മറഡോണക്ക്​ വിട നൽകി ലോകം; ഫുട്ബോൾ ഇതിഹാസത്തിന്റെ അന്ത്യനിമിഷങ്ങൾ ഇങ്ങനെ…

സ്വന്തം ലേഖകൻ: അന്തരിച്ച ഫുട്​ബാൾ ഇതിഹാസം ഡീഗോ മറഡോണക്ക്​ വിട നൽകി ലോകം. ബ്വേനസ്​ എയ്​റീസിലെ ബെല്ല വീസ്​ത സെമിത്തേരിയിൽ അദ്ദേഹത്തിൻെറ സംസ്​കാര ചടങ്ങുകൾ നടന്നു. പൂർണ്ണ ഔദ്യോഗിക ബഹുമതികളോടെയായിരുന്നു സംസ്​കാരം. സംസ്​കാരചടങ്ങിൽ അടുത്ത ബന്ധുക്കളും സുഹൃത്തുക്കളുമാണ്​ പ​ങ്കെടുത്തത്​.

അവസാനമായി മറഡോണയെ ഒരു​ നോക്ക്​ കാണാൻ പതിനായിരങ്ങളാണ്​ തലസ്ഥാന നഗരമായ ബ്വേനസ്​ എയ്​റീസിലേക്ക്​ ഒഴുകിയെത്തിയത്​. പ്രസിഡൻഷ്യൽ പാലസിലായിരുന്നു പൊതുദർശനം. മറഡോണയെ അവസാനമായി കാണാനെത്തിയ ആളുകളുടെ നിര കിലോ മീറ്ററുകൾ നീണ്ടു. മറഡോണയുടെ മരണത്തെ തുടർന്ന്​ അർജൻറീനയിൽ മൂന്ന്​ ദിവസത്തെ ദുഃഖാചരണം തുടരുകയാണ്​.

ബുധനാഴ്ച സ്വവസതിയില്‍ പ്രാദേശിക സമയം രാവിലെ 11.30 ഓടെയായിരുന്നു ഫുട്‌ബോള്‍ ഇതിഹാസത്തി​െൻറ അന്ത്യം. തലച്ചോറിലെ രക്​തസ്രവത്തെ തുടർന്ന്​ ചികിത്സയിലായിരുന്ന 60 കാരനായ മറഡോണ രണ്ടാഴ്​ച മുമ്പായിരുന്നു ആശുപത്രി വിട്ടിരുന്നത്​. വീട്ടിൽ വിശ്രമത്തിലിരിക്കെ ഹൃദയാഘാതം സംഭവിക്കുകയായിരുന്നു.

തലച്ചോറിൽ രക്​തം കട്ടപിടിച്ചതിനെ തുടർന്ന്​ നവംബർ മൂന്നിന്​ ശസ്​ത്രക്രിയക്ക്​ വിധേയനായ ശേഷം ഡീഗോ മറഡോണയുടെ ആരോഗ്യം മെച്ചപ്പെട്ടു വരികയായിരുന്നുവെന്ന്​ അദ്ദേഹവുമായി അടുത്ത വൃത്തങ്ങൾ വ്യക്​തമാക്കി. ശസ്​ത്രക്രിയക്കുശേഷം നവംബർ 25ന്​ മരണത്തിന്​ കീഴടങ്ങുന്നതുവരെയുള്ള ദിവസങ്ങളിൽ ആരോഗ്യനിലയിലെ പുരോഗതി ഏറെ പ്രതീക്ഷ നൽകിയിരുന്നു. ഡീഗോ സാധാരണ ജീവിതത്തിലേക്ക്​ തിരിച്ചുവരുമെന്ന്​ ഡോക്​ടർമാരടക്കം പ്രതീക്ഷിച്ചിരിക്കേയാണ്​ ലോകത്തെ ഞെട്ടിച്ച്​ ഇതിഹാസതാരം പൊടുന്നനെ മരണത്തിന്​ കീഴടങ്ങിയത്​.

തലച്ചോറിലെ ട്യൂമറുമായി ബന്ധപ്പെട്ട പ്രശ്​നങ്ങളല്ല ഡീഗോയുടെ മരണത്തിലേക്ക്​ നയിച്ചത്​. ഹൃദയാഘാതത്തെ തുടർന്നാണ്​ ​അന്ത്യം. മരണത്തി​െൻറ യഥാർഥ കാരണം ഇതുവരെ വ്യക്​തമായിട്ടില്ല. ആശുപത്രിയിൽ​നിന്ന്​​ ശസ്​ത്രക്രിയ കഴിഞ്ഞ്​ ​സാൻ ആന്ദ്രേയിലെ വീട്ടിൽ തിരിച്ചെത്തിയതായിരുന്നു ​അദ്ദേഹം. ആരോഗ്യം കാക്കാൻ വീട്ടിലെ ഒരു മുറിയിൽ സജ്ജീകരണങ്ങൾ ഏർപ്പെട​ുത്തിയിരുന്നു.

നവംബർ 25 ബുധനാഴ്​ച 10.00 മണി

സാധാരണയേക്കാൾ നേരത്തേ, മറഡോണ ഉണർന്നെഴുന്നേൽക്കുന്നു. കുറച്ചുനേരം നടന്നശേഷം പിന്നീട്​ വീണ്ടും കിടക്കുന്നു. അടുത്തുള്ളത്​ പതിവ്​ ആളുകൾ തന്നെ​. വലംകൈയായ മാക്​സി, അഭിഭാഷകൻ, മരുമകൻ ജോണി, പി​െന്ന വേലക്കാരനും.

ഏകദേശം 12.00 മണി

മറഡോണ കിടക്കുന്നു. നഴ്​സും സൈക്കോളജിസ്​റ്റും അദ്ദേഹത്തിനരികെയുണ്ട്​. അവരുടെ ചികിത്സകളോട്​ അദ്ദേഹം പ്രതികരിക്കുന്നില്ല. അപായ സൂചനകളുയരുന്നു. ക്ലാരിൻ ദിനപത്രം അദ്ദേഹത്തി​െൻറ മോശം അവസ്​ഥയെക്കുറിച്ച്​ വാർത്ത പുറത്തെത്തിക്കുന്നു.

ആംബുലൻസുകൾ​ എത്തുന്നു

മരുന്നുകളോട്​ ഡീഗോ പ്രതികരിക്കുന്നില്ല. ആർക്കും ഒന്നും ചെയ്യാനും കഴിയുന്നില്ല. അദ്ദേഹത്തി​െൻറ മക്കളായ ഡാൽമ, ജിയാനിന, ജാന എന്നിവർ ബ്വേനസ്​ എയ്​റിസിലാണ്​ താമസിക്കുന്നത്​. അഞ്ച്​ ആംബുലൻസുകൾ എത്തുന്നു. അദ്ദേഹത്തി​െൻറ ബോധം വീണ്ടെടുക്കാനുള്ള ശ്രമങ്ങളാണ്​ മെഡിക്കൽ സംഘം നടത്തുന്നത്​. ശ്വാസകോശത്തിലെ നീർക്കെട്ടുകാരണമുണ്ടായ ഹൃദയാഘാതമാണ്​ പ്രശ്​നമായതെന്ന്​ അവർ സൂചന നൽകി. ഒടുവിൽ ശ്രമങ്ങളെല്ലാം പരാജയപ്പെട്ടു. പൊടുന്നനെ ശാന്തനായി, സമാധാനത്തോടെ ഇതിഹാസതാരം നിത്യനിദ്ര പൂകി.

മരിക്കുന്നതിന്​ തൊട്ടു മുമ്പുള്ള ദിവസം

വീട്ടിൽ ഡീഗോ ശാന്തമായ അന്തരീക്ഷത്തിലായിരുന്നു. അ​േദഹത്തി​െൻറ ഡോക്​ടർ ലിയോപോൾഡോ ലൂക്ക്​ അസുഖമെല്ലാം ഭേദമായി ഇതിഹാസതാരം തിരിച്ചെത്തുമെന്ന ശുഭാപ്​തി വിശ്വാസമാണ്​ പങ്കുവെച്ചത്​. ആരോഗ്യം വീണ്ടെടുക്കാനുള്ള പ്രവർത്തനങ്ങൾ ഡോക്​ടർ നിർദേശിച്ചിരു​ന്നു. ജിംനേഷ്യത്തിലേക്ക് മടങ്ങാനും അദ്ദേഹം ആഗ്രഹിച്ചിരുന്നു.