സ്വന്തം ലേഖകൻ: റഷ്യന്‍ വിമാനങ്ങള്‍ക്ക് യുറോപ്യന്‍ യൂണിയന്‍ പൂര്‍ണവിലക്കേര്‍പ്പെടുത്തി. റഷ്യന്‍ ഉടമസ്ഥതയിലുള്ളതും റഷ്യയില്‍ റജിസ്റ്റര്‍ ചെയ്തതും റഷ്യന്‍ നിയന്ത്രണത്തിലുള്ളതുമായ എല്ലാ എയര്‍ക്രാഫ്റ്റുകള്‍ക്കും നിരോധനം ഏര്‍പ്പെടുത്തുന്നതായി യുറോപ്യന്‍ യൂണിയന്‍ കമ്മീഷന്‍ മേധാവി ഉര്‍സുല വോണ്‍ ഡെര്‍ ലെയ്ന്‍ അറിയിച്ചു. റഷ്യന്‍ മാധ്യമങ്ങള്‍ക്കും ഇയു രാജ്യങ്ങളില്‍ വിലക്കേര്‍പ്പെടുത്തും. സ്വകാര്യ ജെറ്റുകള്‍ ഉള്‍പ്പെടെയുള്ള എല്ലാ വിമാനങ്ങള്‍ക്കും ഏതെങ്കിലും യൂറോപ്യന്‍ യൂണിയന്‍ രാജ്യത്തിന് മുകളില്‍ ഇറങ്ങാനോ പറന്നുയരാനോ പറക്കാനോ കഴിയില്ല. യുകെ വ്യോമാതിര്‍ത്തിയില്‍ റഷ്യന്‍ വിമാനങ്ങള്‍ക്കു നേരത്തെ വിലക്കേര്‍പ്പെടുത്തിയിട്ടുണ്ട്.
റഷ്യയിലെ ഏറ്റവും വലിയ വിമാനക്കമ്പനിയായ എയ്‌റോഫ്ലോട്ട്, ഇനിയൊരു അറിയിപ്പ് ഉണ്ടാകുന്നതുവരെ യൂറോപ്യന്‍ ലക്ഷ്യസ്ഥാനങ്ങളിലേക്കുള്ള എല്ലാ വിമാനങ്ങളും റദ്ദാക്കുമെന്ന് അറിയിച്ചു. തീരുമാനത്തിന് മുന്നോടിയായി യൂറോപ്യന്‍ രാജ്യങ്ങള്‍ തങ്ങളുടെ വ്യോമാതിര്‍ത്തികള്‍ ഒന്നൊന്നായി അടച്ചിരുന്നു. വിലക്ക് മൂന്ന് മാസം നീണ്ടുനില്‍ക്കുമെന്ന് ജര്‍മ്മനി അറിയിച്ചു.
മോസ്കോയിലെ ഡൊമോഡെഡോവോ, ഷെറെമെറ്റീവോ വിമാനത്താവളങ്ങളിലെ പുറപ്പെടല്‍ ബോര്‍ഡുകള്‍ ഞായറാഴ്ച പാരീസ്, വിയന്ന, കലിനിന്‍ഗ്രാഡ് എന്നിവിടങ്ങളിലേക്കു ഉള്‍പ്പെടെ ഡസന്‍ കണക്കിന് വിമാനങ്ങള്‍ റദ്ദാക്കി. റഷ്യയുടെ എസ് 7 എയര്‍ലൈന്‍സ് കുറഞ്ഞത് മാര്‍ച്ച് 13 വരെ തങ്ങളുടെ പല യൂറോപ്യന്‍ ലക്ഷ്യസ്ഥാനങ്ങളിലേക്കുള്ള ഫ്ലൈറ്റുകള്‍ റദ്ദാക്കുമെന്ന് ഫേസ്ബുക്കില്‍ അറിയിച്ചു.
തങ്ങളുടെ വിമാനങ്ങള്‍ നിരോധിക്കുന്ന രാജ്യങ്ങള്‍ക്ക് ടിറ്റ് ഫോര്‍ ടാറ്റ് നിയന്ത്രണങ്ങളുമായി റഷ്യയും പ്രതികരിച്ചു. റഷ്യയുടെ അധിനിവേശത്തെത്തുടര്‍ന്ന് വാണിജ്യ എയര്‍ലൈനുകളും യുക്രയ്‌ന്‍, മോള്‍ഡോവ, ബെലാറസ് എന്നിവയ്ക്ക് ചുറ്റുമുള്ള വ്യോമാതിര്‍ത്തി ഒഴിവാക്കുകയാണ്. യുഎസില്‍, റഷ്യയുടെ എയറോഫ്ലോട്ടുമായുള്ള ഫ്ലൈറ്റ് ബുക്കിംഗ് കരാര്‍ താല്‍ക്കാലികമായി നിര്‍ത്തിവയ്ക്കുമെന്ന് ഡെല്‍റ്റ എയര്‍ലൈന്‍സ് അറിയിച്ചു.
