1 $ = 0 INR
1 € = 0  INR
AssociationSpiritualEntertainmentFamily & KidsImmigrationGreetingsCookeryClassifieds
Posted By: Nri Malayalee December 1, 2020

സ്വന്തം ലേഖകൻ: ഒമാനിൽ ടൂറിസ്​റ്റ്​ വീസകൾ അനുവദിക്കുന്നത്​ പുനരാരംഭിക്കുന്നു​. ആഭ്യന്തര മന്ത്രി ഹമൂദ്​ അൽ ബുസൈദിയുടെ അധ്യക്ഷതയിൽ തിങ്കളാഴ്​ച നടന്ന സുപ്രീം കമ്മിറ്റി യോഗമാണ്​ ഇതുസംബന്ധിച്ച തീരുമാനമെടുത്തത്​. ആദ്യഘട്ടത്തിൽ ഹോട്ടലുകൾക്കും ടൂറിസം കമ്പനികൾക്കും മാത്രമായിരിക്കും ടൂറിസ്​റ്റ്​ വീസകൾ അനുവദിക്കുക. ഇവരുടെ കീഴിൽ ഗ്രൂപ്പായി വരുന്ന സഞ്ചാരികൾക്കാണ്​ ടൂറിസ്​റ്റ്​ വീസ ഉപയോഗിക്കാൻ സാധിക്കുക. കോവിഡ്​ വ്യാപനത്തെ തുടർന്ന്​ കഴിഞ്ഞ മാർച്ച്​ മുതലാണ്​ ഒമാൻ ടൂറിസ്​റ്റ്​ വീസകൾ അനുവദിക്കുന്നത്​ നിർത്തിവെച്ചത്​.

നവംബർ ആദ്യത്തിൽ എക്​സ്​പ്രസ്​, ഫാമിലി വീസിറ്റിങ്​ വീസകളും കഴിഞ്ഞ ദിവസം തൊഴിൽ വീസയും അനുവദിക്കുന്നത്​ പുനരാരംഭിച്ചിരുന്നു. കോവിഡ്​ സാഹചര്യത്തിൽ സർക്കാർ ഒാഫിസുകളിൽ കുറഞ്ഞ എണ്ണം ജീവനക്കാർ മാത്രം ഹാജരായാൽ മതിയെന്ന നേരത്തേയുള്ള ഉത്തരവും സുപ്രീം കമ്മിറ്റി പിൻവലിച്ചു. ഡിസംബർ ആറ്​ മുതൽ മുഴുവൻ ജീവനക്കാരും ഒാഫിസുകളിൽ ഹാജരാകണമെന്ന്​ സുപ്രീം കമ്മിറ്റി നിർദേശിച്ചു. മുൻകരുതൽ നടപടികൾ ഉറപ്പാക്കി കൂടുതൽ വ്യവസായ, വാണിജ്യ പ്രവർത്തനങ്ങൾക്ക്​ അനുമതി നൽകാനും തീരുമാനിച്ചു. ബന്ധപ്പെട്ട അധികൃതർ ഇതി​െൻറ വിശദാംശങ്ങൾ അറിയിക്കും.

കോവിഡ്​ രോഗവ്യാപനത്തിൽ കാര്യമായ കുറവ്​ ദൃശ്യമാണ്​. ആശുപത്രികളിലും ​തീവ്രപരിചരണ വിഭാഗങ്ങളിലും പ്രവേശിക്കപ്പെടുന്നവരുടെ എണ്ണം കുറഞ്ഞതായും സുപ്രീം കമ്മിറ്റി വിലയിരുത്തി. രോഗ വ്യാപനം തടയാനുള്ള മുൻകരുതൽ നടപടി പാലിക്കുന്നതിൽ ജനങ്ങൾ പുലർത്തുന്ന പ്രതിബദ്ധത സുപ്രീം കമ്മിറ്റി അനുമോദിക്കുകയും ചെയ്​തു.

ഒമാനിൽ കോവിഡ്​ നിയന്ത്രണങ്ങളിലെ ഇളവുകളുടെ ഭാഗമായി ഏഴാം ഘട്ട വാണിജ്യ പ്രവർത്തനങ്ങൾക്ക്​ അനുമതി നൽകി. തിങ്കളാഴ്​ച നടന്ന സുപ്രീം കമ്മിറ്റി യോഗത്തിലെ തീരുമാനപ്രകാരമാണ്​ നടപടി. ഡിസംബർ ഒന്ന്​ ചൊവ്വാഴ്​ച മുതൽ തീരുമാനം പ്രാബല്ല്യത്തിൽ വരുമെന്ന്​ അധികൃതർ അറിയിച്ചു.

സിനിമാ തിയേറ്ററുകളും പാർക്കുകളും പൊതുസ്​ഥലങ്ങളും തുറക്കാൻ അനുമതി നൽകിയിട്ടുണ്ട്​. കഴിഞ്ഞ എട്ടുമാസമായി പാർക്കുകളും സിനിമാ തിയേറ്ററുകളും അടഞ്ഞു കിടക്കുകയായിരുന്നു. ബീച്ചുകളിലേക്ക്​ പ്രവേശനാനുമതി നൽകാനും തീരുമാനമായിട്ടുണ്ട്​. കോവിഡ്​ വ്യാപനത്തെ തുടർന്ന്​ ഒക്​ടോബർ ആദ്യത്തിലാണ്​ ബീച്ചുകളിലേക്കുള്ള പ്രവേശനം അധികൃതർ വിലക്കിയത്​. 12 വയസിൽ താഴെയുള്ള കുട്ടികൾക്ക്​ ഷോപ്പിങ്​ മാളുകളിൽ പ്രവേശനാനുമതി നൽകുകയും ചെയ്​തു. മവേല പച്ചക്കറി മാർക്കറ്റിൽ ചില്ലറ വിൽപന പുനരാരംഭിക്കുകയും ചെയ്യും.

മാളുകളിലെയും വാണിജ്യ കേന്ദ്രങ്ങളിലെയും ഫുഡ്​കോർട്ടുകൾ, എക്​സിബിഷൻ-കോൺഫറൻസ്​, ഹെൽത്ത്​ ക്ലബ്​, കിൻറർഗാർട്ടൻ, നഴ്​സറികൾ എന്നിവക്കും പ്രർത്തനാനുമതി നൽകി. മ്യൂസിയങ്ങളും കോട്ടകളുമടക്കം ടൂറിസ്​റ്റ്​ കേന്ദ്രങ്ങളും തുറക്കും. കാണികളെ പ്രവേശിപ്പിക്കാതെയുള്ള കായിക മൽസരങ്ങൾ, ബൗളിങ്​ സെൻററുകൾ, ബ്യൂട്ടി സലൂണുകളിലെ രണ്ടാം ഘട്ട സേവനങ്ങൾ, വസ്​ത്ര വ്യാപാര സ്​ഥാപനങ്ങളിലെ ട്രയൽ റൂം തുറക്കൽ, മാളുകളിലെ വിനോദ സ്​ഥലങ്ങൾ, ക്യാമ്പിങ്​ സാധനങ്ങൾ വാടകക്ക്​ നൽകുന്ന കടകൾ, പുനരധിവാസ കേന്ദ്രങ്ങൾ എന്നിവക്കും ആഭ്യന്തര മന്ത്രാലയം അനുമതി നൽകിയിട്ടുണ്ട്​. മാളുകളിലെ പാർക്കിങിൽ ഇനി മുഴുവൻ പാർക്കിങ്​ അനുവദിക്കുകയും ചെയ്യാമെന്ന്​ അധികൃതർ അറിയിച്ചു.

നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക

ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല

Comments are Closed.