സ്വന്തം ലേഖകൻ: രണ്ട് വർഷത്തിനിടെ ലണ്ടൻ പോലീസ് 600ൽ അധികം കുട്ടികളുടെ വസ്ത്രം അഴിപ്പിച്ച് പരിശോധന നടത്തിയെന്ന് റിപ്പോർട്ട്. പരിശോധനയ്ക്ക് വിധേയരായവരിൽ ഭൂരിഭാഗവും കറുത്ത വർഗക്കാരായ ആൺകുട്ടികളാണെന്നും തിങ്കളാഴ്ച പുറത്ത് വന്ന റിപ്പോർട്ടിലുണ്ട്. കണക്കുകൾ പുറത്ത് വന്നതിന് പിന്നാലെ ലണ്ടൻ പോലീസിനെതിരെ രൂക്ഷവിമർശനമാണ് ഉയരുന്നത്.
മെട്രോപൊളിറ്റൻ പോലീസിൽ നിന്ന് ലഭിച്ച കണക്കുകൾ തന്നെ ഞെട്ടിച്ചെന്ന് ഇംഗ്ലണ്ടിലെ ബാലവകാശ കമ്മീഷണർ റേച്ചൽ ഡിസൂസ പറഞ്ഞു. ‘ചൈൽഡ് ക്യു’ കേസുകൾ പുറത്തു വരാൻ തുടങ്ങിയതിനെ തുടർന്ന് ബ്രിട്ടൻ പോലീസിന് കഴിഞ്ഞ മാർച്ചിൽ പരസ്യമായി മാപ്പു പറയേണ്ടി വന്നിരുന്നു. ഇതിന് പിന്നാലെയാണ് റേച്ചൽ ഡിസൂസയ്ക്ക് പുതിയ റിപ്പോർട്ട് ലഭിച്ചിരിക്കുന്നത്. ‘ചൈൽഡ് ക്യു’ സംഭവത്തിന് പിന്നാലെ നാല് ഓഫീസർമാർക്കെതിരെ പോലീസ് വകുപ്പുതല അന്വേഷണം പ്രഖ്യാപിച്ചിരുന്നു.
കഞ്ചാവ് കൈവശംവച്ചെന്ന സംശയത്തെതുടർന്ന്, വനിതാ പോലീസ് ഉദ്യോഗസ്ഥർ 15 വയസുള്ള കറുത്ത വർഗക്കാരിയെ വസ്ത്രം അഴിച്ച് പരിശോധിച്ചത് ഏറെ വിവാദമായിരുന്നു. 2020ലായിരുന്നു ഈ സംഭവം. പെൺകുട്ടിക്ക് ആർത്തവമാണെന്ന് മനസിലാക്കിയിട്ടും വസ്ത്രം അഴിച്ച് പോലീസ് ഉദ്യോഗസ്ഥർ പരിശോധന നടത്തുകയായിരുന്നു. മുതിർന്നവരുടെ സാന്നിധ്യത്തിലായിരുന്നില്ല ഈ പരിശോധന. 23 ശതമാനത്തോളം കേസുകളിലും സമാന സാഹചര്യമായിരുന്നെന്നാണ് റേച്ചൽ ഡിസൂസ പറയുന്നത്
2018 നും 2020 നും ഇടയിൽ 10 മുതൽ 17 വയസു വരെ പ്രായമുള്ള 650 ഓളം പേരെ വസ്ത്രം അഴിച്ച് പരിശോധിച്ചന നടത്തിയെന്നാണ് റേച്ചൽ ഡിസൂസ നടത്തിയ അന്വേഷണത്തിൽ കണ്ടെത്തിയിരിക്കുന്നത്. പരിശോധനയ്ക്ക് വിധേയരായവരിൽ 95 ശതമാനത്തിലധികം ആൺകുട്ടികളായിരുന്നു. 650 പേരിൽ 58 ശതമാനവും കറുത്ത വർഗക്കാരാണെന്നും റിപ്പോർട്ട് പറയുന്നു.
ഇത്തരത്തിലുള്ള വംശീയ അസന്തുലിതാവസ്ഥയിൽ താൻ അങ്ങേയറ്റം ആശങ്കാകുലയാണെന്ന് റേച്ചൽ ഡിസൂസ പറഞ്ഞു. ഒരു വലിയ വിഭാഗം കുട്ടികളുടെ സംരക്ഷണത്തെ പറ്റി ചോദ്യമുയർത്തുന്ന ഗുരുതരമായ പ്രശ്നമാണ് ചൈൽഡ് ക്യു. ഈ കണക്കുകൾ വർഷം തോറും കുത്തനെ ഉയർരുകയാണ്‌. നിരവധി കുട്ടികൾ ഓരോ വർഷവും ഗുരുതരമായ നിയമലംഘനത്തിന് ഇരകളാകുന്നുണ്ടെന്നും റേച്ചൽ ഡിസൂസ പറയുന്നു.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല