കുട്ടികൾക്കിടയിൽ ന്യുമോണിയ ക്ക് സമാനമായ അജ്ഞാത രോഗം; അസാധാരണമായി ഒന്നുമില്ലെന്ന് ചൈന

സ്വന്തം ലേഖകൻ: ശ്വാസകോശത്തെ ബാധിക്കുന്ന ന്യുമോണിയയുമായി സാമ്യമുള്ള അജ്ഞാതരോഗം ചൈനയിലെ കുട്ടികൾക്കിടയിൽ പടർന്നുപിടിക്കുന്ന വാർത്ത പുറത്തുവന്നിരുന്നു. ആശുപത്രികൾ കുട്ടികളെക്കൊണ്ടു നിറയുകയാണെന്നും സ്കൂളുകൾ അടച്ചുതുടങ്ങിയെന്നും റിപ്പോർട്ടുകളുണ്ടായിരുന്നു. എന്നാൽ പുതിയ രോ​ഗവ്യാപനത്തിനു പിന്നിൽ അസാധാരണമായ സാഹചര്യമോ പുതിയ രോ​ഗകാരികളോ ഇല്ലെന്ന് വ്യക്തമാക്കിയിരിക്കുകയാണ് ചൈനയിപ്പോൾ.

രോ​ഗം സംബന്ധിച്ച വിശദാംശങ്ങൾ കൈമാറാൻ ചൈനയോട് ലോകാര്യോഗ്യസംഘടന ആവശ്യപ്പെട്ടതിനു പിന്നാലെയാണ് ചൈന വിശദീകരണവുമായെത്തിയിരിക്കുന്നത്. കോവിഡ് നിയന്ത്രണങ്ങൾ നീക്കയതിനു പിന്നാലെയാണ് ശ്വാസകോശരോ​ഗങ്ങളുടെ കാര്യത്തിൽ വർധനവുണ്ടായിരിക്കുന്നതെന്നാണ് അധികൃതർ നൽകുന്ന വിശദീകരണം.

കൂടാതെ കുട്ടികളെ ബാധിക്കുന്ന മൈകോപ്ലാസ്മ ന്യുമോണിയ എന്ന സാധാരണ ബാക്ടീരിയൽ അണുബാധയുടെ വ്യാപനവും കാരണമാണെന്നും മേയ് മുതൽ അതുകണ്ടുവരുന്നുണ്ടെന്നും ചൈന വ്യക്തമാക്കുന്നു. ചില ഘട്ടങ്ങളിൽ ഈ ബാക്ടീരിയ ​ഗുരുതരമായ ശ്വാസകോശ അണുബാധയ്ക്ക് ഇടയാക്കുകയും ചെയ്യാം. ഇൻഫ്ലുവൻസ രോ​ഗങ്ങളും ആർ.എസ്.വി.(ശ്വസനേന്ദ്രിയത്തെ ബാധിക്കുന്ന respiratory syncytial virus)യും ഒക്ടോബർ മുതൽ പടരുന്നുണ്ടെന്നും അധികൃതർ വ്യക്തമാക്കി.

ചൈനയിലെ സർക്കാർ മാധ്യമമായ സിൻഹുവാ വാർത്താ ഏജൻസിയും ഇതുസംബന്ധിച്ച റിപ്പോർട്ട് പുറത്തുവിട്ടിട്ടുണ്ട്. രോ​ഗനിർണയത്തിന്റെ കാര്യത്തിലും കുട്ടികളുടെ ആരോ​ഗ്യസംരക്ഷണത്തിലും സസൂക്ഷ്മം നിരീക്ഷിച്ചു വരികയാണെന്ന് ചൈനയിലെ നാഷണൽ ഹെൽത്ത് കമ്മീഷനിലെ അധികൃതരും വ്യക്തമാക്കി. ഇതിനുപിന്നാലെ ചൈനയിൽ അസാധാരണമായയോ പുതിയതോ ആയ അണുബാധയുടെ സാന്നിധ്യമില്ലെന്ന് വ്യക്തമാക്കിയതായി ലോകാരോ​ഗ്യസംഘടനയും പ്രസ്താവന പുറത്തിറക്കി.

ലോകാരോ​ഗ്യസംഘടന നിലവിലെ സാഹചര്യം നിരീക്ഷിച്ചുവരുന്നുണ്ടെന്നും ചൈനയിലെ ആരോ​ഗ്യപ്രവർത്തകരുമായി നിരന്തരം ബന്ധപ്പെട്ടുകൊണ്ടിരിക്കുന്നുണ്ടെന്നും പ്രസ്താവനയിൽ പറയുന്നു. രോ​ഗം കൂടുതൽ പടരുന്നത് തടയാൻ അവശ്യമായ നടപടികൾ കൈക്കൊള്ളണമെന്നും ലോകാരോ​ഗ്യ സംഘടന നിർദേശിച്ചിട്ടുണ്ട്. നിലവിലുള്ള, അറിയപ്പെടുന്ന ഒന്നിലധികം രോ​ഗകാരികളാണ് നിലവിലെ രോ​ഗവ്യാപനത്തിന് പിന്നിലെന്നും ചൈനയിലോ ആരോ​ഗ്യവിദ​ഗ്ധർ വ്യക്തമാക്കുന്നു.

ഒക്ടോബർ മുതൽ വടക്കൻ ചൈനയിലെ പലഭാ​ഗങ്ങളിലും ഇൻഫ്ലുവൻസ റിപ്പോർട്ടുകൾ കൂടുതലാണ്. ശ്വാസകോശത്തെ ബാധിക്കുന്ന അണുബാധയ്ക്കും വീക്കത്തിനും പൊതുവേ പറയുന്ന പേരാണ് ന്യുമോണിയ. ബാക്ടീരിയയും ഫം​ഗി അണുബാധയുമൊക്കെ ന്യുമോണിയയ്ക്ക് കാരണമാകാം. രാജ്യത്തുടനീളം ശ്വാസകോശസംബന്ധമായ രോ​ഗങ്ങൾ കുത്തനെ ഉയരുന്നുണ്ടെന്നതു സംബന്ധിച്ച് ഈ മാസമാദ്യം ചൈനയിലെ ആരോ​ഗ്യവകുപ്പ് അധികൃതർ പ്രസ് കോൺഫറൻസ് വിളിച്ചിരുന്നു.

കോവിഡ് നിയന്ത്രണങ്ങൾ ലഘൂകരിച്ചതും പുതിയ ശ്വാസകോശ രോ​ഗവ്യാപനവും തമ്മിലുള്ള ബന്ധത്തേയും ചൈനയിലെ ആരോ​ഗ്യപ്രവർത്തകർ ചൂണ്ടിക്കാട്ടുന്നുണ്ട്. ബീജിങ്ങിലേയും ലിയോണിങ്ങിലേയും ആശുപത്രികളിൽ ശ്വാസകോശരോ​ഗം ബാധിച്ച് പ്രവേശിപ്പിക്കപ്പെട്ട കുട്ടികളുടെ എണ്ണം കുത്തനെ ഉയരുകയാണെന്നാണ് റിപ്പോർട്ടുകൾ. രോ​ഗവ്യാപനം കണക്കിലെടുത്ത് പലയിടങ്ങളിലും സ്കൂളുകൾ അടയ്ക്കുകയും ചെയ്തിട്ടുണ്ട്.

പ്രശസ്ത മാധ്യമവും രോ​ഗങ്ങൾ സംബന്ധിച്ച നിരീക്ഷണ റിപ്പോർട്ടുകൾ പുറത്തുവിടുന്നതുമായ പ്രൊമെഡ് എന്ന മാധ്യമത്തിലൂടെ ചൊവ്വാഴ്ച്ച ചൈനയിലെ പുതിയ സാഹചര്യത്തേക്കുറിച്ച് മുന്നറിയിപ്പ് പുറത്തുവന്നിരുന്നു. 2019-ൽ കോവിഡിന്റെ വരവിനേക്കുറിച്ചും പ്രൊമെഡ് സമാനമായ മുന്നറിയിപ്പ് നൽകിയിരുന്നു.