സ്വന്തം ലേഖകൻ: ഓക്സ്ഫഡ് യൂണിവേഴ്സിറ്റി വികസിപ്പിച്ചെടുത്ത കൊവിഡ് വാക്സിന്റെ ഒന്നും രണ്ടും ഘട്ടങ്ങൾ വിജയിച്ചതായുള്ള റിപ്പോർട്ട് ലോകരാജ്യങ്ങൾക്ക് വലിയ ആശ്വാസമാണ് പകരുന്നത്. ഇതിന് പിന്നാലെ ഒട്ടേറെ രാജ്യങ്ങൾ അധികൃതരെ സമീപിച്ച് തുടങ്ങി. അതിനിടെ ഒരു കോടി ഡോസുകളാണ് ബ്രിട്ടന്‍ ഓർഡർ ചെയ്തിരിക്കുന്നതെന്ന വാർത്തകളും പുറത്തു വരുന്നുണ്ട്.
ആഭ്യന്തരമായും ലോകമെമ്പാടും വികസിപ്പിച്ചുകൊണ്ടിരിക്കുന്ന മൂന്ന് വ്യത്യസ്ത തരം വാക്സിനുകൾ ബ്രിട്ടനു ഇപ്പോൾ ലഭ്യമാകുമെന്ന് ബിസിനസ് സെക്രട്ടറി അലോക് ശർമ പറഞ്ഞു. ഒരു വാക്സിൻ കണ്ടെത്താനുള്ളത് ആഗോള ശ്രമമാണ്, ബ്രിട്ടിഷ് പൊതുജനങ്ങൾക്ക് സുരക്ഷിതവും ഫലപ്രദവുമായ കൊറോണ വൈറസ് വാക്സിൻ എത്രയും വേഗം ലഭ്യമാകുമെന്ന് ഉറപ്പാക്കാൻ ഞങ്ങൾ ആവുന്നതെല്ലാം ചെയ്യുന്നുവെന്ന് ശർമ്മ പറഞ്ഞു.
ബയോ ടെക്കും ജർമ്മൻ കമ്പനിയായ ഫൈസറും വികസിപ്പിച്ചെടുക്കുന്ന വാക്സിൻ 30 ദശലക്ഷം ഡോസ് നിർമിക്കും. ഫ്രാൻസിന്റെ വാൽനേവ സൃഷ്ടിച്ച വാക്സിൻ 60 ദശലക്ഷം ഡോസുകൾ നിർമിക്കാനാണ് നീക്കം. നിലവിൽ ഓസ്ട്രാഫെനെക്കയുമായി സഹകരിച്ച് ഓക്സ്ഫഡ് യൂണിവേഴ്സിറ്റി പരീക്ഷിച്ച വാക്സിനിന്റെ ഒരു കോടി ഡോസ് കൂടി വാങ്ങുമെന്ന് സർക്കാർ അറിയിച്ചു.
വാക്സിൻ സുരക്ഷിതവും നന്നായി സഹകരിക്കുന്നതും പ്രതിരോധശേഷി വർധിപ്പിക്കുന്നതുമാണെന്നാണ് മെഡിക്കൽ ജേണൽ ദി ലാൻസെറ്റിന്റെ ചീഫ് എഡിറ്റർ പ്രതികരിച്ചത്. പെഡ്രോ ഫൊലെഗാട്ടിക്കും സഹപ്രവർത്തകർക്കും അഭിനന്ദനങ്ങൾ. ഈ ഫലങ്ങൾ അങ്ങേയറ്റം പ്രോത്സാഹജനകമാണെന്നും അദ്ദേഹം പറഞ്ഞു.
അതിനിടെ ലോകത്തെ ആദ്യത്തെ കൊവിഡ്–19 വാക്സിൻ അടുത്ത മാസം പൊതുജനങ്ങൾക്ക് ലഭ്യമാക്കുമെന്ന് റഷ്യൻ ആരോഗ്യമന്ത്രി ഉറപ്പ് നൽകി. മൂന്നാമത്തെയും അവസാനത്തെയും ക്ലിനിക്കൽ പരീക്ഷണങ്ങളുടെ ഫലങ്ങൾ പുറത്തുവരുന്നതിനു മുന്‍പ് തന്നെ വാക്സിൻ ജനങ്ങൾക്ക് നൽകാനാണ് റഷ്യയുടെ തീരുമാനം.
ഓഗസ്റ്റ് 3 ന് റഷ്യയിലും സൌദി അറേബ്യയിലും യുണൈറ്റഡ് അറബ് എമിറേറ്റുകളിലും ആയിരക്കണക്കിന് ആളുകളിൽ ഈ വാക്സിന്റെ മൂന്നാം ഘട്ട പരീക്ഷണങ്ങൾ ആരംഭിക്കുമെന്ന് സർക്കാർ പിന്തുണയുള്ള റഷ്യൻ ഡയറക്ട് ഇൻവെസ്റ്റ്‌മെന്റ് ഫണ്ടിന്റെ (ആർ‌ഡി‌എഫ്) ചീഫ് എക്സിക്യൂട്ടീവ് കിറിൽ ഡിമിട്രീവ് പറഞ്ഞു.
റഷ്യയുടെ പ്രതിരോധ മന്ത്രാലയത്തിന്റെ ഗമാലി ഇൻസ്റ്റിറ്റ്യൂട്ട് ഓഫ് എപ്പിഡെമിയോളജി ആൻഡ് മൈക്രോബയോളജി വികസിപ്പിച്ചെടുത്ത കൊറോണ വൈറസ് വാക്സിൻ ക്ലിനിക്കൽ പരീക്ഷണങ്ങൾ വിജയകരമായി പൂർത്തിയാക്കിയതായി നേരത്തെ റഷ്യയിലെ സെചെനോവ് സർവകലാശാല പ്രഖ്യാപിച്ചിരുന്നു.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല