90 ലധികം ലോക നഗരങ്ങളിലേക്ക് പറക്കാൻ ചിറക് വിരിച്ച് ഖത്തർ എയർ‌വേയ്സ്

സ്വന്തം ലേഖകൻ: കൊവിഡ്-19നെ തുടർന്ന് താൽക്കാലികമായി നിർത്തിവെച്ച സർവിസുകളുൾപ്പെടെ കൂടുതൽ സർവിസുകൾ പുനരാരംഭിക്കാനൊരുങ്ങി ഖത്തർ എയർവേസ്​​. കൊവിഡ്-19 പ്രതിസന്ധി ആരംഭിച്ചതിന് ശേഷവും മുപ്പതോളം നഗരങ്ങളിലേക്ക് സർവിസ്​ തുടർന്ന ഖത്തർ എയർവേസ്​​, ഇതിനകം തന്നെ നിരവധി നഗരങ്ങളിലേക്ക് സർവിസ്​ പുനരാരംഭിക്കുകയും ചെയ്തു. ഒക്ടോബർ മധ്യത്തോടെ അമ്മാൻ, എൻതെബ്ബെ, ഹാനോയ്, സിഷിലെസ്​, വിൻഡ്ഹോക്, യെറേവാൻ എന്നീ നഗരങ്ങളിലേക്ക് സർവിസുകൾ പുനരാരംഭിക്കാനിരിക്കുകയാണ് കമ്പനി​.

ആക്രയിലേക്ക് പുതിയ സർവിസ്​ ആരംഭിക്കാനും പദ്ധതിയുണ്ട്. കൂടാതെ കോപൻഹേഗൻ, ധാക്ക, എൻതെബ്ബെ, ഹാനോയ്, മാഡ്രിഡ്, മാഞ്ചസ്​റ്റർ, മനില, സിഷിലെസ്​, സ്​റ്റോക്​ഹോം, വിൻഡ്ഹോക്, യെറേവാൻ എന്നീ നഗരങ്ങളിലേക്ക് സർവിസുകൾ പുനാരാരംഭിക്കാനും അല്ലെങ്കിൽ സർവിസുകൾ വർധിപ്പിക്കാനും കമ്പനി പദ്ധതിയിടുന്നുണ്ട്. ഇതോടെ ഖത്തർ എയർവേസിെൻറ രാജ്യാന്തര സർവിസ്​ നടത്തുന്ന നഗരങ്ങളുടെ എണ്ണം 90 കവിയും.

ലോകത്തെ മുൻനിര ആഗോള വിമാന കമ്പനിയായി ഖത്തർ എയർവേസ്​​ മാറുന്നതിൽ അഭിമാനമേറെയുണ്ടെന്ന് ഗ്രൂപ് സി.ഇ.ഒ അക്ബർ അൽ ബാകിർ പറഞ്ഞു. യാത്രക്കാരുടെ ആവശ്യങ്ങൾ കണ്ടറിഞ്ഞ് പ്രതികരിക്കാൻ ഖത്തർ എയർവേസിന് സാധിക്കുന്നുണ്ടെന്നും നേരത്തെയുണ്ടായിരുന്ന സർവിസുകൾ പുനരാരംഭിക്കുന്നതോടൊപ്പം നിലവിലെ സർവിസുകളുടെ എണ്ണം വർധിപ്പിക്കുന്നതിലും ഖത്തർ എയർവേസ്​​ ശ്രദ്ധയൂന്നുന്നുണ്ടെന്നും അൽ ബാകിർ കൂട്ടിച്ചേർത്തു.

നിയന്ത്രണങ്ങൾ കൂടുതൽ നീക്കുന്നതോടെ ആഗോള തലത്തിൽ സർവിസുകൾ വർധിപ്പിക്കാനാണ് ഖത്തർ എയർവേസ്​​ നീക്കം. ഉടൻ കൂടുതൽ നഗരങ്ങളിലേക്ക് സർവിസ്​ പുനരാരംഭിക്കുമെന്ന് ഖത്തർ എയർവേസ്​​ നേരത്തെ വ്യക്തമാക്കിയിരുന്നു. കൊവിഡ്-19 പ്രതിസന്ധികാലത്ത് വിവിധ രാജ്യങ്ങളിൽ കുടുങ്ങിക്കിടന്നിരുന്ന ലക്ഷക്കണക്കിന് യാത്രക്കാരെയാണ് ഖത്തർ എയർവേസ്​​ സ്വദേശങ്ങളിലെത്തിച്ചത്. നിയന്ത്രണങ്ങൾ നീക്കുന്നതോടെ പതിയെ വിപണിയിൽ സാന്നിധ്യം വീണ്ടും ശക്തമാക്കാനാണ് ഖത്തർ എയർവേസ്​​ പദ്ധതി.

അതേസമയം, കൊവിഡ്-19 കാരണം അന്താരാഷ്​ട്ര സർവിസുകൾ നിർത്തിവെച്ചതിനാൽ, ഉപഭോക്താക്കൾക്ക് നൽകിയ വാക്കുപാലിച്ച് ഖത്തർ എയർവേസ്​​ ഈയടുത്ത് ശ്രദ്ധ നേടിയിരുന്നു. മാർച്ച് മുതൽ റീഫണ്ട് ഇനത്തിൽ 120 കോടി യു.എസ്​ ഡോളർ ​ മടക്കി നൽകിയ​േതാടെയാണിത്​.

യാത്രക്കാർക്ക് ഏറ്റവും ലളിതമായ ബുക്കിങ്​ നയങ്ങളാണ് കൊവിഡ്-19 പശ്ചാത്തലത്തിൽ ഖത്തർ എയർവേസ്​​ മുന്നോട്ടുവെച്ചത്. സെപ്​റ്റംബർ 30ന് മുമ്പായി ബുക്ക് ചെയ്യുന്ന ഖത്തർ എയർവേസ്​​ ടിക്കറ്റുകൾക്ക് രണ്ടുവർഷത്തെ കാലാവധിയാണ് കമ്പനി ഓഫർ നൽകുന്നത്. ഇക്കാലയളവിൽ യാത്രക്കാർക്ക് തീയതിയും സ്​ഥലവും ആവശ്യാനുസരണം സൗജന്യമായി മാറ്റാനും കമ്പനി അവസരം നൽകുന്നുണ്ട്.