1 $ = 0 INR
1 € = 0  INR
AssociationSpiritualEntertainmentFamily & KidsImmigrationGreetingsCookeryClassifieds
Posted By: Nri Malayalee June 23, 2022

സ്വന്തം ലേഖകൻ: ഭരണ പ്രതിസന്ധി തുടരുന്ന കുവൈത്തില്‍ പാര്‍ലമെന്റ് പിരിച്ചുവിടാനുള്ള തീരുമാനവുമായി അമീര്‍ ഷെയ്ഖ് നവാഫ് അല്‍ അഹമ്മദ് അല്‍ സബാഹ്. ഇതുമായി ബന്ധപ്പെട്ട പ്രഖ്യാപനം അമീറിന് വേണ്ടി കിരീടാവകാശിയും ഡെപ്യൂട്ടി അമീറുമായ ഷെയ്ഖ് മിശ്അല്‍ അല്‍ അഹ്മദ് അല്‍ ജാബിര്‍ അല്‍ സബാഹാണ് രാജ്യത്തോട് പ്രഖ്യാപിച്ചത്. പാര്‍ലമെന്റ് പിരിച്ചു വിട്ട് അടുത്ത മാസങ്ങളില്‍ തന്നെ തെരഞ്ഞെടുപ്പിനെ നേരിടാനാണ് തീരുമാനമെന്ന് രാഷ്ട്രത്തോട് അഭിസംബോധന ചെയ്ത് കിരീടാവകാശി അറിയിച്ചു.

ഭരണാധികാരികളും പാര്‍ലമെന്റും തമ്മില്‍ ഏറെക്കാലമായി നിലനില്‍ക്കുന്ന ഭിന്നത രൂക്ഷമായ സാഹചര്യത്തിലാണ് അമീറിന്റെ നടപടി. രാജ്യത്തെ രാഷ്ട്രീയ അനിശ്ചിതാവസ്ഥയുമായി ബന്ധപ്പെട്ട് കൈക്കൊള്ളുന്ന തീരുമാനങ്ങളെ കുറിച്ച് രാജ്യത്തോട് സംസാരിക്കാന്‍ കിരീടാവകാശിയും ഡെപ്യൂട്ടി അമീറുമായ ശെയ്ഖ് മിശ്അല്‍ അല്‍ അഹ്മദ് അല്‍ ജാബിര്‍ അല്‍ സബാഹിനെ അദ്ദേഹം ചുമതലപ്പെടുത്തുകയായിരുന്നു.

ടെലിവിഷനിലൂടെയാണ് കിരീടാവകാശി രാജ്യത്തെ അഭിസംബോധന ചെയ്തത്. പാര്‍ലമെന്റും ഗവണ്‍മെന്റും തമ്മിലുള്ള ഭിന്നതകള്‍ ചര്‍ച്ചയിലൂടെ പരിഹരിക്കാനുള്ള ശ്രമങ്ങള്‍ പരാജയപ്പെട്ട പശ്ചാത്തലത്തിലാണ് നാഷനല്‍ അസംബ്ലി പിരിച്ചുവിട്ട് തെരഞ്ഞെടുപ്പിനെ നേരിടാന്‍ അമീര്‍ ശെയ്ഖ് നവാഫ് അല്‍ അഹ്മദ് അല്‍ ജാബിര്‍ അല്‍ സബാഹ് സഭ തീരുമാനം കൈക്കൊണ്ടതെന്ന് കിരീടാവകാശി പറഞ്ഞു.

ഇത്തരമൊരു രാഷ്ട്രീയ പ്രതിസന്ധി നിലനില്‍ക്കുന്ന അവസ്ഥയില്‍ ഭരണഘടനാ നടപടി എന്ന നിലയിലാണ് പാര്‍ലമെന്റ് പിരിച്ചുവിട്ട് തെരഞ്ഞെടുപ്പിനെ നേരിടുന്നതെന്നും അദ്ദേഹം അറിയിച്ചു. രാജ്യത്തിന്റെ സുസ്ഥിരതയും പുരോഗതിയും ലക്ഷ്യം വെച്ചാണ് നടപടി. ഇതുമായി ബന്ധപ്പെട്ട ഉത്തരവ് വരുന്ന മാസങ്ങളില്‍ ഉണ്ടാകുമെന്നും അദ്ദേഹം പറഞ്ഞു.

കുവൈത്തിനെ ശരിയായ ജനാധിപത്യ പാതയിലേക്ക് തിരികെ കൊണ്ടുവരാന്‍ പാര്‍ലമെന്റിലേക്ക് ശരിയായ പ്രതിനിധികള്‍ തിരഞ്ഞെടുക്കപ്പെടേണ്ടതുണ്ട്. നിലവിലെ രാഷ്ട്രീയ അസ്ഥിരതയില്‍ നിന്ന് പുറത്തുകടക്കാനും പരസ്പര സംഘര്‍ഷങ്ങള്‍ക്ക് അന്ത്യം കുറിക്കാനും വ്യക്തിപരമായ താല്‍പര്യങ്ങള്‍ക്ക് മുന്‍തൂക്കം നല്‍കുന്ന നിലവിലെ പ്രവണത അവസാനിപ്പിക്കാനുമാണ് തങ്ങള്‍ ജനങ്ങളിലേക്ക് ഇറങ്ങുന്നതെന്നും അദ്ദേഹം കൂട്ടിച്ചേര്‍ത്തു.

പാര്‍ലമെന്റുമായുള്ള അഭിപ്രായ വ്യത്യാസങ്ങളെ തുടര്‍ന്ന് കുവൈത്ത് മന്ത്രിസഭ രണ്ടു മാസം മുമ്പ് രാജിവെച്ചിരുന്നു. 2019 മുതല്‍ പ്രധാനമന്ത്രി പദത്തില്‍ തുടരുന്ന ശെയ്ഖ് സബാഹ് അല്‍ ഖാലിദിനെതിരായ അവിശ്വാസ പ്രമേയത്തിന് മുന്നോടിയായായിരുന്നു നടപടി. അതേത്തുടര്‍ന്ന് ഇപ്പോള്‍ ഇടക്കാല പ്രധാന മന്ത്രിയുടെ നേതൃത്വത്തിലുള്ള താല്‍ക്കാലിക മന്ത്രിസഭയാണ് രാജ്യത്ത് തുടരുന്നത്.

പുതിയ പ്രധാന മന്ത്രിയെ പ്രഖ്യാപിക്കണമെന്ന് ആവശ്യപ്പെട്ട് എംപിമാര്‍ പാര്‍ലമെന്റില്‍ പ്രതിഷേധം തുടരുന്ന പശ്ചാത്തലത്തിലാണ് പാര്‍ലമെന്റ് പിരിച്ചുവിടാന്‍ അമീര്‍ തീരുമാനം കൈക്കൊണ്ടത്. 2020 നവംബറിലാണ് രാജ്യത്തു അവസാനമായി പൊതു തെരഞ്ഞെടുപ്പ് നടന്നത്. ഇതിനു ശേഷം മൂന്നു തവണ മന്ത്രിസഭ രാജിവെക്കേണ്ടി വന്നിരുന്നു. പാര്‍ലമെന്റും ഗവണ്‍മെന്റും തമ്മിലുള്ള ബന്ധം നന്നാക്കുന്നതിനായി അമീറിന്റെ ആഭിമുഖ്യത്തില്‍ ദേശീയ സംവാദം നടത്തിയിരുന്നു. എന്നാല്‍ അതുകൊണ്ടും പ്രശ്നങ്ങള്‍ക്ക് പരിഹാരം കണ്ടെത്താന്‍ സാധിച്ചിരുന്നില്ല.

കുവൈത്തില്‍ രാഷ്ട്രീയ പാര്‍ട്ടികള്‍ ഇല്ലെങ്കിലും മറ്റ് ഗള്‍ഫ് രാജ്യങ്ങളെ അപേക്ഷിച്ച് ജനകീയമായി തെരഞ്ഞെടുക്കപ്പെടുന്ന പാര്‍ലമെന്റിന് വലിയ അധികാരങ്ങളുണ്ട്. നിയമം നിര്‍മിക്കാനും നിയമങ്ങള്‍ വേണ്ടെന്നു വയ്ക്കാനും മന്ത്രിമാരെ ചോദ്യം ചെയ്യാനും അവിശ്വാസ പ്രമേയം കൊണ്ടുവരാനും ഉള്‍പ്പെടെയുള്ള അധികാരങ്ങള്‍ പാര്‍ലമെന്റിനുണ്ട്.

പാര്‍ലമെന്റും ഗവണ്‍മെന്റും തമ്മില്‍ എതിര്‍ ചേരിയിലായതോടെ രാജ്യത്ത് വര്‍ഷങ്ങളായി രാഷ്ട്രീയ പ്രതിസന്ധി തുടരുന്ന സ്ഥിതിയാണ്. ഇത് അവസാനിപ്പിക്കുക എന്ന ലക്ഷ്യത്തോടെയാണ് അമീര്‍ പാര്‍ലമെന്റ് പിരിച്ചുവിട്ട് പുതിയ തെരഞ്ഞെടുപ്പിലേക്ക് നീങ്ങുന്നത്.

നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക

ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല