സ്വന്തം ലേഖകൻ: സൗദിയില്‍ ട്രാഫിക് പിഴകളില്‍ 50 ശതമാനം ഇളവ് പ്രഖ്യാപിച്ചു. 2024 ഏപ്രില്‍ 18ന് മുമ്പ് രേഖപ്പെടുത്തിയ പിഴകള്‍ക്കാണ് ഇളവ്. ചുമത്തപ്പെട്ട പിഴത്തുകയില്‍ പകുതി അടച്ചുതീര്‍ത്താല്‍ ബാധ്യതകള്‍ ഒഴിവാകുമെന്നും ആഭ്യന്തര മന്ത്രാലയം പ്രഖ്യാപിച്ചു.
വന്‍തുക ട്രാഫിക് പിഴ ബാധ്യതയുള്ളവര്‍ക്ക് വലിയ ആശ്വാസമേകുന്ന തീരുമാനമാണിത്. സൗദി ഭരണാധികാരി സല്‍മാന്‍ രാജാവിന്റെയും കിരീടാവകാശി മുഹമ്മദ് ബിന്‍ സല്‍മാന്‍ രാജകുമാരന്റെയും നിര്‍ദേശപ്രകാരമാണ് ഇളവുകള്‍ നല്‍കുന്നത്.
ധനകാര്യ മന്ത്രാലയത്തിന്റെയും സൗദി ഡാറ്റ ആന്റ് ആര്‍ട്ടിഫിഷ്യല്‍ ഇന്റലിജന്‍സ് അതോറിറ്റിയുടെയും ഏകോപനത്തോടെയുമായിരിക്കും പദ്ധതി നടപ്പാക്കുക. ഇത് ആക്റ്റീവ് ആയി ആറ് മാസങ്ങള്‍ക്കുള്ളില്‍ പിഴത്തുക ഒടുക്കുന്നവര്‍ക്കാണ് ഇളവ് ലഭിക്കുക.
ഓരോ പിഴകളും വെവ്വേറെയായോ ഒന്നിച്ചോ അടക്കാം. സമയപരിധിക്കുള്ളില്‍ പിഴ അടച്ചില്ലെങ്കില്‍ വാഹനം പിടിച്ചെടുക്കലും മറ്റ് നിയമ നടപടികളും സ്വീകരിക്കാനും മന്ത്രാലയം തീരുമാനിച്ചു. ഈ ഇളവ് നിലവില്‍ വന്നതിന് ശേഷം സംഭവിക്കുന്ന ലംഘനങ്ങള്‍ക്ക് ട്രാഫിക് നിയമത്തിലെ ആര്‍ട്ടിക്കിള്‍ 75 ബാധകമാകുമെന്ന് മന്ത്രാലയം വ്യക്തമാക്കി. ഈ വ്യവസ്ഥ പ്രകാരം ഒറ്റത്തവണ ലംഘനത്തിന് 25% ഇളവ് നല്‍കും.
അതേസമയം, പൊതുസുരക്ഷയെ ബാധിക്കുന്ന നാലു തരം നിയമലംഘനങ്ങള്‍ക്ക് ചുമത്തിയ പിഴകള്‍ക്ക് ഈ ആനുകൂല്യം ബാധകമാകില്ലെന്ന് ട്രാഫിക് വിഭാഗം വക്താവ് ട്രാഫിക് മന്‍സൂര്‍ അല്‍ശുക്റ അറിയിച്ചു.
മയക്കുമരുന്ന് പോലുള്ള നിരോധിത വസ്തുക്കള്‍ ഉപയോഗിച്ച ശേഷം വാഹനമോടിക്കല്‍, പൊതുനിരത്തുകളില്‍ വാഹനാഭ്യാസം, മണിക്കൂറില്‍ 120 കിലോമീറ്റര്‍ വേഗപരിധി നിശ്ചയിച്ച റോഡില്‍ 170 കിലോമീറ്ററില്‍ കൂടുതല്‍ വേഗതയില്‍ വാഹനമോടിക്കല്‍, 140 കിലോമീറ്റര്‍ നിശ്ചയിച്ച റോഡില്‍ 170 കിലോമീറ്റര്‍ വേഗതയില്‍ വാഹനമോടിക്കല്‍ എന്നിവ ആനുകൂല്യ പരിധിയില്‍ വരില്ല.
റോഡ് സുരക്ഷ ഉറപ്പാക്കുന്നതിന് ട്രാഫിക് നിയമങ്ങള്‍ പാലിക്കണമെന്നും നിയമലംഘനങ്ങള്‍ നടത്തരുതെന്നും ആഭ്യന്തര മന്ത്രാലയം എല്ലാ വാഹന ഉപയോക്താക്കളോടും ആവശ്യപ്പെട്ടു. ഡ്രൈവിങിനിടെ മൊബൈല്‍ ഫോണ്‍ ഉപയോഗിച്ചാല്‍ 500 റിയാല്‍ മുതല്‍ 900 റിയാല്‍ വരെയാണ് പിഴ. വ്യക്തമല്ലാത്തതോ തകര്‍ന്നതോ ആയ നമ്പര്‍ പ്ലേറ്റുകള്‍ ഉപയോഗിച്ചാല്‍ 1000 മുതല്‍ 2000 റിയാല്‍ പിഴ ചുമത്തും.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല