ഖ​ത്ത​ർ-​ബ​ഹ്റൈ​ൻ വി​മാ​ന സ​ർ​വി​സ് ഉടൻ പുനരാരംഭിക്കും; ഒരുക്കങ്ങൾ അവസാനഘട്ടത്തിൽ

സ്വന്തം ലേഖകൻ: ഖത്തർ-ബഹ്‌റൈൻ വിമാന സർവീസ് പുനരാരംഭിക്കാനുള്ള ചർച്ചകൾ നടക്കുന്നു. രണ്ട് രാജ്യങ്ങൾക്കുമിടയിൽ വ്യോമ ഗതാഗതം പുനരാരംഭിക്കുന്നത് സംബന്ധിച്ച ചര്‍ച്ചകള്‍ പുരോഗമിക്കുകയാണെന്ന് പ്രാദേശിക അറബ് പത്രമായ ‘അശ്ശർഖ്’ റിപ്പോര്‍ട്ട് ചെയ്യുന്നു.
ഏപ്രിൽ 12നാണ് ഇതുമായി ബന്ധപ്പെട്ട ചർച്ചകൾ രണ്ട് രാജ്യങ്ങൾക്കിടയിൽ നടന്നത്. റിയാദിൽ ആണ് ചർച്ചകൾ നടന്നത്. വർഷങ്ങൾ നീണ്ട ഭിന്നതകൾ പരിഹരിച്ച് രണ്ട് രാജ്യങ്ങളും തമ്മിലുള്ള നയതന്ത്ര ബന്ധം പുന:സ്ഥാപിക്കാൻ ആണ് ചർച്ചയിൽ ധാരണയായത്.

വിമാന സർവിസ് ആരംഭിക്കുന്നത് സംബന്ധിച്ച് ചർച്ചകൾ രണ്ട് രാജ്യങ്ങളിലും നടന്നു. അനുകൂലമായ പ്രതികരണമാണ് രണ്ട് രാജ്യങ്ങൾക്കിടയിൽ ഉണ്ടായിരിക്കുന്നതെന്ന് ബഹ്റൈൻ ഗതാഗത മന്ത്രി മുഹമ്മദ് അൽ കഅബി അറിയിച്ചു. പാർലമെന്‍റിനെ ആണ് അദ്ദേഹം ഇക്കാര്യം അറിയിച്ചത്. ഇതോടെ കാര്യങ്ങൾക്ക് ഒരു തീരുമാനം ആയി. അധികം വെെകാതെ ബഹ്റെെൻ- ഖത്തർ ആകാശയാത്ര തുറക്കും.

2017ൽ ഖത്തറിനെതിരെ പ്രഖ്യാപിച്ച ഗൾഫ് ഉപരോധത്തിന് ശേഷം ആണ് ബഹ്റെെൻ വ്യോമഗതാഗതം നിർത്തി വെച്ചത്. 2021ൽ സൗദിയിൽ നടന്ന അൽ ഉല ഉച്ചകോടിയിൽ ഉപരോധം അവസാനിപ്പിക്കാൻ തീരുമാനിച്ചു. വിവിധ രാജ്യങ്ങൾ ഖത്തറുമായും തിരിച്ചും ബന്ധം പുനഃസ്ഥാപിക്കുകയും ചെയ്തു. എന്നാൽ ഖത്തരും ബഹ്റൈനും തമ്മിലെ നയതന്ത്ര ബന്ധം പുനരാരംഭിച്ചിരുന്നില്ല. ബഹ്‌റൈൻ- ഖത്തർ വിമാന സർവീസുകൾ പുനരാരംഭിക്കുന്നത് ദോഹയിലെ പ്രവാസി മലയാളികൾക്കും ഗുണകരമാകും.

ബഹ്‌റൈൻ കിരീടാവകാശി പ്രിൻസ് സൽമാൻ അൽ ഖലീഫയും ഖത്തർ അമീറും തമ്മിൽ ടെലിഫോണിലും ചർച്ച നടത്തിയിരുന്നു. ഫെബ്രുവരിയിൽ ഇരു രാജ്യങ്ങളിലെയും വിദേശകാര്യ മന്ത്രിമാർ തമ്മിൽ കൂടിക്കാഴ്ച നടത്തിയിരുന്നു. സൗദി അറേബ്യ, യുഎഇ, ഈജിപ്ത് രാജ്യങ്ങളുമായുള്ള ബന്ധം ഖത്തർ പുന:സ്ഥാപിച്ചിട്ടുണ്ട്. ഈ രാജ്യങ്ങളിൽ വർഷങ്ങളായി അടഞ്ഞു കിടക്കുന്ന എംബസികൾ വീണ്ടും തുറക്കാൻ ഖത്തറും യുഎഇയും തീരുമാനിച്ചിട്ടുണ്ട്.

ഏതാനും ആഴ്ച മുമ്പ് റിയാദിലെ ജിസിസി ആസ്ഥാനത്ത് നടന്ന വിദേശകാര്യ മന്ത്രാലയ ഉദ്യോഗസ്ഥതലത്തിൽ നയതന്ത്രബന്ധം പുനഃസ്ഥാപിക്കാൻ തീരുമാനിക്കുകയായിരുന്നു. ഇതിന് പിന്നാലെയാണ് വിമാന യാത്രയും പുനരാരംഭിക്കാൻ വഴിയൊരുങ്ങിയത്. രണ്ട് രാജ്യങ്ങളും തമ്മിലുള്ള വിമാന സർവീസുകൽ തുടങ്ങിയാൽ ഖത്തർ എയർവേസ്, ഗൾഫ് എയർ എന്നിവയുടെ സർവീസ് ഈ രാജ്യങ്ങളിലേക്ക് കൂടും ഇത് മലയാളി പ്രവാസികൾക്ക് യാത്രക്ക് ഗുണകരമാവും.