സ്വന്തം ലേഖകൻ: അമ്പതോ അതിലധികമോ തൊഴിലാളികള്‍ ജോലി ചെയ്യുന്ന യുഎഇ കമ്പനികള്‍ ജൂണ്‍ 30-നകം തങ്ങളുടെ അര്‍ദ്ധവാര്‍ഷിക എമിറേറ്റൈസേഷന്‍ അഥവാ സ്വദേശിവൽക്കരണ ലക്ഷ്യം കൈവരിക്കണമെന്ന് അധികൃതര്‍ ഓർമ്മപ്പെടുത്തി. ഈ സ്ഥാപനങ്ങള്‍ സമയപരിധിക്ക് മുമ്പ് തങ്ങളുടെ കീഴിലുള്ള സ്വദേശി തൊഴിലാളികളുടെ എണ്ണം ഒരു ശതമാനം വര്‍ധിപ്പിച്ചിരിക്കണമെന്ന് മാനവ വിഭവശേഷി, എമിറേറ്റൈസേഷന്‍ മന്ത്രാലയം പറഞ്ഞു.
2026-ഓടെ സ്വദേശിവൽക്കരണത്തോട് കുറഞ്ഞത് 10 ശതമാനത്തിലെത്താന്‍ രാജ്യത്തെ സ്വകാര്യ കമ്പനികള്‍ തങ്ങളുടെ സ്ഥാപനത്തിലെ സ്വദേശി തൊഴിലാളികളുടെ ശതമാനം ഓരോ വര്‍ഷവും രണ്ട് ശതമാനം കണ്ട് വര്‍ദ്ധിപ്പിക്കേണ്ടതുണ്ട്. ഇത് രണ്ട് ഘട്ടമായി തിരിച്ചാണ് ജൂൺൺ 30നകം ഒരാളെയും ഡിസംബർ 31നകം രണ്ടാമത്തെ ആളെയും ജോലിയിൽ നിയമിക്കണമെന്ന് വ്യവസ്ഥ ചെയ്തിരിക്കുന്നത്.
ഇതുവരെ, 97,000-ലധികം യുഎഇ പൗരന്മാർ രാജ്യത്തെ 20,000-ലധികം സ്വകാര്യ കമ്പനികളില്‍ ജോലി ചെയ്യുന്നുണ്ടെന്ന് മാനവ വിഭവ ശേഷി സ്വദേശിവൽക്കരണ മന്ത്രാലയം അടുത്തിടെ ഒരു റിപ്പോര്‍ട്ടില്‍ വ്യക്തമാക്കി. യുഎഇ ഭരണകൂടം നടപ്പിലാക്കുന്ന സ്വദേശിവൽക്കരണ നയത്തിന്റെ ഫലപ്രാപ്തിയാണ് ഇത് വ്യക്തമാക്കുന്നതെന്ന് മാനവവിഭവശേഷി, സ്വദേശിവല്‍ക്കരണ മന്ത്രി ഡോ. അബ്ദുള്‍റഹ്മാന്‍ അല്‍ അവാര്‍ പറഞ്ഞു.
അതിനിടെ 50ൽ താഴെ ജീവനക്കാരുള്ള സ്വകാര്യമേഖലാ സ്ഥാപനങ്ങളിലേക്ക് സ്വദേശിവൽക്കരണം വ്യാപിപ്പിക്കാൻ യുഎഇ തീരുമാനം നടപ്പിൽ വരുത്തി തുടങ്ങിയതായി മന്ത്രാലയം അറിയിച്ചു. മാനവ വിഭവശേഷി എമിറേറ്റൈസേഷൻ മന്ത്രാലയത്തിന്റെ പുതിയ പദ്ധതി പ്രകാരം 20 മുതൽ 49 വരെ തൊഴിലാളികൾ ജോലി ചെയ്യുന്ന സ്വകാര്യ മേഖലയിലെ കമ്പനികളിലെയും വ്യക്തിഗത സ്ഥാപനങ്ങളിലെയും 14 പ്രത്യേക പ്രധാന സാമ്പത്തിക പ്രവർത്തന മേഖലകളിലാണ് സ്വദേശിവൽക്കണം നടപ്പാക്കുക.
ഇതനുസരിച്ച്, ഇൻഫർമേഷൻ ആൻഡ് കമ്മ്യൂണിക്കേഷൻ, ഫിനാൻസ്, ഇൻഷുറൻസ്, റിയൽ എസ്റ്റേറ്റ്, പ്രൊഫഷണൽ, സയന്റിഫിക്, ടെക്‌നിക്കൽ പ്രവർത്തനങ്ങൾ, അഡ്മിനിസ്‌ട്രേറ്റീവ്, സപ്പോർട്ട് സേവനങ്ങൾ എന്നിവയുൾപ്പെടെ വിപുലമായ മേഖലകൾ സ്വദേശിവൽക്കരണത്തിന്റെ പരിധിയിൽ വരും. വിദ്യാഭ്യാസം, ആരോഗ്യം, സാമൂഹിക പ്രവർത്തനം, കല, വിനോദം, ഖനനം, ഖനനം, ഉൽപ്പാദനം, നിർമ്മാണം, മൊത്ത, ചില്ലറ വ്യാപാരം, താമസം, ഹോസ്പിറ്റാലിറ്റി സേവന പ്രവർത്തനങ്ങൾ, ഗതാഗതം, സംഭരണം എന്നീ മേഖലകളും ഇതിൽ ഉൾപ്പെടും.
പദ്ധതിയുടെ പരിധിയിൽ വരുന്ന സ്ഥാപനങ്ങൾ 2024ലും 2025ലും കുറഞ്ഞത് ഒരു യുഎഇ പൗരനെയെങ്കിലും നിയമിച്ചിരിക്കണമെന്നാണ് വ്യവസ്ഥ. നിയമം ലംഘിച്ചാൽ പിഴ ഒടുക്കേണ്ടിവരും. നിലവിലെ നിയമപ്രകാരം 2024ൽ സ്വദേശിയെ നിയമിക്കാത്തവർക്ക് 96,000 ദിർഹമാണ് (21 ലക്ഷത്തിലേറെ രൂപ) പിഴ. 2025ൽ പിഴ 1,08,000 ദിർഹമായി (ഏതാണ്ട് 24 ലക്ഷത്തിലേറെ രൂപ) വർദ്ധിക്കും.
രാജ്യത്തെ സ്വകാര്യ കമ്പനികൾ സ്വദേശിവൽക്കരണ നിയമം കൃത്യമായി പാലിക്കുന്നുവെന്ന് ഉറപ്പാക്കാന്‍ പതിവായി പരിശോധനകള്‍ നടത്തിവരുന്നതായി മന്ത്രാലയം അറിയിച്ചു. 2022 പകുതി മുതല്‍ ഈ വര്‍ഷം മെയ് 16 വരെ എമിറേറ്റൈസേഷന്‍ നിയമങ്ങള്‍ ലംഘിച്ചതിന് 1,300-ലധികം കമ്പനികൾക്കെതിരെ നടപടി സ്വീകരിച്ചു.
രാജ്യത്തെ സ്വകാര്യ മേഖലയില്‍ സ്വദേശികളുടെ തൊഴിലവസരം വര്‍ധിപ്പിക്കാന്‍ ലക്ഷ്യമിട്ടുള്ള ഫെഡറല്‍ സംരംഭമായ നഫീസ് പദ്ധതി സര്‍ക്കാര്‍ ആരംഭിച്ച 2021 സെപ്തംബര്‍ മുതല്‍ സ്വകാര്യ മേഖലയിലെ മൊത്തം സ്വദേശി ജീവനക്കാരുടെ എണ്ണം ഏകദേശം 170 ശതമാനം എന്ന നിരക്കില്‍ വര്‍ധിച്ചു.
എമിറേറ്റൈസേഷന്‍ ലക്ഷ്യങ്ങളില്‍ കുറവുള്ള കമ്പനികള്‍ക്ക് നാഫിസ് പ്ലാറ്റ്ഫോമില്‍ നിന്ന് പ്രയോജനം നേടാം, വിവിധ സ്‌പെഷ്യലൈസേഷനുകളില്‍ തൊഴില്‍ തേടുന്ന യോഗ്യതയുള്ള സ്വദേശികളെ കുറിച്ചുള്ള വിവരങ്ങൾ പ്ലാറ്റ്ഫോമിൽ ലഭ്യമാണെന്നും അധികൃതർ അറിയിച്ചു.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല