സ്വന്തം ലേഖകൻ: ഗൂഗിള്‍ ഒടുവില്‍, സ്ട്രീറ്റ് വ്യൂ ഫീച്ചര്‍ ഇന്ത്യയിലും (Google Street View India) ആരംഭിച്ചു. ഗൂഗിള്‍ മാപ്സ്-ന്റെ സ്ട്രീറ്റ് വ്യൂ ഫീച്ചറില്‍ ആദ്യ ഘട്ടത്തില്‍ ഇന്ത്യയിലെ പത്ത് നഗരങ്ങളാണ് കാണാന്‍ സാധിക്കുക. ഗൂഗിളിന്റെ ഈ ഫീച്ചര്‍ ആരംഭിച്ച് 15 വര്‍ഷങ്ങള്‍ക്ക് ശേഷമാണ് രാജ്യത്ത് എത്തുന്നത്. സുരക്ഷാ കാരണങ്ങളാലായിരുന്നു സ്ട്രീറ്റ് വ്യൂവിന് ഇന്ത്യയില്‍ അനുമതി നല്‍കാതിരുന്നത്. ഇപ്പോള്‍ പുതിയ സ്ട്രീറ്റ് വ്യൂ ഇന്ത്യ ഫീച്ചര്‍ ഗൂഗിള്‍ മാപ്പില്‍ ലഭ്യമാണ്. എങ്കിലും പരീക്ഷണാടിസ്ഥാനത്തില്‍ ബാംഗ്ലൂര്‍ നഗരം മാത്രമായിരിക്കും ഇപ്പോള്‍ കാണാന്‍ സാധിക്കുക.
ഉടനെ തന്നെ ഹൈദരാബാദിലേക്കും പിന്നീട് കൊല്‍ക്കത്തയിലേക്കും ഫീച്ചര്‍ വ്യാപിപ്പിക്കും. അതിനുശേഷം അധികം താമസിയാതെ, ചെന്നൈ, ഡല്‍ഹി, മുംബൈ, പൂനെ, നാസിക്, വഡോദര, അഹമ്മദ്നഗര്‍, അമൃത്സര്‍ തുടങ്ങിയ നഗരങ്ങളിലേക്ക് സ്ട്രീറ്റ് വ്യൂ വ്യാപിപ്പിക്കും. ഈ നഗരങ്ങളിലെ ഏകദേശം 1,50,000 കിലോമീറ്ററിലധികം പ്രദേശങ്ങള്‍ സ്ട്രീറ്റ് വ്യൂ കവര്‍ ചെയ്യുമെന്നാണ് പ്രതീക്ഷിക്കുന്നത്. 2022 അവസാനത്തോടെ രാജ്യത്തെ 50-ലധികം നഗരങ്ങളിലേക്ക് സ്ട്രീറ്റ് വ്യൂ ഫീച്ചര്‍ അവതരിപ്പിക്കുമെന്ന് ഗൂഗിള്‍ വാഗ്ദാനം ചെയ്യുന്നു.
ഗൂഗിള്‍ സ്ട്രീറ്റ് വ്യൂ ഫീച്ചറിലൂടെ ആളുകളെ ഇപ്പോള്‍ വീട്ടിലിരുന്ന് ഇന്ത്യയിലെ ലാന്‍ഡ്മാര്‍ക്കുകള്‍/ ടൂറിസ്റ്റ് കേന്ദ്രങ്ങള്‍ വിര്‍ച്വലായി പര്യവേക്ഷണം ചെയ്യാനും, സ്ഥലങ്ങള്‍, റെസ്റ്റോറന്റുകള്‍, സ്ഥാപനങ്ങള്‍ എന്നിവ എളുപ്പത്തില്‍ കണ്ടുപിടിക്കുവാനും സഹായിക്കും. പ്രാദേശിക ട്രാഫിക് അധികാരികളുടെ പങ്കാളിത്തത്തോടെ റോഡിലൂടെ സഞ്ചരിക്കേണ്ട വേഗ പരിധി, റോഡ് അടച്ചുപൂട്ടല്‍, ട്രാഫിക്ക് ബ്ലോക്ക് ഉള്‍പ്പടെയുള്ള മറ്റ് തടസ്സങ്ങള്‍ എന്നിവ സംബന്ധിച്ച വിവരങ്ങള്‍ കൃത്യമായി അറിയിക്കാനും ഇതില്‍ സംവിധാനമുണ്ട്.
ഇതുമാത്രല്ല രാജ്യത്തെ നഗരങ്ങളിലെ വായു ഗുണനിലവാര വിവരങ്ങളും ഇതിലൂടെ അറിയാം. വായു ഗുണനിലവാര വിവരങ്ങള്‍ നല്‍കുന്നതിന് കേന്ദ്ര മലിനീകരണ നിയന്ത്രണ ബോര്‍ഡുമായി (സിപിസിബി) ഗൂഗിള്‍ മാപ്പ് സഹകരിച്ച് പ്രവര്‍ത്തിക്കുന്നുണ്ട്. ഗൂഗിള്‍ മാപ്സ് ആപ്പില്‍ പ്രവേശിച്ച് വലതുഭാഗത്തുള്ള ലെയര്‍ ബട്ടണില്‍ ടച്ച് ചെയ്ത്, അതില്‍ എയര്‍ ക്വാളിറ്റി ഓപ്ഷന്‍ തിരഞ്ഞെടുത്ത് രാജ്യത്തെ ഓരോ പ്രദേശത്തിന്റെയും വായുവിന്റെ ഗുണനിലവാരം മനസ്സിലാക്കാന്‍ സാധിക്കും.
സ്ട്രീറ്റ് വ്യൂ ഫീച്ചര്‍ ആക്‌സസ് ചെയ്യുന്നത് വളരെ എളുപ്പമാണ്. ഗൂഗിള്‍ മാപ്സ് ആപ്പ് തുറന്ന് ലൊക്കേഷന്റെ പേര് ടൈപ്പ് ചെയ്ത് തിരയുക. തുടര്‍ന്ന് സ്ട്രീറ്റ് വ്യൂ കാഴ്ചകള്‍ക്കായി സ്‌ക്രീനിന്റെ അടിയില്‍ തെളിയുന്ന ഐക്കണില്‍ ക്ലിക്ക് ചെയ്താല്‍ മാത്രം മതി. പ്രാദേശിക കഫേകളും സാംസ്‌കാരിക കേന്ദ്രങ്ങളും ഹോട്ട്സ്പോട്ടുകളും ഒക്കെ സ്ട്രീറ്റ് വ്യൂവിലൂടെ അനുഭവിക്കാന്‍ സാധിക്കും. ഫോണില്‍ നിന്നോ കമ്പ്യൂട്ടറില്‍ നിന്നോ, ലോകത്തിന്റെ ഏതു കോണുകളും ഇതിലൂടെ നാവിഗേറ്റ് ചെയ്യാനും പര്യവേക്ഷണം ചെയ്യാനും സാധിക്കും.
മാപ്പിംഗ് സൊല്യൂഷന്‍സ് രംഗത്ത് പ്രശസ്ത കമ്പനിയായ ജെനസിസ് ഇന്റര്‍നാഷണലിന്റെയും, ഡിജിറ്റല്‍ ട്രാന്‍സ്ഫോര്‍മേഷന്‍, കണ്‍സള്‍ട്ടിംഗ്, ബിസിനസ് റീ-എന്‍ജിനീയറിംഗ് സേവനങ്ങളുടെയും പരിഹാരങ്ങളുടെയും മുന്‍നിര ദാതാവായ ടെക് മഹീന്ദ്രയുടെയും പങ്കാളിത്തത്തോടെയാണ് ഗൂഗിള്‍ രാജ്യത്തെ സ്ട്രീറ്റ് വ്യൂ ഫീച്ചര്‍ ഒരുക്കുന്നത്. ഇത് ആദ്യമായാണ് ഗൂഗിള്‍ സ്ട്രീറ്റ് വ്യൂ പ്രാദേശിക പങ്കാളികളുടെ മാത്രം സഹകരണത്തോടെ പൂര്‍ണ്ണമായും പ്രവര്‍ത്തിക്കുന്നത്.
ആല്‍ഫബെറ്റ്-ന്റെ കീഴിലുള്ള ഗൂഗിളിന്റെ ഒരു വെബ് മാപ്പിങ്ങ് സേവനമാണ് ഗൂഗിള്‍ മാപ്സ്. ഗൂഗിള്‍ മാപ്സ് നല്‍കുന്ന ഒരു ഫീച്ചറാണ് ഗൂഗിള്‍ സ്ട്രീറ്റ് വ്യൂ. ഗൂഗിള്‍ സ്ട്രീറ്റ് വ്യൂവിലൂടെ ലോകത്തിലെ ഒട്ടുമിക്ക പ്രദേശങ്ങളുടെയും പ്രധാനമായും തെരുവുകളുടെ 360 ഡിഗ്രിയിലുള്ള ദൃശ്യങ്ങള്‍ കമ്പ്യൂട്ടര്‍/സ്മാര്‍ട്ട് ഫോണില്‍ കാണുവാന്‍ സാധിക്കുന്നതാണ്. 2007-ല്‍ അമേരിക്കയിലാണ് ഗൂഗിള്‍ സ്ട്രീറ്റ് വ്യൂവിന് തുടക്കമിട്ടത്. ഇന്ന് നൂറിലധികം രാജ്യങ്ങളിലെ പ്രദേശങ്ങള്‍ ഗൂഗിള്‍ സ്ട്രീറ്റ് വ്യൂവിലൂടെ ഫീച്ചര്‍ ചെയ്യപ്പെടുന്നു.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല