സ്വന്തം ലേഖകൻ: അബുദാബി ആസ്ഥാനമായുള്ള ഇത്തിഹാദ് എയര്‍വേയ്സ് വേനല്‍ക്കാലത്ത് യാത്ര ചെയ്യാന്‍ ഉദ്ദേശിക്കുന്ന യുഎഇ നിവാസികള്‍ക്കായി വന്‍ ആകര്‍ഷകമായ ഓഫറുകളുമായി രംഗത്തെത്തി. ഇന്ത്യ ഉള്‍പ്പെടെയുള്ള വിവിധ ലക്ഷ്യസ്ഥാനങ്ങളിലേക്കാണ് ചെറിയ നിരക്കിലുള്ള ടിക്കറ്റ് വില്‍പ്പന പ്രഖ്യാപിച്ചിരിക്കുന്നത്. അബുദാബിയില്‍ നിന്ന് ഇന്ത്യന്‍ നഗരമായ കൊല്‍ക്കത്തയിലേക്കുള്ള ഇക്കണോമി ക്ലാസ് റിട്ടേണ്‍ വിമാന നിരക്ക് 995 ദിര്‍ഹം മുതലാണ് ആരംഭിക്കുന്നത്.
യുഎഇയിലെ വിവിധ എമിറേറ്റുകളില്‍ താമസിക്കുകയും ജോലി ചെയ്യുകയും ചെയ്യുന്ന ദശലക്ഷക്കണക്കിന് ഇന്ത്യന്‍ പൗരന്മാര്‍ക്ക് ആശ്വാസമാവുന്ന ഓഫറുമായാണ് ഇത്തിഹാദ് എയര്‍വെയ്‌സ് രംഗത്തുവന്നിരിക്കുന്നത്. ഏറ്റവും തിരക്കേറിയ എയര്‍ റൂട്ടുകളിലൊന്നാണ് യുഎഇ-ഇന്ത്യ ഇടനാഴി. അതുകൊണ്ടു തന്നെ ആയിരക്കണക്കിന് ആളുകള്‍ക്ക് ഈ ഓഫര്‍ പ്രയോജനപ്പെടും.
മാര്‍ച്ച് 26 മുതല്‍ യുഎഇയുടെ ദേശീയ വിമാനക്കമ്പനിയും അബുദാബിക്കും കൊല്‍ക്കത്തയ്ക്കും ഇടയില്‍ പ്രതിദിന ഫ്‌ലൈറ്റുകള്‍ പുനരാരംഭിച്ചിരുന്നു. നേതാജി സുഭാഷ് ചന്ദ്രബോസ് അന്താരാഷ്ട്ര വിമാനത്താവളത്തിലേക്ക് ആഴ്ചയില്‍ ഏഴ് നോണ്‍-സ്റ്റോപ്പ് സര്‍വീസുകളാണ് എയര്‍വെയ്‌സ് നടത്തുന്നത്.
ഞങ്ങളുടെ സമീപകാല ആഘോഷ ഫ്‌ലാഷ് സെയിലിനെത്തുടര്‍ന്ന്, വേനല്‍ക്കാലത്തിന് മുമ്പ് പറക്കാന്‍ ആഗ്രഹിക്കുന്ന അതിഥികള്‍ക്ക് കൂടുതല്‍ അവിശ്വസനീയമായ നിരക്കുകളും പ്രത്യേക ഡീലുകളും ലഭ്യമാക്കുന്നതില്‍ ഞങ്ങള്‍ സന്തുഷ്ടരാണെന്ന് ഇത്തിഹാദ് എയര്‍വേസ് ചീഫ് റവന്യൂ ഓഫീസര്‍ അരിക് ഡെ പറഞ്ഞു.
അവസാന നിമിഷം ഒരു യാത്ര ബുക്ക് ചെയ്യാന്‍ പലരും താല്‍പ്പര്യപ്പെടുന്നുണ്ടെന്ന് ഞങ്ങള്‍ക്കറിയാം. അതിനാല്‍, വേനല്‍ക്കാലത്തിന് മുമ്പുള്ള അവധിക്കാലം ആഘോഷിക്കാന്‍ ഞങ്ങളുടെ ഉപഭോക്താക്കളെ സഹായിക്കുന്നതിന് ഞങ്ങള്‍ യൂറോപ്പ്, മിഡില്‍ ഈസ്റ്റ്, ഏഷ്യ എന്നിവിടങ്ങളിലെ നിരവധി ലക്ഷ്യസ്ഥാനങ്ങളിലേക്ക് നിരക്ക് ഇളവുകള്‍ പ്രഖ്യാപിച്ചിട്ടുണ്ടെന്നും അദ്ദേഹം വ്യക്തമാക്കി.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല