീപിക്കും. പീഡനം നടന്ന ഇരുപതാം നമ്പര് മുറിയിലാണ് തെളിവെടുപ്പ് നടത്തിയത്. മുക്കാല് മണിക്കൂറോളം തെളിവെടുപ്പ് നീണ്ടുനിന്നു. പുറത്തേക്ക് പോകുന്നതിനിടെ നാട്ടുകാര് ഫ്രാങ്കോ മുളയ്ക്കലിനെ കൂക്കിവിളിച്ചു. തെളിവെടുപ്പിന് ശേഷം ബിഷപ്പിനെ തിരിച്ച് പൊലീസ് ക്ലബിലേക്ക് കൊണ്ടുപോയി.
ബിഷപ്പ് രണ്ടുവര്ഷത്തിനിടെ 13 തവണ കന്യാസ്ത്രീയെ പീഡിപ്പിച്ചുവെന്നാണ് റിമാന്ഡ് റിപ്പോര്ട്ട്. വസ്ത്രങ്ങളും ലാപ്ടോപ്പും കണ്ടെത്തണമെന്ന് നിര്ദേശിക്കുന്ന റിപ്പോര്ട്ടില് അധികാരം ഉപയോഗിച്ച് കേസ് അട്ടിമറിക്കാന് ശ്രമിച്ചുവെന്ന ഗുരുതര ആരോപണവും അക്കമിട്ട് നിരത്തുന്നു. ബിഷപ്പിനെ ലൈംഗികശേഷി പരിശോധയ്ക്ക് വിധേയനാക്കണം. ഭീഷണി കാരണമാണ് കന്യാസ്ത്രീ ആദ്യം നിശബ്ദത പാലിച്ചത്. പരാതിപ്പെട്ടത് സഭ വിടേണ്ട സാഹചര്യമുണ്ടാക്കിയപ്പോള് ആണെന്നും കോടതിയില് സമര്പ്പിച്ച റിമാന്ഡ് റിപ്പോര്ട്ടില് വ്യക്തമാക്കുന്നു.
ഇതിനിടെ ബിഷപ്പിനെതിരെ കൂടുതല് പരാതികള് പുറത്തുവന്നു തുടങ്ങി. ഫ്രാങ്കോ മുളയ്ക്കലിനെതിരെ കൂടുതല് പരാതികള് ലഭിച്ചെന്ന് പൊലീസ് സ്ഥിരീകരിച്ചു. പാലാ കോടതിയിലാണ് പ്രോസിക്യൂഷന് പുതിയ പരാതികളുടെ വിവരം അറിയിച്ചത്. പാലാ കോടതി അനുവദിച്ച കസ്റ്റഡി കാലാവധി ഇന്ന് രണ്ടരയോടെ അവസാനിക്കുന്നതിനാല് ഫ്രാങ്കോ മുളയ്ക്കല് ജാമ്യം തേടി ജില്ലാ കോടതിയെയോ ഹൈക്കോടതിയെയോ സമീപിക്കും.
അതിനിടെ ഫ്രാങ്കോ മുളയ്ക്കലിനെ നുണപരിശോധനയ്ക്കു വിധേയനാക്കാന് അന്വേഷണ സംഘം ആലോചിക്കുന്നുണ്ട്. കൂടുതല് തെളിവുകള് ശേഖരിക്കുന്നതിനായാണ് ബിഷപ്പിനെ നുണ പരിശോധനയ്ക്ക് വിധേയനാക്കാന് അന്വേഷണ സംഘം ആലോചിക്കുന്നത്. കേസുകളില് ഒരാഴ്ചയ്ക്കുള്ളില് അന്വേഷണം പൂര്ത്തിയാക്കാന് ജില്ലാ പൊലീസ് മേധാവി ഹരിശങ്കര് അന്വേഷണ ഉദ്യോഗസ്ഥന് കെ.സുഭാഷിനു നിര്ദേശം നല്കിയിട്ടുണ്ട്.
നിങ്ങളുടെ അഭിപ്രായങ്ങള് ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള് എന് ആര് ഐ മലയാളിയുടെ അഭിപ്രായമാവണമെന്നില്ല