സ്വന്തം ലേഖകൻ: കുവൈത്തില്‍ തൊഴില്‍ വിപണിയില്‍ കൂടുതല്‍ നിയന്ത്രണങ്ങള്‍ ഏര്‍പ്പെടുത്തുകയും തൊഴില്‍ തട്ടിപ്പുകള്‍ തടയുകയും ചെയ്യുന്നതിന്റെ ഭാഗമായി പ്രവാസി ജീവനക്കാര്‍ക്കിടയില്‍ സ്മാര്‍ട്ട് എംപ്ലോയീസ് ഐഡി പുറത്തിറക്കിയതായി കുവൈത്ത് മാന്‍പവര്‍ പബ്ലിക് അതോറിറ്റി അറിയിച്ചു. കുവൈത്ത് മൊബൈല്‍ ഐഡി വഴിയാണ് സ്മാര്‍ട്ട് എംപ്ലോയീസ് ഐഡി ലഭ്യമാവുക. മൊബൈല്‍ ഐഡിയില്‍ ലോഗിന്‍ ചെയ്തതിന് ശേഷം വാലറ്റില്‍ ക്ലിക്ക് ചെയ്ത് സ്മാര്‍ട്ട് എംപ്ലോയീസ് ഐഡി ഇന്‍സ്റ്റാള്‍ ചെയ്യാമെന്നും അധികൃതര്‍ വ്യക്തമാക്കി. ജീവനക്കാരുടെ ഔദ്യോഗിക വിവരങ്ങള്‍ അടങ്ങിയതായിരിക്കും സ്മാര്‍ട്ട് ഐഡി.
കുവൈത്ത് ഉപപ്രധാനമന്ത്രിയും ആഭ്യന്തര മന്ത്രിയുമായ ശെയ്ഖ് തലാല്‍ ഖാലിദ് അല്‍ അഹമ്മദ് അസ്സബാഹിന്റെ പ്രത്യേക നിര്‍ദ്ദേശ പ്രകാരമാണ് പുതിയ തീരുമാനം നടപ്പിലാക്കിയതെന്ന് പബ്ലിക് അതോറിറ്റി ഓഫ് മാന്‍പവര്‍ അധികൃതര്‍ പറഞ്ഞു. കുവൈത്ത് കുടുംബങ്ങളെയും തൊഴിലാളികളെയും ചൂഷണത്തില്‍ നിന്ന് സംരക്ഷിക്കുകയെന്ന ലക്ഷ്യത്തോടെയാണ് പുതിയ പദ്ധതി നടപ്പിലാക്കിയതെന്നും അധികൃതര്‍ അറിയിച്ചു.
സ്മാര്‍ട്ട് എംപ്ലോയീസ് ഐഡിയില്‍ തൊഴിലാളിയുടെ നിയമപരമായ സ്റ്റാറ്റസ്, വര്‍ക്ക് പെര്‍മിറ്റ് ഡാറ്റ, ജോലി ചെയ്യുന്ന കമ്പനിയുടെ വിവരങ്ങള്‍, പൊതുമേഖലയിലോ സ്വകാര്യ മേഖലകയിലോ ജോലി ചെയ്യുന്നത് തുടങ്ങിയ പ്രവാസി തൊഴിലാളിയുമായി ബന്ധപ്പെട്ട എല്ലാ വിവരങ്ങളും ഉള്‍പ്പെടുത്തിയിട്ടുണ്ട്. ഈ വിവരങ്ങള്‍ എളുപ്പത്തില്‍ അറിയവാനും ഇതിലൂടെ സാധിക്കും.
സ്മാര്‍ട്ട് എംപ്ലോയീസ് ഐഡിയില്‍ ക്രമീകരിച്ചിരിക്കുന്ന ക്യുആര്‍ കോഡ് സ്‌കാന്‍ ചെയ്തും തൊഴിലാളികളുമായും തൊഴില്‍ സ്ഥാപനവുമായും ബന്ധപ്പെട്ട മുഴുവന്‍ വിവരങ്ങളും പരിശോധിക്കാനും കഴിയും. രാജ്യത്ത് നിയമം ലംഘിച്ച് തൊഴില്‍ എടുക്കുന്നവരെയും റിക്രൂട്ട് ചെയ്ത തൊഴിലുകളില്‍ അല്ലാതെ ജോലി ചെയ്യുന്നവരെയും വീസ കാലാവധി കഴിഞ്ഞും രാജ്യത്ത് തങ്ങുന്നവരെയും കണ്ടെത്തുന്നതിന്റെ ഭാഗമായി കൂടിയാണ് പബ്ലിക് അതോറിറ്റി ഓഫ് മാന്‍പവര്‍ പുതിയ എംപ്ലോയീസ് ഐഡി കൊണ്ടുവന്നിരിക്കുന്നത്.