വിര്‍ജിന്‍ അറ്റ്‌ലാന്റിക് പറഞ്ഞത് റഷ്യയെ ഒഴിവാക്കുന്നത് യുകെയ്ക്കും ഇന്ത്യയ്ക്കും പാകിസ്ഥാനും ഇടയിലുള്ള തങ്ങളുടെ വിമാനങ്ങള്‍ക്ക് 15 മിനിറ്റിനും ഒരു മണിക്കൂറിനും ഇടയില്‍ അധിക സമയം കൂട്ടും. റഷ്യയെ ഉപയോഗിക്കാതെ ഡാ ര്‍വിനും ലണ്ടനും തമ്മിലുള്ള നേരിട്ടുള്ള വിമാനത്തിനായി ദീ ര്‍ഘദൂര പാത ഉപയോഗിക്കുമെന്ന് ഓസ്‌ട്രേലിയന്‍ എയര്‍ലൈന്‍ ക്വാണ്ടാസ് പറഞ്ഞു.
അതിനിടെ ഉപരോധം കടുത്തതോടെ റഷ്യന്‍ കറന്‍സിയായ റൂബിളിന്‍റെ മൂല്യം കുത്തനെ ഇടിഞ്ഞു. യുക്രൈയ്ന് മേല്‍ റഷ്യന്‍ ആക്രമണം ശക്തമായി തുടരുന്ന സാഹചര്യത്തിലാണ് ഉപരോധം കടുപ്പിക്കാന്‍ അമേരിക്കയും യൂറോപ്പ്യന്‍ യൂണിയനും തീരുമാനിച്ചത്. ആക്രമണത്തെ നേരിടാന്‍ യുക്രൈയ്ന് പോര്‍വിമാനങ്ങളും ആയുധങ്ങളും നല്‍കും. 570 മില്യണ്‍ ഡോളറിന്‍റെ ആയുധങ്ങളാണ് യുക്രൈയ്ന് നല്‍കുക.
ആദ്യമായാണ് ഏതെങ്കിലുമൊരു രാജ്യത്തിന് ആയുധം നല്‍കാന്‍ യൂറോപ്പ്യന്‍ യൂണിയന്‍ തീരുമാനമെടുക്കുന്നത്. റഷ്യന്‍ മാധ്യമങ്ങള്‍ക്കും ഇ.യു രാജ്യങ്ങളില്‍ വിലക്കേര്‍പ്പെടുത്തും. യുക്രൈയ്ന് സൈനികോപകരണങ്ങള്‍ നല്‍കുമെന്ന് ഓസ്ട്രേലിയയും അറിയിച്ചു. സാമ്പത്തിക ഉപരോധം കടുപ്പിച്ചതിനെത്തുടര്‍ന്ന് റഷ്യന്‍ കറന്‍സിസായ റൂബിളിന്‍റെ മൂല്യം 41 ശതമാനം ഇടിഞ്ഞു. സ്വിഫ്റ്റില്‍ നിന്നും പുറത്താക്കാന്‍ തീരുമാനിച്ചതിന് പിന്നാലെ പണം പിന്‍വലിക്കാന്‍ റഷ്യയിലെ ബാങ്കുകള്‍ക്ക് മുന്നില്‍ വന്‍തിരക്കാണ് അനുഭവപ്പെടുന്നത്.
അതിനിടെ യുകെയിൽ സ്ഥിരതാമസമാക്കിയ ആളുകൾക്ക് അവരുടെ ഉക്രേനിയൻ അടുത്ത കുടുംബാംഗങ്ങളെ അവരോടൊപ്പം കൊണ്ടുവരാൻ കഴിയുമെന്ന് പ്രധാനമന്ത്രി ബോറിസ് ജോൺസൺ പ്രഖ്യാപിച്ചു. യുക്രൈയിനിന്റെ ആവശ്യസമയത്ത് യുകെ മുഖം തിരിക്കില്ലെന്ന് ബോറിസ് ജോൺസൺ പറഞ്ഞു.
ഉക്രേനിയൻ കത്തീഡ്രൽ സഭയോട് സംസാരിച്ച അദ്ദേഹം, യുക്രൈയ്നിലെ സംഘർഷം പോലെ “നല്ലതും തിന്മയും തമ്മിലുള്ള വ്യത്യാസം” താൻ ഇതുവരെ കണ്ടിട്ടില്ലെന്ന് പറഞ്ഞു. ഉക്രയിന് 40 മില്യൺ പൗണ്ട് മാനുഷിക സഹായവും പ്രധാനമന്ത്രി പ്രഖ്യാപിച്ചു. റഷ്യൻ അധിനിവേശം തുടരുന്ന സാഹചര്യത്തിൽ യുകെയിൽ അഭയം തേടുന്ന ഉക്രേനിയക്കാർക്കുള്ള വിസ നിയമങ്ങൾ ഒഴിവാക്കണമെന്ന ആവശ്യം സർക്കാർ പരിഗണിക്കുന്നുണ്ട്.
ഏറ്റവും പുതിയ പ്രഖ്യാപനത്തിന് മുമ്പ്, ഇതിനകം യുകെയിലുള്ളവരുടെ ആശ്രിതർ എന്ന് കരുതപ്പെടുന്ന ഉക്രേനിയക്കാർക്ക് മാത്രമേ പ്രവേശനം ഉറപ്പുനൽകുന്നുള്ളൂ. യൂറോപ്യൻ യൂണിയൻ അംഗരാജ്യങ്ങൾ എല്ലാ ഉക്രേനിയൻ അഭയാർത്ഥികളെയും മൂന്ന് വർഷം വരെ സ്വീകരിക്കാനുള്ള പദ്ധതികളെ പിന്തുണച്ചിട്ടുണ്ട്, അവർക്ക് അഭയാർത്ഥി വിസയ്ക്കായി അപേക്ഷിക്കേണ്ട ആവശ്യമില്ല.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല