സ്വന്തം ലേഖകൻ: എമിറേറ്റിലെ സര്‍ക്കാര്‍ സേവനങ്ങള്‍ കൂടുതല്‍ ജനകീയമാക്കാനും ഉപഭോക്തൃ സംതൃപ്തി വര്‍ധിപ്പിക്കുന്നതിനുമായി പുതിയ പ്ലാറ്റ്‌ഫോമുമായി ദുബായ് സര്‍ക്കാര്‍. ദുബായ് സര്‍ക്കാരിനെയും ഉപഭോക്താക്കളെയും കൂടുതല്‍ നല്ല രീതിയില്‍ ബന്ധിപ്പിക്കുന്നതാണ് ’04’ എന്ന് വിളിക്കപ്പെടുന്ന ഈ പ്ലാറ്റ്ഫോം. ഇതില്‍ 40 സര്‍ക്കാര്‍ സ്ഥാപനങ്ങളെ ഉള്‍പ്പെടുത്തിയിട്ടുണ്ടെന്ന് ദുബായ് കിരീടാവകാശി ശെയ്ഖ് ഹംദാന്‍ ബിന്‍ മുഹമ്മദ് ബിന്‍ റാഷിദ് അല്‍ മക്തൂം അറിയിച്ചു. വാട്ട്‌സ്ആപ്പ് വഴിയും ഈ സേവനങ്ങള്‍ ലഭ്യമാകുമെന്ന് അധികൃതര്‍ അറിയിച്ചു. രണ്ട് മിനുട്ടുകള്‍ സര്‍ക്കാരിനെ പരാതികള്‍ അറിയിക്കാന്‍ സൗകര്യമൊരുക്കുന്നതാണ് പുതിയ സംവിധാനം.
ഉപഭോക്തൃ ഇടപഴകല്‍ മെച്ചപ്പെടുത്തുകയും സര്‍ക്കാരിന്റെ മികവ് ഉയര്‍ത്തുകയും ചെയ്യുകയാണ് ലക്ഷ്യമെന്നും അദ്ദേഹം കൂട്ടിച്ചേര്‍ത്തു. ‘ദുബായില്‍ ഞങ്ങള്‍ ഭാവിയിലെ സര്‍ക്കാരുകള്‍ക്ക് മാതൃക സൃഷ്ടിക്കുകയാണ്. ഉപഭോക്താവ് സര്‍ക്കാര്‍ സേവനങ്ങളുടെ ഒരു ഗുണഭോക്താവ് മാത്രമല്ല, മറിച്ച് അവ രൂപകല്‍പ്പന ചെയ്യുന്നതിലും നടപ്പിലാക്കുന്നതിലും വിലയിരുത്തുന്നതിലും ഒരു തന്ത്രപരമായ പങ്കാളിയാണ്’,- ശെയ്ഖ് ഹംദാന്‍ ട്വീറ്റ് ചെയ്തു. വാട്ട്‌സ്ആപ്പ് ബിസിനസ് വഴി 600500055 എന്ന നമ്പര്‍ വഴി ഈ സേവനങ്ങള്‍ ലഭിക്കും. അതോടൊപ്പം സോഷ്യല്‍ മീഡിയ ചാനലുകള്‍ വഴിയും ജനങ്ങള്‍ക്ക് സര്‍ക്കാരുമായി സംവദിക്കാം.
04 പ്ലാറ്റ്ഫോമിന്റെ വെബ്സൈറ്റ് മൂന്ന് ഓപ്ഷനുകള്‍ ജനങ്ങള്‍ക്ക് വാഗ്ദാനം ചെയ്യുന്നുണ്ട്. സര്‍ക്കാരിന് ആവശ്യമായ നിര്‍ദ്ദേശങ്ങള്‍ നല്‍കാനുള്ള അവസരമാണ് അതിലൊന്ന്. ഏതെങ്കിലും സര്‍ക്കാര്‍ സേവനമോ സേവനവുമായി ബന്ധപ്പെട്ട ഇടപാടുകളോ നടപടിക്രമങ്ങളോ വികസിപ്പിക്കുന്നതിനോ മെച്ചപ്പെടുത്തുന്നതിനോ ഉപയോക്താക്കള്‍ക്ക് ഒരു പുതിയ ആശയം പോസ്റ്റ് ചെയ്യാന്‍ ഈ ഓപ്ഷനിലൂടെ സാധിക്കും.
ഒരു സര്‍ക്കാര്‍ സേവനം അല്ലെങ്കില്‍ സര്‍ക്കാര്‍ പോര്‍ട്ടല്‍ ഉപയോഗിച്ച് ഏതെങ്കിലും സ്ഥാപനം നല്‍കുന്ന ഏതെങ്കിലും സേവനങ്ങള്‍ തുടങ്ങിയവയുമായി ബന്ധപ്പെട്ട നടപടിക്രമങ്ങള്‍, ഇടപാടുകള്‍, രീതികള്‍ തുടങ്ങിയ കാര്യങ്ങളില്‍ എന്തെങ്കിലും പരാതികളോ അതൃപ്തിയോ ഉണ്ടെങ്കില്‍ പോര്‍ട്ടലിലെ രണ്ടാമത്തെ ഓപ്ഷന്‍ ഉപയോഗിച്ച് നേരിട്ട് പരാതിപ്പെടാന്‍ ഉപഭോക്താക്കള്‍ക്ക് അവസരം നല്‍കുന്നുവെന്നതാണ് ഇതിന്റെ മറ്റൊരു സവിശേഷത.
ഏതെങ്കിലും സര്‍ക്കാര്‍ സേവനത്തെയോ ഇടപാടിനെയോ സ്ഥാപനത്തെയോ സംബന്ധിച്ച് നല്ലതും മോശവുമായ അഭിപ്രായങ്ങള്‍ അധികൃതരുമായി പങ്കുവയ്ക്കുന്നതിനുള്ളതാണ് മൂന്നാമത്തെ ഓപ്ഷന്‍. സര്‍ക്കാര്‍ സ്ഥാപനങ്ങള്‍ തമ്മിലുള്ള സഹകരണവും സംയോജനവും വര്‍ധിപ്പിച്ച് ഗവണ്‍മെന്റിന്റെ കാര്യക്ഷമതയും ഗുണനിലവാരവും കൂടുതല്‍ ഉയര്‍ത്തേണ്ടതിന്റെ പ്രാധാന്യം എടുത്തുപറഞ്ഞ ശെയ്ഖ് ഹംദാന്‍, ഡി 33 എന്ന പേരിലുള്ള ദുബായ് സാമ്പത്തിക അജണ്ടയുടെ ലക്ഷ്യങ്ങള്‍ കൈവരിക്കുന്നതിന്റെ ഭാഗമായാണ് പുതിയ പദ്ധതിയെന്നും അദ്ദേഹം അറിയിച്ചു. യുഎഇ വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ശെയ്ഖ് മുഹമ്മദ് ബിന്‍ റാഷിദ് അല്‍ മക്തൂമിന്റെ ദീര്‍ഘവീക്ഷണവും ദര്‍ശനവുമാണ് ദുബായയിയെ മുന്നോട്ടുനയിക്കുന്നതെന്നും അദ്ദേഹം പറഞ്ഞു.
സേവന നിലവാരം, പ്രവര്‍ത്തനക്ഷമത, നൂതനത്വം, മികച്ചതും വേഗത്തിലുള്ളതുമായ സേവനങ്ങള്‍ നല്‍കല്‍ തുടങ്ങിയ കാര്യങ്ങളില്‍ ഉയര്‍ന്ന നിലവാരം കൈവരിക്കുന്നതില്‍ ദുബായ് ഗവണ്‍മെന്റ് കൈവരിച്ച വിജയം ലോകമെമ്പാടുമുള്ള സര്‍ക്കാരുകള്‍ക്ക് അവരുടെ സേവനങ്ങള്‍ മെച്ചപ്പെടുത്താനും പൗരന്മാരുടെ ആവശ്യങ്ങള്‍ നിറവേറ്റാനുമുള്ള ശ്രമത്തില്‍ പുതിയ മാതൃകയാണെന്നും ശെയ്ഖ് ഹംദാന്‍ പറഞ്ഞു. ഈ മേഖലയില്‍ ദുബായിയുടെ മുന്‍നിര പദവി നിലനിര്‍ത്തുന്നതിന് സര്‍ക്കാര്‍ സേവനങ്ങളിലെ ആഗോള പ്രവണതകള്‍ക്കൊപ്പം നില്‍ക്കേണ്ടതിന്റെ പ്രാധാന്യവും അദ്ദേഹം എടുത്തുപറഞ്ഞു.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല