ഓഗസ്​റ്റ്​ 31ന്​ ശേഷം വീസ കാലാവധി നീട്ടി നൽകില്ലെന്ന് കുവൈത്ത്​; യാത്രാ വിലക്ക് പിൻ‌വലിച്ചേക്കും

സ്വന്തം ലേഖകൻ: ഓഗസ്റ്റ്​ 31ന്​ ശേഷം വിസ കാലാവധി നീട്ടിനൽകില്ലെന്ന്​ കുവൈത്ത്​ ആഭ്യന്തര മന്ത്രാലയം പ്രഖ്യാപിച്ചു. നേരത്തെ രണ്ട്​ ഘട്ടങ്ങളിലായി മാർച്ച്​ ഒന്നുമുതൽ ഓഗസ്റ്റ്​ 31 വരെ സ്വാഭാവിക എക്​സ്​റ്റൻഷൻ നൽകിയിരുന്നു. 4,05,000 വിദേശികൾക്ക്​ ഇതി​െൻറ ​പ്രയോജനം ലഭിച്ചു. സന്ദർശക വിസയും ജോലി വിസയും ഉൾപ്പെടെ കാലാവധി കഴിയുന്ന എല്ലാ വിസകൾക്കും പ്രത്യേക അപേക്ഷ നൽകാതെ സ്വാഭാവിക എക്​സ്​റ്റൻഷൻ ലഭിക്കുകയായിരുന്നു.

കോവിഡ്​ പശ്ചാത്തലത്തിൽ വിമാന സർവീസ്​ ഇല്ലാതെ ഇവിടെ കുടുങ്ങിയ നിരവധി പേർക്ക്​ ഇത്​ ആശ്വാസമായിരുന്നു. ഇക്കാലയളവിൽ വിസ കാലാവധി കഴിഞ്ഞ തൊഴിലാളികൾക്കും പ്രയോജനപ്പെട്ടു. 260000 പേർ ആഭ്യന്തര മന്ത്രാലയത്തി​െൻറ വെബ്​സൈറ്റ്​ വഴി വിസ പുതുക്കി. ഒാൺലൈനായി പുതുക്കാൻ അവസരമുണ്ടായിട്ടും 145000 പേർ ഇത്​ പ്രയോജനപ്പെടുത്തിയില്ല. ഇൗ സാഹചര്യത്തിൽ ഇനി സ്വാഭാവിക എക്​സ്​റ്റൻഷൻ നൽകേണ്ടെന്നാണ്​ ആഭ്യന്തര മന്ത്രാലയത്തി​െൻറ തീരുമാനം.

ഓഗസ്റ്റ്​ 31നകം ഒാൺലൈനായി പുതുക്കിയില്ലെങ്കിൽ താമസ നിയമലംഘകരായി കണക്കാക്കി പിഴ ഇൗടാക്കുകയും നിയമനടപടി സ്വീകരിക്കുകയും ചെയ്യും. സന്ദർശക വിസയിലുള്ളർ ഓഗസ്റ്റ്​ 31നകം തിരിച്ചുപോവണം. ഒരു ലക്ഷം സന്ദർശക വിസക്ക്​ നേരത്തെ കാലാവധി നീട്ടി നൽകിയിരുന്നു. ഇവർ 31നകം തിരിച്ചുപോയില്ലെങ്കിൽ കരിമ്പട്ടികയിൽ പെടുത്തും. പിന്നീട്​ കുവൈത്തിലേക്ക്​ വരാൻ കഴിയില്ല. സ്​പോൺസറിൽനിന്ന്​ പിഴ ഇൗടാക്കുകയും ചെയ്യും.

31 രാജ്യങ്ങളിൽനിന്ന്​ കുവൈത്തിലേക്ക്​ വരുന്നതിന്​ ഏർപ്പെടുത്തിയ വിലക്ക്​ നിബന്ധനകളോടെ പിൻവലിക്കാൻ സാധ്യത. സർക്കാർ വ്യോമയാന വകുപ്പും ആരോഗ്യ മന്ത്രാലയവുമായി ഏകോപനം നടത്തി വിലക്ക്​ പുനഃപരിശോധിക്കുമെന്ന്​ ഉന്നത വൃത്തങ്ങളെ ഉദ്ധരിച്ച്​ പ്രാദേശിക പത്രം റിപ്പോർട്ട്​ ചെയ്​തു. സർക്കാർ നിശ്ചയിക്കുന്ന ഹോട്ടലുകളിൽ സ്വന്തം ചെലവിൽ രണ്ടാഴ്​ച ക്വാറൻറീനിൽ കഴിയേണ്ടിവരുമെന്ന നിബന്ധനയോടെ വിലക്ക്​ നീക്കാനാണ്​ ആലോചന.

അടുത്ത മാസം തുടക്കം മുതൽ ഘട്ടംഘട്ടമായി ഇളവ്​ നൽകാനാണ്​ നീക്കം. അധ്യാപകർ തുടങ്ങി ചില വിഭാഗങ്ങൾക്ക്​ മുൻഗണനയുണ്ടാവും. ഇന്ത്യ, കൊളംബിയ, അർമേനിയ, സിംഗപ്പൂർ, ബോസ്​നിയ ആൻഡ്​ ഹെർസഗോവിന, ഇന്തോനേഷ്യ, ചിലി, ഇറ്റലി, വടക്കൻ മാസിഡോണിയ, മോണ്ടിനെഗ്രോ, ഡൊമിനിക്കൻ റിപ്പബ്ലിക്​, ചൈന, ബ്രസീൽ, സിറിയ, സ്​പെയിൻ, ഇറാഖ്​, മെക്​സികോ, ലബനാൻ, ഹോ​േങ്കാങ്​, സെർബിയ, ഇറാൻ, ഫിലിപ്പീൻസ്​, ബംഗ്ലാദേശ്​, ശ്രീലങ്ക, നേപ്പാൾ, പാകിസ്​താൻ, ഇൗജിപ്​ത്​, പനാമ, പെറു, മൽഡോവ എന്നീ രാജ്യങ്ങളിൽനിന്നാണ് നിലവിൽ​ കുവൈത്തിലേക്ക്​ നേരിട്ട്​ വരുന്നതിന്​ വിലക്കുള്ളത്​.