സ്വന്തം ലേഖകൻ: 2023ല്‍ സുപ്രധാന മാറ്റങ്ങളും വികസന പദ്ധതികളും പരിഷ്‌ക്കാരങ്ങളുമാണ് യുഎഇയെ കാത്തിരിക്കുന്നത്. ഡ്രൈവറില്ലാ ടാക്‌സികളും ലോകോത്തര ഭക്ഷണശാലകളും മുതല്‍ കോര്‍പ്പറേറ്റ് നികുതിയും നിര്‍ബന്ധിത തൊഴില്‍ ഇന്‍ഷുറന്‍സും വരെയുള്ള മാറ്റങ്ങളുമായാണ് പുതുവര്‍ഷത്തിന്റെ കടന്നുവരവ്. 2023 അവസാനിക്കുന്നതിനു മുമ്പായി ദുബായില്‍ ഡ്രൈവറില്ലാ വാഹനങ്ങളെത്തും. ഡ്രൈവറില്ലാത്ത കാറുകള്‍ ടാക്‌സികളായാണ് ദുബായ് നിരത്തുകളിലെത്തുക. ഇവയുടെ യാത്രാ നിരക്ക് ഉള്‍പ്പെടെയുള്ള കാര്യങ്ങള്‍ അറിയാനിരിക്കുന്നതേയുള്ളൂ.
ഗതാഗത രംഗത്ത് വിപ്ലവകരമായ മാറ്റമായിരിക്കും ഇത്. ഈ ഫ്യൂച്ചറിസ്റ്റിക് ഓട്ടോണമസ് ടാക്സികളില്‍ കുറഞ്ഞത് 10 എണ്ണം 2023 അവസാനത്തോടെ യാത്രക്കാരെ കയറ്റാന്‍ തുടങ്ങും. വാഹനങ്ങളില്‍ സെന്‍സറുകള്‍, ക്യാമറകള്‍, റോഡിന്റെ അവസ്ഥ നിരീക്ഷിക്കാനും കൂട്ടിയിടി ഒഴിവാക്കാനുമുള്ള ലൈറ്റ് ഡിറ്റക്ഷന്‍ ആന്റ് റേഞ്ചിംഗ് (ലേസര്‍ സ്‌കാനിംഗ് ടെക്നോളജി) എന്നിവയും ഉണ്ടായിരിക്കും.
2023-ലെ യുഎഇയുടെ ഏറ്റവും പ്രധാനപ്പെട്ട പരിപാടി ദുബായില്‍ നടക്കുന്ന സിഒപി 28 കാലാവസ്ഥാ സമ്മേളനം ആയിരിക്കുമെന്ന് യുഎഇ വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ശെയ്ഖ് മുഹമ്മദ് ബിന്‍ റാഷിദ് അല്‍ മക്തൂം പറഞ്ഞു. യുണൈറ്റഡ് നേഷന്‍സ് ഫ്രെയിംവര്‍ക്ക് കണ്‍വെന്‍ഷന്‍ ഓണ്‍ ക്ലൈമറ്റ് ചേഞ്ചിലേക്കുള്ള കോണ്‍ഫറന്‍സ് ഓഫ് പാര്‍ട്ടികളുടെ 28ാമത് സെഷന്‍ അടുത്ത വര്‍ഷം നവംബര്‍ 30 മുതല്‍ ഡിസംബര്‍ 12 വരെ ദുബായിലെ എക്‌സ്‌പോ സിറ്റിയിലാണ് നടക്കുക. 140-ലധികം രാഷ്ട്രത്തലവന്മാരും ഭരണാധികാരികളും 80,000 പ്രതിനിധികളും പരിപാടിയില്‍ പങ്കെടുക്കുമെന്നാണ് പ്രതീക്ഷിക്കുന്നത്.
2023 ജനുവരി 1 മുതല്‍, തൊഴിലാളികള്‍ തൊഴിലില്ലായ്മ ഇന്‍ഷുറന്‍സ് പദ്ധതിയില്‍ വരിക്കാരാകുന്നത് നിര്‍ബന്ധമാക്കും.
