സ്വന്തം ലേഖകന്: കേരള സന്ദര്ശനത്തിനെത്തിയ രാഷ്ട്രപതി റാംനാഥ് കോവിന്ദിനെ വധിക്കുമെന്ന് ഭീഷണി; തൃശൂര് സ്വദേശിയായ പൂജാരി അറസ്റ്റില്. തൃശൂര് ചിറയ്ക്കല് ഭഗവതി ക്ഷേത്രത്തിലെ പൂജാരി ജയരാമനാണ് അറസ്റ്റിലായത്. തൃശൂര് സെന്റ് തോമസ് കോളജ് ശതാബ്ദി ആഘോഷത്തിനെത്തുമ്പോള് രാഷ്ട്രപതിയെ വധിക്കുമെന്നായിരുന്നു പൊലീസ് കണ്ട്രോള് റൂമിലേക്ക് ഫോണ്സന്ദേശം ലഭിച്ചത്.
കഴിഞ്ഞ ദിവസം പുലര്ച്ചെ ഒരു മണിയോടെയാണു സന്ദേശമെത്തിയത്. ഫോണ് നമ്പര് കണ്ടെത്തി അന്വേഷണം നടത്തിയ പൊലീസ് പ്രതിയെ പിടികൂടുകയായിരുന്നു. മദ്യലഹരിയിലാണു താന് ഫോണ്വിളിച്ചതെന്ന് ഇയാള് പൊലീസിനോടു പറഞ്ഞു. എന്നാല് എന്തിനാണ് ഇയാള് ഇത്തരമൊരു ഭീഷണി മുഴക്കിയതെന്നു വ്യക്തമല്ല. പ്രതിയെ ചോദ്യം ചെയ്യന്നത് തുടരുകയാണ്.
ഇന്നലെയാണു പ്രത്യേക വിമാനത്തില് രാഷ്ട്രപതിയും ഭാര്യ സവിതാ കോവിന്ദും കേരളത്തിലെത്തിയത്. ഗവര്ണര് പി.സദാശിവവും മുഖ്യമന്ത്രി പിണറായി വിജയനും ചേര്ന്ന് ഇരുവരെയും സ്വീകരിച്ചു. തിരുവനന്തപുരത്ത് വിവിധ പരിപാടികളില് പങ്കെടുക്കുന്ന രാഷ്ട്രപതി വൈകിട്ട് കൊച്ചിയും തുടര്ന്ന് തൃശൂരും സന്ദര്ശിക്കും.
നിങ്ങളുടെ അഭിപ്രായങ്ങള് ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള് എന് ആര് ഐ മലയാളിയുടെ അഭിപ്രായമാവണമെന്നില്ല