സ്വന്തം ലേഖകൻ: നാല് ഇന്ത്യൻ വംശജരെ ഉൾപ്പെടുത്തി കനേഡിയൻ പ്രധാനമന്ത്രി ജസ്റ്റിൻ ട്രൂഡോ 37 അംഗ കാബിനറ്റ് രൂപീകരിച്ചു.ഇന്ത്യക്കാരിൽ മൂന്നു പേർ സിക്കുകാരും ഒരാൾ ഹിന്ദുവുമാണ്. ആദ്യമായാണ് ഒരു ഹിന്ദുവിന് കാനഡയിൽ മന്ത്രിപദവി കിട്ടുന്നത്.
ടൊറേന്റോ യൂണിവേഴ്സിറ്റിയിലെ മുൻ നിയമ പ്രഫസർ അനിതാ ആനന്ദാണ് കാബിനറ്റിലെ ഹിന്ദുമന്ത്രി. നവദീപ് ബെയിൻസ്, ബാർദിഷ് ഛാഗർ, ഹർജിത് സജ്ജൻ എന്നീ സിക്കുകാർക്കും കാബിനറ്റിൽ ഇടംകിട്ടി. ട്രൂഡോയുടെ നേതൃത്വത്തിലുള്ള ലിബറൽ ന്യൂനപക്ഷ സർക്കാർ ബുധനാഴ്ച അധികാരമേറ്റു. അനിതാ ആനന്ദ് ഒക്ടോബറിലെ ഫെഡറൽ തെരഞ്ഞെടുപ്പിൽ ഒന്റേറിയോയിലെ ഓക്വില്ലിൽ നിന്നാണ് 338 അംഗ പാർലമെന്റിൽ എത്തിയത്.
പബ്ലിക് സർവീസ്, സംഭരണ വകുപ്പുകളുടെ ചുമതലയാണ് അവർക്കു നൽകിയിട്ടുള്ളത്. സൈനിക സാമഗ്രികൾ വാങ്ങുന്നതിന്റെ ചുമതലയും അവർക്കാണെന്നു ടൊറേന്റോ സ്റ്റാർ റിപ്പോർട്ട് ചെയ്തു.അനിതയുടെ മാതാവ് പരേതയായ സരോജ റാം അമൃത്സർ സ്വദേശിയാണ്. പിതാവ് ആനന്ദ് തമിഴ്നാട്ടുകാരനാണ്.
ബെയ്ൻസിനു സയൻസ്, ഇൻഡസ്ട്രി വകുപ്പുകളുടെയും ഛാഗറിന് യുവജനകാര്യ വകുപ്പിന്റെയും ചുമതല നൽകി. സജ്ജനാണ് പ്രതിരോധവകുപ്പ് മന്ത്രി. ഡെപ്യൂട്ടി പ്രധാനമന്ത്രിയായി ക്രിസ്റ്റ്യാ ഫ്രീലാൻഡിനെ നിയമിച്ചു.
നിങ്ങളുടെ അഭിപ്രായങ്ങള് ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള് എന് ആര് ഐ മലയാളിയുടെ അഭിപ്രായമാവണമെന്നില്ല