16,000 ദിര്‍ഹമോ അതില്‍ കുറവോ അടിസ്ഥാന ശമ്പളമുള്ള തൊഴിലാളികള്‍ പ്രതിമാസം 5 ദിര്‍ഹം ഇന്‍ഷുറന്‍സ് പ്രീമിയം അടയ്ക്കണം. അച്ചടക്ക നടപടിയുടെ ഭാഗമായല്ലാത്ത കാരണത്താല്‍ തൊഴില്‍ നഷ്ടപ്പെടുകയാണെങ്കില്‍, തുടര്‍ച്ചയായ മൂന്ന് മാസങ്ങളില്‍ അധികരിക്കാത്ത കാലയളവിലേക്ക് പദ്ധതി പ്രകാരമുള്ള നിശ്ചിത തുക ആനുകൂല്യമായി ലഭിക്കും.
2023 ജൂണ്‍ 1 മുതല്‍ ബിസിനസുകള്‍ക്ക് യുഎഇ കോര്‍പ്പറേറ്റ് നികുതി ബാധകമാകും. 375,000 ദിര്‍ഹത്തില്‍ കൂടുതല്‍ വാര്‍ഷിക ലാഭം രേഖപ്പെടുത്തുന്ന സ്ഥാപനങ്ങള്‍ക്ക് 9 ശതമാനം നികുതി ചുമത്തും. യുഎഇയില്‍ വാണിജ്യ ലൈസന്‍സിന് കീഴില്‍ ബിസിനസ്സ് പ്രവര്‍ത്തനങ്ങള്‍ നടത്തുന്ന എല്ലാ ബിസിനസുകള്‍ക്കും വ്യക്തികള്‍ക്കും കോര്‍പ്പറേറ്റ് നികുതി ബാധകമാകും.
അമ്പതോ അതിലധികമോ ജീവനക്കാരുള്ള സ്വകാര്യമേഖലാ സ്ഥാപനങ്ങള്‍ നൈപുണ്യമുള്ള ജോലികളില്‍ രണ്ട് ശതമാനം തസ്തികകള്‍ സ്വദേശികള്‍ക്ക് നല്‍കണമെന്ന വ്യവസ്ഥ നിലവിലുണ്ട്. എമിറേറ്റൈസേഷന്‍ നിരക്ക് പാലിക്കുന്നതില്‍ പരാജയപ്പെടുന്ന സ്വകാര്യ സ്ഥാപനങ്ങള്‍ 2023 ജനുവരി 1 മുതല്‍ അതിന് പിഴ അടയ്‌ക്കേണ്ടിവരും. ജോലി നല്‍കാത്ത ഓരോ സ്വദേശിക്കും പ്രതിമാസം 6,000 ദിര്‍ഹം എന്ന തോതിലാണ് പിഴ ചുമത്തുക.
യുഎഇയിലെ എല്ലാ അമുസ്ലിം വിദേശികളുടെയും വ്യക്തിഗത പദവി സംബന്ധിച്ച പുതിയ ഫെഡറല്‍ നിയമം അടുത്ത വര്‍ഷം ഫെബ്രുവരി 1 മുതല്‍ പ്രാബല്യത്തില്‍ വരും. വിവാഹം, വിവാഹമോചനം, അനന്തരാവകാശം എന്നിവ ഉള്‍പ്പെടെയുള്ള വിവിധ നടപടിക്രമങ്ങള്‍ക്ക് സ്വന്തം വ്യക്തി നിയമങ്ങള്‍ക്ക് അനുസൃതമായ നടപടികള്‍ ലഭിക്കാന്‍ ഇസ്ലാം ഇതര വിശ്വാസികള്‍ക്ക് അവകാശമുണ്ടായിരിക്കും.
ദുബായിലെ ഏറ്റവും പ്രതീക്ഷയോടെ കാത്തിരിക്കുന്ന റിസോര്‍ട്ടായ അറ്റ്ലാന്റിസ് ദി റോയല്‍ 2023-ല്‍ നിര്‍മാണം പൂര്‍ത്തിയാക്കും. 795 മുറികളുള്ള ഈ ഹോട്ടലില്‍ 90 നീന്തല്‍ക്കുളങ്ങളും 17 റെസ്റ്റോറന്റുകളും ഉണ്ടാകും. അതില്‍ എട്ടെണ്ണം ലോകോത്തര സെലിബ്രിറ്റി ഷെഫുകളുടെ മേല്‍നോട്ടത്തിലുള്ളതാവും. ലോകത്തിലെ ഏറ്റവും വലിയ ജെല്ലിഫിഷ് അക്വേറിയവും തീ ശ്വസിക്കുന്ന ഒരു ജലധാരയും ഈ റിസോര്‍ട്ടിലുണ്ടാകും.
യുഎഇയിലെ ആദ്യത്തെ മറൈന്‍ ലൈഫ് തീം പാര്‍ക്ക് അബുദാബിയില്‍ പ്രവര്‍ത്തനം തുടങ്ങും. യാസ് ഐലന്‍ഡിലെ ടൂറിസം ആകര്‍ഷണങ്ങളോട് ഇതുകൂടി ചേരുന്നതോടെ ആഗോള വിനോദസഞ്ചാരികളുടെ സന്ദര്‍ശന കേന്ദ്രമായി ഇത് മാറും. 183,000 ചതുരശ്ര മീറ്ററില്‍ നിര്‍മിക്കുന്ന മറൈന്‍ ലൈഫ് തീം പാര്‍ക്കില്‍ ലോകത്തിലെ ഏറ്റവും വലിയ അക്വേറിയം കൂടി ഉള്‍പ്പെട്ടതാവും. കടലാമകള്‍, ഉരഗങ്ങള്‍ എന്നിവയുള്‍പ്പെടെ 68,000-ലധികം കടല്‍ മൃഗങ്ങള്‍ ഇതിലുണ്ടാകും. കൂടാതെ സമുദ്രത്തിനടിയിലെ ജീവിതത്തിന്റെ സങ്കീര്‍ണ്ണതയും പരസ്പര ബന്ധവും സൗന്ദര്യവും പ്രദര്‍ശിപ്പിക്കുന്ന ആറ് വ്യത്യസ്ത മേഖലകളും ഇവിടെ ഒരുക്കും.
ദുബായില്‍ നിരവധി പുതിയ റെസ്റ്റോറന്റുകള്‍ക്ക് പുതുവല്‍സരം സാക്ഷ്യം വഹിക്കും. യുഎഇയിലെ ഭക്ഷണപ്രിയര്‍ക്ക് കൂടുതല്‍ ഡൈനിംഗ് അനുഭവങ്ങള്‍ സമ്മാനിക്കാന്‍ എബോവ് ഇലവന്‍ (മാരിയറ്റ് പാം ജുമൈറ), സിറ്റി സോഷ്യല്‍ (ഗ്രോസ്വെനര്‍ ഹൗസ്), എസ്റ്റിയാറ്റോറിയോ മിലോസ് (അറ്റ്ലാന്റിസ് ദി റോയല്‍), ജോസെറ്റ് (ഡിഐഎഫ്സി) എന്നിവ ഉള്‍പ്പെടെ പുതുവര്‍ഷത്തില്‍ 30ലേറെ റെസ്റ്റോറന്റുകളാണ് ഉദ്ഘാടനം ചെയ്യപ്പെടുക.
ലോകത്തിലെ ഏറ്റവും വലിയ സംഗീതോത്സവം അടുത്ത വര്‍ഷം ആദ്യം തലസ്ഥാന നഗരിയായ അബുദാബിയില്‍ ആരംഭിക്കും. ഇത്തിഹാദ് പാര്‍ക്കില്‍ 2023 മാര്‍ച്ച് 4, 5 തീയതികളിലാണ് അള്‍ട്രാ അബുദാബി മ്യൂസിക് ഫെസ്റ്റിവല്‍ നടക്കുക. രണ്ട് വേദികളിലായി നടക്കുന്ന സംഗീതോത്സവത്തില്‍ അണിനിരക്കുന്ന ലോകത്തിന്റെ വിവിധ ഭാഗങ്ങളില്‍ നിന്നുള്ള സംഗീത വിദഗ്ധര്‍ പങ്കെടുക്കും.
ലോകത്തിലെ ഏറ്റവും വലിയ സ്നോ പ്ലേ പാര്‍ക്കായ സ്നോ അബുദാബി തലസ്ഥാനത്തെ റീഫ് മാളില്‍ പുതുവര്‍ഷത്തില്‍ പ്രവര്‍ത്തനം ആരംഭിക്കും. വ്യത്യസ്ത മേഖലകളായി വിഭജിച്ചിരിക്കുന്ന 10,000 സ്‌ക്വയര്‍ ഫീറ്റ് പാര്‍ക്കില്‍ സ്നോഫ്ലെക്ക് ഗാര്‍ഡന്‍ കൂടാതെ 13 ലോകോത്തര റൈഡുകളും ആകര്‍ഷണങ്ങളും ഒരുക്കിയിട്ടുണ്ട്.
2023 ന്റെ ആദ്യ പകുതിയില്‍ ഒരു പുതിയ 1,000 ദിര്‍ഹം കറന്‍സി നോട്ട് പ്രാബല്യത്തില്‍ വരും. പോളിമര്‍ കൊണ്ട് തയ്യാറാക്കുന്ന ബാങ്ക് നോട്ട്, ബഹിരാകാശ മേഖലയിലും ക്ലീന്‍ എനര്‍ജി രേഗങ്ങളിലും കൈവരിച്ച നേട്ടങ്ങള്‍ക്കൊപ്പം യുഎഇയുടെ മറ്റു വിജയഗാഥകളും ചിത്രീകരിക്കും.
അടുത്ത വര്‍ഷം മുതല്‍ അജ്മാനില്‍ പ്ലാസ്റ്റിക് ബാഗുകള്‍ നിരോധിക്കും. ഒറ്റത്തവണ മാത്രം ഉപയോഗിക്കാവുന്ന പ്ലാസ്റ്റിക് ബാഗുകള്‍ക്ക് പകരം ഏറ്റവും സുസ്ഥിരമായ ബദല്‍ കണ്ടെത്താനുള്ള പഠനം നടത്തുകയാണെന്ന് അജ്മാന്‍ മുനിസിപ്പാലിറ്റിയും ആസൂത്രണ വകുപ്പും നേരത്തെ വ്യക്തമാക്കിയിരുന്നു. അബുദാബി, ദുബായ് ഉള്‍പ്പെടെയുള്ള എമിറേറ്റുകളില്‍ നിലവില്‍ ഒറ്റത്തവണ ഉപയോഗിക്കുന്ന പ്ലാസ്റ്റിക് കാരി ബാഗിന്റെ ഉപയോഗത്തിനും വില്‍പ്പനയ്ക്കും നിയന്ത്രിണമുണ്ട്.
അടുത്ത വര്‍ഷം മുതല്‍ സാമ്പത്തിക ഇടപാടുകള്‍ക്കായി ഇന്‍സ്റ്റന്റ് പേയ്മെന്റ് പ്ലാറ്റ്ഫോം യുഎഇയിലെ ഉപഭോക്താക്കള്‍ക്ക് ലഭ്യമാകും. ലൈസന്‍സുള്ള ധനകാര്യ സ്ഥാപനങ്ങളുടെ പൈലറ്റ് ഗ്രൂപ്പുമായി 2023 ന്റെ ആദ്യ പാദത്തില്‍ ഐപിപി സമാരംഭിക്കുമെന്ന് സെന്‍ട്രല്‍ ബാങ്ക് ഓഫ് യുണൈറ്റഡ് അറബ് എമിറേറ്റ്‌സ് (സിബിയുഎഇ) അറിയിച്ചു.
ഷാര്‍ജയുടെ ഏറ്റവും പുതിയ വിനോദ സഞ്ചാര കേന്ദ്രമായ അല്‍ ഹീര ബീച്ചില്‍ 2023 ആദ്യ പാദത്തിന് മുമ്പ് നിരവധി റെസ്റ്റോറന്റുകളും വിനോദ മേഖലകളും പുതുതായി ആരംഭിക്കും. ഡിസംബര്‍ 22 ന് ഇവിടെ തുറന്ന മൂന്ന് വാണിജ്യ യൂണിറ്റുകളില്‍ ഒരു റെസ്റ്റോറന്റ്, കഫേ, ജിം എന്നിവ ഒരുക്കിയിരുന്നു. ഇതിനു പുറമെയാണ് കൂടുതല്‍ വാണിജ്യ, വിനോദ കേന്ദ്രങ്ങള്‍ വരുന്നത്.
എഴുപത് ലക്ഷം സ്‌പെസിമെനുകള്‍ കൈകാര്യം ചെയ്യാന്‍ ശേഷിയുള്ള ആദ്യ ബയോബാങ്ക് യുഎഇ തുറക്കും. ജനിതക വൈകല്യങ്ങള്‍, കാന്‍സര്‍, മറ്റ് വിട്ടുമാറാത്ത രോഗങ്ങള്‍, പകര്‍ച്ചവ്യാധികള്‍ എന്നിവയില്‍ മെഡിക്കല്‍ ഗവേഷണത്തിന്റെ പുരോഗതി ലക്ഷ്യമിട്ട് അത്യാധുനിക സൗകര്യങ്ങള്‍ അടങ്ങിയ ബയോബാങ്ക് ഒരുക്കാന്‍ അല്‍ ജയ്‌ലിയ ഫൗണ്ടേഷന്‍ 17 മില്യണ്‍ ദിര്‍ഹമാണ് നിക്ഷേപിക്കുന്നത്.
ലോകത്തിലെ ഏറ്റവും ഉയരം കൂടിയ ഹോട്ടല്‍ 2023-ല്‍ പ്രവര്‍ത്തനം ആരഭിക്കാന്‍ ഇടയില്ലെങ്കിലും അതിന്റെ നിര്‍മാണം പൂര്‍ത്തിയാവും. അതോടെ നഗരത്തിലെ നിരവധി അംബരചുംബികളെ അത് ചെറുതാക്കും. ദുബായ് മറീനയില്‍ ഉയരുന്ന സീല്‍ ടവറിന് 365 മീറ്റര്‍ ഉയരമുണ്ടാകും. ഉയരത്തിന്റെ കാര്യത്തില്‍ ദുബായിലെ നിലവിലെ റെക്കോര്‍ഡ് ഉടമയായ ഗെവോറ ഹോട്ടലിനെ അത് ഒമ്പത് മീറ്റര്‍ പിന്നിലാക്കും.
അടുത്ത വര്‍ഷം ദുബായ് മാളില്‍ എല്ലാ ചൈനീസ് ഉല്‍പ്പന്നങ്ങള്‍ക്കുമുള്ള ഒരു ഏകജാലക ഷോപ്പ് തുറക്കും. ലോകമെമ്പാടുമുള്ള മറ്റ് ചൈനാ ടൗണുകളെപ്പോലെ, ഇമാര്‍ സഹകരണത്തോടെ പ്രവര്‍ത്തിക്കുന്ന ഈ സംരംഭവും ചൈനീസ് ഷോപ്പുകളുടെയും ബേക്കറികളുടെയും ആസ്ഥാനമായിരിക്കും.
2023 മിനിഫുട്‌ബോള്‍ ലോകകപ്പിന് റാസല്‍ഖൈമ ആതിഥേയത്വം വഹിക്കും. രണ്ട് വര്‍ഷത്തിലൊരിക്കല്‍ നടക്കുന്ന ഈ മത്സരം ലോകമെമ്പാടുമുള്ള ആയിരക്കണക്കിന് കാണികളെയും ആരാധകരെയും ആകര്‍ഷിക്കം.
മാലിദ്വീപിലെ റിസോര്‍ട്ടുകളില്‍ നിന്ന് പ്രചോദനം ഉള്‍ക്കൊണ്ട ഒരു റിസോര്‍ട്ട് ഹോട്ടല്‍ റാസല്‍ഖൈമയില്‍ തുറക്കാന്‍ ഒരുങ്ങുന്നു. കണ്ടല്‍ക്കാടുകള്‍ നിറഞ്ഞ ഇക്കോ റിസര്‍വിന്റെ പശ്ചാത്തലത്തില്‍ ഒരുങ്ങുന്ന അനന്തര മിന അല്‍ അറബ് റിസോര്‍ട്ടില്‍ 306 അതിഥി മുറികളും വില്ലകളും ഉണ്ടാകും.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല