1 $ = 0 INR
1 € = 0  INR
AssociationSpiritualEntertainmentFamily & KidsImmigrationGreetingsCookeryClassifieds
Posted By: Nri Malayalee April 4, 2021

സ്വന്തം ലേഖകൻ: കൂറ്റൻ ചരക്കുകപ്പൽ എവർ ഗിവൺ ഒരാഴ്ച വഴിമുടക്കിയ സൂയസ്​ കനാലിന്‍റെ ഇരു വശങ്ങളിലുമായി കെട്ടിക്കിടന്ന 400ലേറെ കപ്പലുകൾ മറുകര താണ്ടി. സൂയസ്​ കനാലിൽ മാത്രമല്ല കനാൽ ബന്ധിപ്പിക്കുന്ന മെഡിറ്ററേനിയനിലും ചെങ്കടലിലുമായി കുടുങ്ങിയ 422 കപ്പലുകളാണ്​ ഏറെനാൾ നീണ്ട രക്ഷാ പ്രവർത്തനങ്ങൾക്ക്​ ശുഭ പരിസമാപ്​തി കുറിച്ച്​ അവസാനം ലക്ഷ്യ​ത്തിലേക്ക്​ കുതിച്ചത്​.

മാർച്ച്​ 23ന്​ കാറ്റിലുലഞ്ഞ്​ ഇരുവശങ്ങളിലും ചെളിയിൽ പുതഞ്ഞ രണ്ടു ലക്ഷം ടൺ ചരക്കുകയറ്റിയ കൂറ്റൻ കപ്പലിനെ ഒരാഴ്ച നീണ്ട രക്ഷാദൗത്യ​ത്തിനൊടുവിൽ കഴിഞ്ഞ തിങ്കളാഴ്ചയാണ്​ രക്ഷപ്പെടുത്തിയത്​. തൊട്ടുപിറകെ ഇരുവശങ്ങളിലെയും കപ്പലുകൾ ​യാത്ര തുടങ്ങിയെങ്കിലും കുരുക്ക്​ പൂർണമായി അവസാനിക്കാൻ ഒരാ​ഴ്ചയെങ്കിലും എടുക്കുമെന്ന്​ അധികൃതർ വ്യക്​തമാക്കിയിരുന്നു. ശനിയാഴ്ച മാത്രം 85 കപ്പലുകൾ കനാൽ കടന്നപ്പോൾ ഇതിൽ 61 എണ്ണം കുടുങ്ങിക്കിടന്നവയായിരുന്നു.

400 മീറ്റർ നീളമുള്ള കപ്പൽ 200 മീറ്ററിലേറെ വീതിയുള്ള കനാലിനു കുറുകെ കുടുങ്ങിയത്​ ആഗോള ചരക്കുകടത്തിനെ ഗുരുതരമായി ബാധിച്ചു. എണ്ണ മാത്രമല്ല, അവശ്യ വസ്​തുക്കൾ വരെ കപ്പലുകളിൽ​ കെട്ടിക്കിടന്നു. പ്രതിദിനം 900 കോടി ഡോളർ വരുന്ന ചരക്കു കടത്ത്​ സമ്പൂർണമായി മുടങ്ങി. കാറ്റിലുലഞ്ഞ്​​ കപ്പൽ കുടുങ്ങുകയായിരുന്നു എന്നാണ് ജീവനക്കാർ പറയുന്നതെങ്കിലും അന്വേഷണം പുരോഗമിക്കുകയാണ്​.

422 കപ്പലുകളിലായി 2.6 കോടി ടൺ ചരക്കാണ്​ കെട്ടിക്കിടക്കുന്നത്. ഇവയിൽ കാത്തുകിടന്ന്​ കേടുവന്നത്​ മുതൽ കപ്പൽ ചെലവുകൾ വരെയായി ശതകോടികൾ വിവിധ കപ്പലുകൾ നഷ്​ടപരിഹാരമായി ആവശ്യപ്പെടും. കപ്പലിനെ രക്ഷ​പ്പെടുത്താൻ വേണ്ടിവന്ന ചെലവുകൾ വേറെ. എവർ ഗിവൺ കപ്പൽ ജീവനക്കാരുടെ പിഴവു മൂലമാണ്​ കുരുക്കുണ്ടായതെങ്കിൽ ഇവയത്രയും കപ്പൽ കമ്പനി നൽകേണ്ടിവരും.

നഷ്​ടപരിഹാരം ഈടാക്കാതെ എവർ ഗിവൺ കനാൽ വിട്ടുപോകാൻ അനുവദിക്കില്ലെന്ന്​ സൂയസ്​ കനാൽ അധികൃതർ വ്യക്​തമാക്കിയിട്ടുണ്ട്​. സമീപകാലത്ത്​ ചരക്കു കപ്പലുകളുമായി ബന്ധപ്പെട്ട ഏറ്റവും വലിയ നഷ്​ടപരിഹാര തുകയാണ്​ തീർപിലെത്താനുള്ളത്​.

കപ്പൽ കുടുങ്ങിയ അതേ സമയത്ത്​ കനാലിലുണ്ടായിരുന്ന മറ്റു കപ്പലുകളൊന്നും കാറ്റ്​ പ്രശ്​നമായി പറഞ്ഞിരുന്നില്ല. എന്നല്ല, കാറ്റ്​ പ്രതിരോധിക്കാൻ ചരക്കു കപ്പലുകളിൽ സംവിധാനവുമുണ്ട്​. മെഡിറ്ററേനിയൻ കടലിനെ ചെങ്കടലുമായി ബന്ധിപ്പിക്കുന്ന സൂയസ്​ കനാൽ യൂറോപിനും ഏഷ്യക്കുമിടയിലെ പ്രധാന നാവിക വ്യാപാര പാതയാണ്​. ആഫ്രിക്ക ചുറ്റിയുളള പാത 7,000 കിലോമീറ്റർ അധികം വരുമെന്നതിനാൽ പകരം സൂയസ്​ കനാലിനെയാണ്​ പ്രധാനമായും ആശ്രയിക്കുന്നത്​.

നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക

ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല