“ഇനി അഞ്ച് ആഴ്ച കൂടി,” ബ്രെക്സിറ്റിൽ ഇയുവിന് അന്ത്യശാസനം നൽകി ബോറിസ്

സ്വന്തം ലേഖകൻ: ബ്രെക്സിറ്റ്‌ സംബന്ധിച്ച് യൂറോപ്യൻ യൂണിയൻ ബ്രിട്ടന്റെ ആവശ്യങ്ങൾ പുനർവിചിന്തനം ചെയ്തില്ലെങ്കിൽ അഞ്ച് ആഴ്ചയ്ക്കുള്ളിൽ വ്യാപാര ചർച്ചകളിൽ നിന്ന് പിന്മാറുമെന്ന് ബോറിസ് ജോൺസൺ ബ്രസ്സൽസിന് മുന്നറിയിപ്പ് നൽകി.

യൂറോപ്യൻ യൂണിയൻ നേതാക്കൾ ബ്രസ്സൽസിൽ ഒരു പ്രധാന ഉച്ചകോടി നടത്താനിരിക്കെ ഒക്ടോബർ 15 ന് അപ്പുറം വ്യാപാര ചർച്ചകൾ തുടരാൻ അനുവദിക്കുന്നതിൽ അർത്ഥമില്ലെന്ന് പ്രധാനമന്ത്രി പറയുന്നു. ഒരു സ്വതന്ത്ര രാജ്യം ആകുക എന്നതിൽ അടിസ്ഥാനകാര്യങ്ങളിൽ തനിക്ക് വിട്ടുവീഴ്ച ചെയ്യാൻ കഴിയില്ല’ എന്ന് അദ്ദേഹം പറയുന്നു,

യൂറോപ്യൻ യൂണിയന് പുറത്തുള്ള പുതിയ സ്വാതന്ത്ര്യങ്ങൾ ഉപയോഗപ്പെടുത്തുമ്പോൾ യുകെ ശക്തമായി അഭിവൃദ്ധി പ്രാപിക്കും എന്നതിൽ സംശയമുണ്ടാകില്ലെന്ന് പ്രധാനമന്ത്രി പറയുന്നു. നോ ബ്രെക്സിറ്റ്‌ ഡീൽ ഒരു നല്ല ഫലമായിരിക്കുമെന്ന് ജോൺസൺ വാദിക്കുന്നു.

ബ്രിട്ടന്റെ ബ്രെക്സിറ്റ്‌ നെഗോഷ്യേറ്റർ ലോർഡ് ഡേവിഡ് ഫ്രോസ്റ്റും യൂറോപ്യൻ യൂണിയൻ ചീഫ് ബ്രെക്സിറ്റ്‌ നെഗോഷ്യേറ്റർ മൈക്കൽ ബാർനിയറും തമ്മിൽ ഇന്ന് ലണ്ടനിൽ നടക്കുന്ന ചർച്ചകൾക്ക് മുമ്പാണ് പ്രധാനമന്ത്രിയുടെ അഭിപ്രായങ്ങൾ. ബ്രിട്ടീഷ് നിയമത്തിലെ പ്രധാന മേഖലകളിൽ തുടർച്ചയായ ബ്രസൽസ് മേൽനോട്ടം സ്വീകരിക്കണമെന്ന യൂറോപ്യൻ യൂണിയൻ ആവശ്യങ്ങൾ അംഗീകരിക്കില്ലെന്ന് ഡേവിഡ് ഫ്രോസ്റ്റ് അഭിപ്രായപ്പെട്ടിരുന്നു.

‘ഞങ്ങളുടെ നിലപാട് ഗൗരവമായി കാണണമെന്നും’ ചർച്ചകൾക്ക് പരിഹാരം കാണാൻ ഇപ്പോൾ പ്രവർത്തിക്കണമെന്നും അദ്ദേഹം ബാർണിയറിനോട് അഭ്യർത്ഥിച്ചു. ഒരു സാഹചര്യത്തിലും ബ്രസൽസിന്റെ ‘ക്ലയന്റ് സ്റ്റേറ്റ്’ ആകാൻ യുകെ തയ്യാറല്ലെന്ന് ഫ്രോസ്റ്റ് പ്രഭു പറഞ്ഞു.

ചർച്ചകളിൽ താമസം നേരിടുന്നതായി വിദേശകാര്യ സെക്രട്ടറി ഡൊമിനിക് റാബ് അഭിപ്രായപ്പെട്ടിരുന്നു. ബ്രസൽസ് കാര്യമായ ഗൗരവം കാണിച്ചില്ലെങ്കിൽ യൂറോപ്യൻ യൂണിയനിലുടനീളം ആയിരക്കണക്കിന് തൊഴിലവസരങ്ങൾ അപകടത്തിലാകുമെന്ന് റാബ് മുന്നറിയിപ്പ് നൽകി. വാണിജ്യ ഇടപാട് ഇല്ലെങ്കിൽ യൂറോപ്യൻ യൂണിയൻ അംഗരാജ്യങ്ങളുടെ സമ്പദ്‌വ്യവസ്ഥയെ സംബന്ധിച്ചിടത്തോളം കാര്യമായ പ്രതികൂല സാഹചര്യമുണ്ടാകുമെന്ന് റബ് പറഞ്ഞു.

അതിനിടെ സർക്കാർ പരിഗണനയിലുണ്ടായിരുന്ന നാഷണൽ ലിവിംഗ് വേജ് വേതനത്തിൽ ആസൂത്രണം ചെയ്തിരുന്ന വർദ്ധനവ് നിലവിലെ സാഹചര്യത്തിൽ ഒഴിവാക്കേണ്ടി വരുമെന്ന മുന്നറിയിപ്പുമായി ചാൻസലർ റിഷി സുനക്.

2024 ഓടെ ശരാശരി ശമ്പളത്തിന്റെ മൂന്നിൽ രണ്ട് ഭാഗമായി ഉയർത്താനുള്ള പദ്ധതിയിൽ മിനിമം ശമ്പള നിരക്ക് മണിക്കൂറിൽ 8.72 പൗണ്ടിൽ നിന്ന് അടുത്ത ഏപ്രിലിൽ 9.21 പൗണ്ടായി ( 5.6 ശതമാനം) ഉയരുമെന്ന് പ്രതീക്ഷിച്ചിരുന്നു.

എന്നാൽ വേതനം സംബന്ധിച്ച് സർക്കാരിനെ ഉപദേശിക്കുന്ന ലോ പേ കമ്മീഷൻ, മാന്ദ്യകാലത്ത് തൊഴിലുടമകൾക്ക് വേതന വർദ്ധനവ് താങ്ങാനാവില്ല എന്നും തൊഴിൽ നഷ്‌ടത്തിന് കാരണമാകുമെന്നും ഉള്ള ആശങ്കകൾ കാരണം ഒരു ചെറിയ വർദ്ധനവ് മാത്രമാണ് ശുപാർശ ചെയ്യുന്നത്. ഈ ശരത്കാല ബജറ്റിലെ വർദ്ധനവിന് ‘എമർജൻസി ബ്രേക്ക്’ പ്രയോഗിക്കണമോ എന്ന് ഉദ്യോഗസ്ഥർ മന്ത്രിമാരുമായി ചർച്ച ചെയ്യുന്നു.

കഴിഞ്ഞ വർഷത്തെ പൊതുതെരഞ്ഞെടുപ്പിൽ ടോറികൾക്കനുകൂലമായി മാറിയ വടക്കൻ, മിഡ്‌ലാന്റ്‌സിലെ റെഡ് വാൾ സീറ്റുകളിൽ നൽകിയ പ്രധാന വാഗ്ദാനവും വേതന വർദ്ധനവ് തന്നെയായിരുന്നു. എന്നാൽ ഇവിടങ്ങളിൽ സർക്കാർ പിന്തുണ ഏകീകരിക്കേണ്ടതിന്റെ ആവശ്യകതയെക്കുറിച്ചുള്ള മുന്നറിയിപ്പുകൾക്കിടയിലാണ് ഈ പുതിയ നീക്കം.