1 $ = 0 INR
1 € = 0  INR
AssociationSpiritualEntertainmentFamily & KidsImmigrationGreetingsCookeryClassifieds
Posted By: Nri Malayalee May 20, 2022

സ്വന്തം ലേഖകൻ: ജോലി തേടിയും വിസിറ്റ് വിസയിലും വിനോദയാത്രയ്ക്കും മറ്റുമായി ദുബായില്‍ എത്തുന്നവര്‍ക്ക് താമസ സൗകര്യം ഇനിയൊരു വെല്ലുവിളിയാവില്ല. 15 ദിവസമോ അതില്‍ കൂടുതലോ കാലം താല്‍ക്കാലികമായി താമസിക്കാന്‍ സൗകര്യമുള്ള കോ ലിവിംഗ് സംവിധാനങ്ങളാണ് ദുബായിലെ പുതിയ ട്രെന്‍ഡ്. പുതുതലമുറ താമസ സ്ഥലമെന്നാണ് ഇത് വിശേഷിപ്പിക്കപ്പെടുന്നത്.

സങ്കീര്‍ണമായ താമസ കരാറുകളോ മറ്റ് കെട്ടുപാടുകളോ ഇല്ലാതെ എളുപ്പത്തില്‍ താമസസൗകര്യം ഒരുക്കാനാണ് ഇതിലൂടെ അധികൃതര്‍ ലക്ഷ്യമിടുന്നത്. പതിനഞ്ച് ദിവസത്തേക്കോ ഒരു മാസത്തേക്കോ വേണമെങ്കില്‍ ഇങ്ങനെ താമസ സ്ഥലം ലഭിക്കും. വലിയ തുക ഡിപ്പോസിറ്റായി നല്‍കാതെയും ബ്രോക്കര്‍ ചാര്‍ജ്ജ് ഇല്ലാതെയും വലിയ സാമ്പത്തിക ബാധ്യതയില്ലാതെ താമസിക്കുന്ന സമയത്തേക്കുള്ള മുറിയുടെ വാടക മാത്രം നല്‍കി താമസിക്കാനാവും എന്നതാണ് ഇവയുടെ സവിശേഷത. ഗ്യാരന്റിയായി ചെക്കോ മറ്റോ നല്‍കുന്ന രീതിയിലും കോ ലിവിംഗ് സംവിധാനത്തില്‍ ഉണ്ടാവില്ല.

യുഎഇയില്‍ സ്ഥിര ജോലിക്കായും ഫ്രീലാന്‍സ് ജോലിക്കായും ജോലി കണ്ടെത്തുന്നതിനായും മറ്റും എത്തുന്ന പ്രൊഫഷനലുളെയാണ് ഇതിലൂടെ പ്രധാനമായും ലക്ഷ്യമിടുന്നത്. പ്രധാനമായും ഒറ്റയ്ക്ക് താമസിക്കുന്ന യുവതീ യുവാക്കളെയാണ് കോ ലിവിംഗ് താമസ സൗകര്യങ്ങളിലേക്ക് പ്രതീക്ഷിക്കുന്നത്. ഈ രീതിയിലുള്ള പ്രൊഫഷനലുകളുടെ ഒരു കമ്മ്യൂണിറ്റി വഇതിലൂടെ വളര്‍ന്നുവരുമെന്ന സൗകര്യവും ഇവിടെയുണ്ട്. ഈ മേഖലയില്‍ പ്രവര്‍ത്തിക്കുന്നവര്‍ക്ക് ഇത്തരമൊരു കൂട്ടായ്മ ഏറെ ഗുണം ചെയ്യുമെന്നതിനാല്‍ വളരെ വേഗത്തില്‍ ഇതിന് യുവാക്കള്‍ക്കിടയില്‍ അംഗീകാരം ലഭിക്കുമെന്ന പ്രതീക്ഷയിലാണ് റിയല്‍ എസ്റ്റേറ്റ് മേഖലയില്‍ പ്രവര്‍ത്തിക്കുന്നവര്‍.

സാധാരണ ഗതിയില്‍ ഒരു വര്‍ഷത്തെ വാടകക്കരാര്‍ ഉള്‍പ്പെടെയുള്ള ഉടമ്പടികള്‍ക്കു ശേഷമാണ് ദുബായില്‍ താമസ സൗകര്യം ലഭ്യമാവുക. ഇതുപ്രകാരം ഇടക്കാലത്തു വച്ച് താമസം മതിയാക്കി പോവേണ്ടി വന്നാല്‍ വലിയ തുക നഷ്ടപരിഹാരമായി നല്‍കേണ്ടിവരും. മാത്രമല്ല, വലിയ തുക ഡിപ്പോസിറ്റായി നല്‍കിയാല്‍ മാത്രമേ നിലവില്‍ ഇത്തരം താമസ സൗകര്യങ്ങള്‍ ദുബായില്‍ ലഭിക്കുകയുള്ളൂ. എന്നാല്‍ ഇതൊന്നുമില്ലാത്ത എളുപ്പത്തില്‍ താമസ സൗകര്യം ലഭിക്കുമെന്നതാണ് കോ ലിവിംഗിന്റെ പ്രത്യേകത. ഇതില്‍ കെട്ടിട ഉമടകളുമായി വാര്‍ഷിക കരാര്‍ ഒപ്പിടേണ്ട ആവശ്യമില്ല. എന്നു മാത്രമല്ല, ഇഷ്ടാനുസരണം താമസം മതിയാക്കി പോവാനുമാവും. താമസം ഒഴിവാക്കുന്നതിന് 30 ദിവസം മുമ്പ് നോട്ടീസ് നല്‍കിയാല്‍ മാത്രം മതിയെന്നതാണ് ഇതിന്റെ സൗകര്യം.

ദുബായിലെ പ്രമുഖ ഡെവലപ്പര്‍മാരില്‍ ഒന്നായ ഇമാര്‍, ദുബായ് ഹില്‍സില്‍ കോ ലിവിങ് സൗകര്യം ഇതിനകം ഒരുങ്ങിക്കഴിഞ്ഞു. ജുമൈറ വില്ലേജ് സര്‍ക്കിളിളിലും ഇതിനുള്ള സംവിധാനം ഒരുങ്ങിവരുന്നുണ്ട്. കോ ലിവിംഗിനായി പ്രത്യേക കെട്ടിടമാണ് ഇവിടെ ഒരുക്കിയിരിക്കുന്നത്. വരും ദിനങ്ങളില്‍ കൂടുതല്‍ കെട്ടിട ഉടമകള്‍ ഇതിലേക്ക് മാറുമെന്നാണ് വിലയിരുത്തല്‍. എല്ലാ സൗകര്യങ്ങളോടും കൂടിയുള്ള പൂര്‍ണമായും ഫര്‍ണിഷ് ചെയ്ത മുറികളായിരിക്കും താമസക്കാര്‍ക്ക് ലഭിക്കുക. ഹൈസ്പീഡ് ഇന്റര്‍നെറ്റ് ഉള്‍പ്പെടെ പുതുതലമുറ പ്രൊഫഷനലുകള്‍ക്ക് ആവശ്യമായ വര്‍ക്ക് ഫ്രം ഹോം സൗകര്യങ്ങള്‍ അടക്കം ഇവിടെ ലഭിക്കും. വെള്ളം, വൈദ്യുതി എന്നീ യൂട്ടിലിറ്റികള്‍ക്ക് പ്രത്യേത ഡെപ്പോസിറ്റ് ഈടാക്കുന്ന രീതിയും ഇവിടെ ഉണ്ടാവില്ല. ഹോളിഡേ ഹോമുകളില്‍ നിന്ന് വ്യത്യസ്തമായ സംവിധാനമാണ് കോ ലിവിംഗ്.

ഏതാനും ദിവസത്തേക്ക് മാത്രമുള്ള ഹോളിഡേ ഹോമുകളില്‍ താരതമ്യേന വാടക കൂടതലായിരിക്കുമെന്നും പുതിയ സംവിധാനത്തില്‍ അത്രത്തോളം വാടക വരില്ലെന്നും വിലയിരുത്തപ്പെടുന്നു. അതേസമയം, കര്‍ശനമായ നിയന്ത്രണങ്ങള്‍ക്കു വിധേയമായിട്ടായിരിക്കും പുതിയ താമസ സംവിധാനം ഒരുക്കുക. ഇതുമായി ബന്ധപ്പെട്ട മാര്‍ഗ നിര്‍ദ്ദേശങ്ങള്‍ ദുബായ് റിയല്‍ എസ്റ്റേറ്റ് അതോറിറ്റി മുന്നോട്ടുവച്ചിട്ടുണ്ട്. ഈടാക്കാവുന്ന പരമാവധി വാടക, ഉപഭോക്താക്കള്‍ക്ക് നല്‍കേണ്ട സൗകര്യങ്ങള്‍ തുടങ്ങിയ കാര്യങ്ങളിലും വ്യക്തമായ മാര്‍ഗ നിര്‍ദ്ദേശങ്ങള്‍ അധികൃതരുടെ ഭാഗത്തുനിന്നുണ്ടാവും.

നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക

ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല

Comments are Closed.