1 $ = 0 INR
1 € = 0  INR
AssociationSpiritualEntertainmentFamily & KidsImmigrationGreetingsCookeryClassifieds
Posted By: Nri Malayalee August 11, 2020

സ്വന്തം ലേഖകൻ: യുഎഇയിലുള്ള സന്ദർശക വീസക്കാർക്ക്​ ആശ്വാസം പകരുന്ന തീരുമാനവുമായി ഫെഡറൽ അതോറിറ്റി. വീസ കാലാവധി അവസാനിച്ചവർക്ക്​ ഒരു മാസം കൂടി യു.എ.ഇയിൽ തുടരാൻ ഗ്രേസ്​ പിരീഡ്​ അനുവദിച്ചു. യു.എ.ഇ സൗജന്യമായി നീട്ടി നൽകിയ വീസ കാലാവധി തിങ്കളാഴ്​ച അവസാനിച്ചതോടെയാണ്​ ഒരു മാസം കൂടി നീട്ടി നൽകിയത്​. മലയാളികൾ അടക്കമുള്ള ​പ്രവാസികൾക്ക്​ ഏറെ ആശ്വാസം പകരുന്ന തീരുമാനമാണിത്​. സന്ദർശക വീസയുടെ കലാവധി കഴിഞ്ഞവർ ഒരു മാസത്തിനുള്ളിൽ വീസ പുതുക്കുകയോ രാജ്യം വിടുകയോ ചെയ്യണം.

ഇന്ന്​ മുതൽ വീസ പിഴ അടക്കേണ്ടി വരുമെന്ന ഭയത്താൽ ട്രാവൽ ഏജൻസികൾക്ക്​ മുന്നിൽ വീസ പുതുക്കുന്നവരുടെ വൻ തിരക്കാണ്​ കഴിഞ്ഞ ദിവസങ്ങളിൽ അനുഭവപ്പെട്ടത്​. ആദ്യ ദിവസം 210 ദിർഹവും ബാക്കിയുള്ള ദിവസങ്ങളിൽ 25 ദിർഹം വീതവുമാണ്​ യു.എ.ഇയിലെ വീസ പിഴ. ദിവസവും 100 ദിർഹം വീതം പിഴ അടക്കേണ്ടി വരുമെന്നും വാർത്തകളുണ്ടായിരുന്നു. ഇ​േത തുടർന്നാണ്​ പ്രവാസികൾ കൂട്ടത്തോടെ വീസ പുതുക്കാൻ എത്തിയത്​. കാലാവധി തീരുന്നതിന്​ മുൻപ്​ നാട്ടിലെത്താൻ കഴിഞ്ഞ ദിവസങ്ങളിലെ വിമാനങ്ങളിലും വൻ തിരക്കാണ്​ അനുഭവപ്പെട്ടത്​. ഈ വിമാനങ്ങളിൽ ടിക്കറ്റ്​ ലഭിക്കാതെ വന്നവർക്ക്​ ഏറെ ആശ്വാസം പകരുന്ന തീരുമാനമാണിത്​. 1600-2000 ദിർഹമാണ്​ സന്ദർശക വീസയെടുക്കുന്നതിന്​ അടക്കേണ്ടത്​.

കോവിഡ്​ വ്യാപനം ശക്​തി പ്രാപിച്ചതോടെ വിമാന വിലക്കേർപെടുത്തിയ സാഹചര്യത്തിലാണ്​ യു.എ.ഇ ഭരണകൂടം സൗജന്യമായി വീസ കാലാവധി നീട്ടി നൽകിയത്​. നാട്ടിലെത്താൻ വഴിയി​ല്ലാതെ വലഞ്ഞ പ്രവാസികൾക്ക്​ ഏറെ ആശ്വാസകരമായ നടപടിയായിരുന്നു ഇത്​. ​ഡിസംബർ 31 വരെ നീട്ടി നൽകുമെന്നായിരുന്നു നേര​ത്തെ പറഞ്ഞിരുന്നത്​. എന്നാൽ, മറ്റ്​ രാജ്യങ്ങളിലേക്ക്​ യാത്രക്കാ​രുമായി വിമാനങ്ങൾ സർവീസ്​ തുടങ്ങിയതോടെ ഇളവ്​ ആഗസ്​റ്റ്​ പത്തായി ചുരുക്കുകയായിരുന്നു. മാർച്ച്​ ഒന്നിന്​ ശേഷം വീസ കാലാവധി കഴിഞ്ഞവർക്കാണ്​ ഈ ആനുകൂല്യം നൽകിയത്​.

ഇതുവഴി അഞ്ച്​ മാസത്തോളം യു.എ.ഇയിൽ സൗജന്യമായി നിൽക്കാനുള്ള അവസരമാണ്​ പ്രവാസികൾക്ക്​ ലഭിച്ചത്​. ഇൗ അവസരം ഉപയോഗിച്ച്​ തൊഴിൽ അന്വേഷണത്തിന്​ പ്രവാസികൾ യു.എ.ഇയിൽ തുടർന്നു. ഉടൻ നാട്ടിലെത്തേണ്ടിയിരുന്ന കുടുംബങ്ങൾ പോലും യു.എ.ഇയിൽ തുടരാൻ തീരുമാനിച്ചു. കാലാവധി അവസാനിക്കുന്നതി​െൻറ തൊട്ടുമുൻപത്തെ ദിവസങ്ങളിലാണ്​ ഇവർ നാട്ടിലേക്ക്​ തിരിച്ചത്​. കരിപ്പൂരിൽ അപകടത്തിൽപെട്ട വിമാനത്തിലും ഇത്തരക്കാർ ധാരാളമുണ്ടായിരുന്നു.

മാർച്ച്​ ഒന്നിന്​ മുൻപ്​ വീസ കാലാവധി അവസാനിച്ചവർക്ക്​ പിഴയില്ലാതെ നാട്ടിലേക്ക്​ മടങ്ങാനുള്ള അവസാന തീയതി ആഗസ്​റ്റ്​ 17 ആണ്​. ഈ കാലാവധിക്ക്​ ഇതുവരെ ഗ്രേസ്​ പിരീഡ്​ പ്രഖ്യാപിച്ചിട്ടില്ല.

നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക

ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല

Comments are Closed.