അതിനിടെ, ഗള്‍ഫ് ലേബര്‍ ഗൈഡ് അനുസരിച്ച് ജീവനക്കാരെ അവരുടെ തസ്തികകള്‍ അനുസരിച്ചുള്ള ജോലികള്‍ക്ക് നിയോഗിക്കണമെന്നും തൊഴില്‍ നിയമങ്ങളുടെ ലംഘനങ്ങള്‍ ഒഴിവാക്കണമെന്നും സ്വകാര്യ മേഖലയിലെ കമ്പനികളോട് മാന്‍പവര്‍ പബ്ലിക് അതോറിറ്റി ആവശ്യപ്പെട്ടു.
രാജ്യത്തേക്കെത്തുന്ന വിദേശികളുടെ പ്രവേശന നടപടികള്‍ സുതാര്യവും കാര്യക്ഷമവുമാക്കുക വഴി വ്യാജ വീസകളും വീസ കച്ചവടവും തടയുക എന്ന ലക്ഷ്യത്തോടെ കുവൈത്ത് അഭ്യന്തര മന്ത്രാലയം കഴിഞ്ഞ മാസം കുവൈത്ത് വീസ ആപ്പ് പദ്ധതി നടപ്പിലാക്കിയിരുന്നു. രാജ്യത്തേക്കുള്ള തൊഴിലാളികളുടെ പ്രവേശനം സുരക്ഷിതമാക്കുന്നതിനും നിയന്ത്രിക്കുന്നതിനുമാണ് കുവൈത്ത് വീസ ആപ്പ് എന്ന പേരിലുള്ള മൊബൈല്‍ ആപ്ലിക്കേഷന്‍ പുറത്തിറക്കിയിരിക്കിയത്.
കുവൈത്തിലേക്ക് പുതുതായി വരുന്ന പ്രവാസികള്‍ക്ക് രാജ്യത്തേക്ക് പ്രവേശിക്കുന്നതിന് മുമ്പായി എന്‍ട്രി വീസയുടെ സാധുത ഉറപ്പ് വരുത്താന്‍ സാധിക്കും. ഈയിടെ രാജ്യത്തെ ജനസംഖ്യാ അസന്തുലിതാവസ്ഥ പരിഹരിക്കാന്‍ സര്‍ക്കാര്‍ രൂപവത്കരിച്ച ‘ജനസംഖ്യാശാസ്ത്രവും തൊഴില്‍ വിപണി വികസനവും’ എന്ന സമിതിയുടെ ശുപാര്‍ശ പ്രകാരമാണ് പുതിയ തീരുമാനങ്ങള്‍.
പുതിയ ഡിജിറ്റല്‍ ആപ്ലിക്കേഷന്‍ സംവിധാനം വരുന്നതോടെ വ്യാജ രേഖകള്‍ ഉപയോഗിച്ച് രാജ്യത്തേക്ക് വരുന്നവരെയും വ്യാജ വീസകള്‍ വഴി രാജ്യത്തെത്തുന്നവരെയും തടയാന്‍ സാധിക്കുമെന്നും അധികൃതര്‍ വ്യക്തമാക്കി. അതോടൊപ്പം ക്രിമിനല്‍ പശ്ചാത്തലങ്ങളോ പകര്‍ച്ചവ്യാധികളോ ഉള്ളവരുടെ പ്രവേശനം തടയുവാനും ഇതുവഴി സാധിക്കുമെന്നും അധികൃതര്‍ അറിയിച്ചു.
ഇതിന്റെ തുടര്‍ച്ചയെന്നോണമാണ് തൊഴിലാളിയുമായി ബന്ധപ്പെട്ട ഔദ്യോഗിക വിവരങ്ങള്‍ ഉള്‍പ്പെടുന്ന സ്മാര്‍ട്ട് എംപ്ലോയീസ് ഐഡി അവതരിപ്പിച്ചിരിക്കുന്നത്. രാജ്യത്ത് അനധികൃതമായി നിരവധി പേര്‍ തൊഴിലിനായി എത്തുകയും വീസ കാലാവധി കഴിഞ്ഞ് രാജ്യത്ത് നിന്ന് പുറത്തുപോവാതെ തൊഴിലെടുത്ത് ജീവിക്കുകയും ചെയ്യുന്നുവെന്ന ആരോപണം നിലനില്‍ക്കുന്നതിനിടെയാണ് പുതിയ സംവിധാനങ്ങളുമായി അധികൃതര്‍ രംഗത്തെത്തിയിരിക്കുന്നത്.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല