സ്വന്തം ലേഖകൻ: ഒമാനില്‍ ഈയിടെ കണ്ടെത്തിയ കോവിഡ് കേസുകളില്‍ 99 % വും ഒമിക്രോണ്‍ വകഭേദമാണെന്ന് പ്രാദേശിക മാധ്യമം റിപ്പോര്‍ട്ട് ചെയ്തു. ഏറ്റവും പുതിയ കണക്കുകളും ലാബ് പരിശോധനാ ഫലങ്ങളും അനുസരിച്ച്, സുല്‍ത്താനേറ്റില്‍ അടുത്തിടെ രജിസ്റ്റര്‍ ചെയ്ത കോവിഡ് കേസുകളില്‍ 99 ശതമാനവും ഒമിക്രോണ്‍ ആണെന്ന് ആരോഗ്യമന്ത്രാലയത്തിലെ പ്രിവന്‍ഷന്‍ ആന്റ് ഇന്‍ഫെക്ഷന്‍ കണ്‍ട്രോള്‍ വകുപ്പ് ഡയറക്ടര്‍ ഡോ. അമല്‍ ബിന്‍ത് സെയ്ഫല്‍ മാനി പറഞ്ഞു.
ഒമാനില്‍ രജിസ്റ്റര്‍ ചെയ്യുന്ന കോവിഡ് രോഗബാധയുടെ എണ്ണം ഉയരുകയാണ്. ഇനിയും കോവിഡ് കേസുകള്‍ ഉയരാനാണ് സാധ്യതയെന്ന് മാനി കൂട്ടിച്ചേര്‍ത്തു. ‘മുമ്പത്തെ തരംഗങ്ങളില്‍ നിന്ന് വ്യത്യസ്തമായി ചില ഗവര്‍ണറേറ്റുകളില്‍ രോഗബാധ ആരംഭിച്ചപ്പോള്‍ കേസുകള്‍ വ്യാപിച്ചത് ഒരേ സമയത്താണെന്നത് ശ്രദ്ധേയമാണ്. ചില ഗവര്‍ണറേറ്റുകളില്‍ രോഗലക്ഷണങ്ങള്‍ പ്രകടിപ്പിക്കുന്നവര്‍ 25 ശതമാനത്തിലെത്തി’, ഒമാന്‍ ടിവിക്ക് നല്‍കിയ അഭിമുഖത്തില്‍ ഡോ. അമല്‍ പറഞ്ഞു.
ബൂസ്റ്റര്‍ ഡോസ് എടുക്കുന്നത് രോഗത്തിന്റെ ഹിപ്‌നോസിസിന്റെയും സങ്കീര്‍ണതകള്‍ 80 ശതമാനം കുറയ്ക്കാന്‍ സഹായിക്കുമെന്ന് അവര്‍ ഊന്നിപ്പറഞ്ഞു. അതിനാല്‍ പ്രത്യേകിച്ച്, വിട്ടുമാറാത്ത രോഗങ്ങളാല്‍ ബുദ്ധിമുട്ടുന്നവരും 60 വയസ്സിന് മുകളിലുള്ളവരുമായവരോട് വാക്സിന് എടുക്കാന്‍ ആവശ്യപ്പെടുന്നു.
അതിനിടെ രാജ്യത്ത് കോവിഡ് കേസുകള്‍ ഉയരുന്ന പശ്ചാത്തലത്തില്‍ ഒമാന്‍ സുപ്രീം കമ്മിറ്റി കഴിഞ്ഞ ദിവസം പുതിയ കോവിഡ് നിബന്ധനകള്‍ പുറപ്പെടുവിച്ചു. സര്‍ക്കാര്‍ ഓഫിസുകളില്‍ 50 ശതമാനം ജീവനക്കാര്‍ മാത്രമായി കുറച്ചു. ബാക്കിയുള്ളവര്‍ വീട്ടിലിരുന്ന് ജോലി ചെയ്താല്‍ മതിയെന്ന് ഒമാന്‍ സുപ്രിം കമ്മിറ്റി അറിയിച്ചു.
നിയന്ത്രണങ്ങളുടെ ഭാഗമായി വെള്ളിയാഴ്ചകളിലെ ജുമുഅ നിസ്‌കാരം നിര്‍ത്തിവെച്ചു. മസ്ജിദുകളില്‍ അഞ്ച് നേരത്തെ നിസ്‌കാരം തുടരും. സര്‍ക്കാര്‍ ഓഫിസുകളില്‍ 50 ശതമാനം ജീവനക്കാര്‍ മാത്രമായി പരിമിതപ്പെടുത്തി. കൂടാതെ, സമ്മേളനങ്ങളും പ്രദര്‍ശനങ്ങളും മാറ്റിവയ്ക്കണമെന്നും സുപ്രിം കമ്മിറ്റി ഉത്തരവിറക്കി.
പള്ളികളിലും 50 ശതമാനം പേര്‍ക്ക് മാത്രമായിരിക്കും പ്രവേശനം നല്‍കുക. ഔഖാഫ് മതകാര്യ മന്ത്രാലയവും ആരോഗ്യ മന്ത്രാലയവും നിര്‍ദേശിച്ച മുഴുവന്‍ കോവിഡ് സുരക്ഷാ മാര്‍ഗനിര്‍ദേശങ്ങളും പൂര്‍ണമായും പാലിച്ചുകൊണ്ടായിരിക്കണം പ്രാര്‍ഥനകള്‍ അനുഷ്ഠിക്കേണ്ടത്.
കൂടാതെ, കോണ്‍ഫറന്‍സുകളും എക്സിബിഷനുകളും ഉള്‍പ്പെടെ പൊതു സ്വഭാവമുള്ള എല്ലാ പരിപാടികളും മാറ്റിവയ്ക്കണം. വാക്സിനേഷന്‍ സ്വീകരിച്ചതിന് രേഖ, സാമൂഹിക അകലം പാലിക്കല്‍, മാസ്‌ക് ധരിക്കല്‍ തുടങ്ങിയ ഉറപ്പുവരുത്തണം. ഇത്തരം പരിപാടികള്‍ നടത്തുകയാണെങ്കില്‍ കാഴ്ചക്കാരില്ലാതെ ആയിരിക്കണം. റസ്റ്ററന്റുകള്‍, കഫെകള്‍, കടകള്‍, മറ്റ് വാണിജ്യ കേന്ദ്രങ്ങള്‍ എന്നിവിടങ്ങളില്‍ 50 ശതമാനം പേര്‍ക്ക് മാത്രമായിരിക്കും പ്രവേശനം അനുവദിക്കുക.
രാജ്യത്തെ മുഴുവന്‍ ആളുകളും കോവിഡ് സുരക്ഷാ മാനദണ്ഡങ്ങള്‍ പൂര്‍ണമായും പാലിക്കണമെന്നും മുന്‍ഗണനാ വിഭാഗത്തില്‍ ഉള്‍പ്പെട്ടവര്‍ ബൂസ്റ്റര്‍ ഡോസ് വാക്സിന് സ്വീകരിക്കണമെന്നും സുപ്രിം കമ്മിറ്റി ആവശ്യപ്പെട്ടു. ഈ നിബന്ധനകള്‍ രണ്ടാഴ്ചത്തേയ്ക്ക് ബാധകമായിരിക്കും.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല