സ്വന്തം ലേഖകൻ: യുഎഇയില്‍ പുതുതായി സ്ഥാനമേറ്റ പ്രസിഡന്റ് ഷെയ്ഖ് മുഹമ്മദ് ബിന്‍ സായിദ് അല്‍ നഹ്യാന്റെ നേതൃത്വത്തില്‍ പുതിയ മാറ്റങ്ങള്‍ക്ക് തുടക്കമായി. വിദ്യാഭ്യാസ മേഖലയിലാണ് പുതിയ മാറ്റങ്ങള്‍ പ്രഖ്യാപിച്ചിരിക്കുന്നത്. ഇതിന്റെ ആദ്യപടിയായി മൂന്ന് പുതിയ വിദ്യാഭ്യാസ മന്ത്രിമാരെ നിയമിച്ചതായി യുഎഇ വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ഷെയ്ഖ് മുഹമ്മദ് ബിന്‍ റാശിദ് അല്‍ മക്തൂം അറിയിച്ചു.
വിദ്യാഭ്യാസ രംഗത്ത് കാതലായ മാറ്റങ്ങള്‍ക്കാണ് പുതിയ പ്രസിഡന്റിന്റെ നേതൃത്വത്തില്‍ തുടക്കം കുറിച്ചിരിക്കുന്നത്. രാജ്യത്തെ വിദ്യാഭ്യാസ രംഗവും ഈ രംഗത്തെ നമ്മുടെ ലക്ഷ്യങ്ങളും ഇന്നു മുതല്‍ ഇന്നലത്തേത് പോലെ ആയിരിക്കില്ലെന്ന് ദുബായ് ഭരണാധികാരി ട്വിറ്റര്‍ സന്ദേശത്തില്‍ അറിയിച്ചു. നാളേക്ക് ആവശ്യമായ നൈപുണികള്‍ ഇന്നത്തേതില്‍ നിന്നും വ്യത്യസ്തമായിരിക്കും. വിജയത്തിലേക്കുള്ള നമ്മുടെ പ്രയാണത്തെ മുന്നോട്ടുനയിക്കാന്‍ പുതുതലമുറയെ പ്രാപ്തമാക്കുകയാണ് നമ്മുടെ ലക്ഷ്യം. ഈ ലക്ഷ്യം കൈവരിക്കാന്‍ എല്ലാവരുടെയും സഹകരണം ആവശ്യപ്പെടുന്നതായും അദ്ദേഹം അറിയിച്ചു. പ്രസിഡന്റ് ഷെയ്ഖ് മുഹമ്മദ് ബിന്‍ സായിദ് അല്‍ നഹ്യാനുമായി ചര്‍ച്ച ചെയ്താണ് പുതിയ തീരുമാനങ്ങള്‍ കൈക്കൊണ്ടതെന്നും അദ്ദേഹം അറിയിച്ചു.
വിദ്യാഭ്യാസ മേഖലയിലെ പുതിയ മാറ്റത്തിന്റെ മുന്നോടിയായി മൂന്ന് മന്ത്രിമാരെ നിയമിച്ചതായും ശെയ്ഖ് മുഹമ്മദ് പ്രഖ്യാപിച്ചു. അഹ്മദ് ബില്‍ഹൗല്‍ അല്‍ ഫലാസിയായിരിക്കും പുതിയ വിദ്യാഭ്യാസ മന്ത്രി. നിലവില്‍ സംരംഭകത്വ, ചെറുകിട ഇടത്തരം സംരംഭക സഹമന്ത്രിയാണ് അദ്ദേഹം. രാജ്യത്തെ വിദ്യാഭ്യാസ മേഖലയുമായി ബന്ധപ്പെട്ട പുതിയ നയരൂപീകരണത്തിനും നിയമ നിര്‍ണങ്ങള്‍ക്കുമുള്ള ചുമതലയാണ് അദ്ദേഹത്തിന് നല്‍കിയിരിക്കുന്നത്.
പൊതുവിദ്യാഭ്യാസം, അഡ്വാന്‍സ് ടെക്നോളജി എന്നിവയുടെ സഹമന്ത്രിയും എമിറേററ്റ്സ് സ്‌കൂള്‍സ് എസ്റ്റാബ്ലിഷ്മെന്റിന്റെ ചെയര്‍മാനുമായാണ് സാറ അല്‍ അമീരിയെ നിയമിച്ചിരിക്കുന്നത്. രാജ്യത്തെ പൊതുവിദ്യാഭ്യാസ രംഗത്തെ പരിഷ്‌ക്കരിക്കുന്നതിനുള്ള ചുമതലയാണ് അവര്‍ക്ക്. പ്രാരംഭ വിദ്യാഭ്യാസത്തിനായുള്ള സഹമന്ത്രിയായാണ് സാറ അല്‍ മുസല്ലമിന് നിയമനം. പുതുതായി സ്ഥാപിതമായ പ്രാരംഭ വിദ്യാഭ്യാസത്തിനായുള്ള ഫെഡറല്‍ അതോറിറ്റിയുടെ മേല്‍നോട്ടം ഇവര്‍ക്കാണ്. നിലവിലെ വിദ്യാഭ്യാസ മന്ത്രി ഹുസൈന്‍ ബിന്‍ ഇബ്റാഹീം അല്‍ ഹമ്മാദി, പൊതു വിദ്യാഭ്യാസ സഹമന്ത്രി ജമീല അല്‍ മുഹൈരി എന്നിവര്‍ക്ക് ഷെയ്ഖ് മുഹമ്മദ് നന്ദി പറഞ്ഞു.
വിദ്യാഭ്യാസ മേഖലയിലെ അഴിച്ചുപണിയുടെ ഭാഗമായി പുതിയ സ്ഥാപനങ്ങള്‍ക്ക് രൂപം നല്‍കുകയും പഴയ സ്ഥാപനങ്ങളില്‍ മാറ്റങ്ങള്‍ വരുത്തുകയും ചെയ്തു കൊണ്ടാണ് ഷെയ്ഖ് മുഹമ്മദിന്റെ പ്രഖ്യാപനം. എഡ്യൂക്കേഷന്‍ ആന്റ് ഹ്യൂമണ്‍ റിസോഴ്സ് കൗണ്‍സില്‍, ഫെഡറല്‍ അതോറിറ്റി ഫോര്‍ ക്വാളിറ്റി എഡ്യുക്കേഷന്, വിദ്യാഭ്യാസ മന്ത്രാലയം, ഫെഡറല്‍ അതോറിറ്റി ഫോര്‍ ഏര്‍ളി ചൈല്‍ഡ്ഹുഡ് എഡ്യുക്കേഷന്, എമിറേറ്റ്സ് സ്‌കൂള്‍ എസ്റ്റാബ്ലിഷ്മെന്റ് എന്നീ സ്ഥാപനങ്ങളാണ് പുതുതായി രൂപകല്‍പ്പന ചെയ്തിരിക്കുന്നത്. ഇതിനു പുറമെ, ഓരോ എമിറേറ്റിലും പ്രാദേശിക വിദ്യാഭ്യാസ വകുപ്പുകളും പ്രവര്‍ത്തിക്കും. ഈ വ്യത്യസ്ത സ്ഥാപനങ്ങളെല്ലാം ഏകീകൃത വിദ്യാഭ്യാസ നയത്തിനു കീഴിലായിരിക്കും പ്രവര്‍ത്തിക്കുക.
ജനനം മുതല്‍ നാലാം ക്ലാസ്സ് വരെയുള്ള കുട്ടിയുടെ വികസനവുമായി ബന്ധപ്പെട്ട സമഗ്ര പദ്ധതി തയ്യാറാക്കാനുള്ള ചുമതലയാണ് ഫെഡറല്‍ അതോറിറ്റി ഫോര്‍ ഏര്‍ളി ചൈല്‍ഡ്ഹുഡ് എഡ്യുക്കേഷന് നല്‍കിയിരിക്കുന്നത്. യുഎഇ മന്ത്രിസഭയ്ക്കു കീഴില്‍ സ്ഥാപിതമായ ഈ അതോറിറ്റിയായിരിക്കും ചെറിയ പ്രായത്തിലുള്ള കുട്ടികളുടെ വിദ്യാഭ്യാസവുമായി ബന്ധപ്പെട്ട നിയമങ്ങളും പദ്ധതികളും ആവിഷ്‌ക്കരിച്ച് നടപ്പിലാക്കുക. രാജ്യത്തെ സര്‍ക്കാര്‍, സ്വകാര്യ നഴ്സറികള്‍ക്ക് ലൈസന്‍സ് നല്‍കുക, അവയുടെ പ്രവര്‍ത്തനങ്ങള്‍ നിയന്ത്രിക്കുക, അതിനാവശ്യമായ നിയമങ്ങളും ചട്ടങ്ങളും രൂപീകരിക്കുക, ചെറുപ്രായത്തിലെ കുട്ടികളുടെ പഠന കാര്യത്തില്‍ രക്ഷിതാക്കളുടെ പങ്ക് ഉറപ്പുവരുത്തുക തുടങ്ങിയ കാര്യങ്ങളും അതോറിറ്റി നിര്‍വഹിക്കും.
രാജ്യത്തെ പൊതുവിദ്യാഭ്യാസവും ഉന്നത വിദ്യാഭ്യാസവുമായി ബന്ധപ്പെട്ട നയങ്ങള്‍, തന്ത്രങ്ങള്‍, നിയമങ്ങള്‍ എന്നിവ വികസിപ്പിക്കുകയാണ് വിദ്യാഭ്യാസ മന്ത്രാലയത്തിന്റെ ചുമതല. പൊതു, സ്വകാര്യ വിദ്യാഭ്യാസ ചട്ടക്കൂടിന് രൂപം നല്‍കുക, രാജ്യത്തെ പൊതു വിദ്യാഭ്യാസ സ്ഥാപനങ്ങള്‍ക്കുള്ള കരിക്കുലം തയ്യാറാക്കുക, പഠന സാമഗ്രികള്‍ ഒരുക്കുക, നിയമങ്ങളും ചട്ടങ്ങളും രൂപീകരിക്കുക, ബന്ധപ്പെട്ട ഏജന്‍സികളുമായി സഹകരിച്ച് സ്വകാര്യ സ്‌കൂളുകള്‍ക്ക് ലൈസന്‍സ് നല്‍കുക തുടങ്ങിയവയും മന്ത്രാലയത്തിന്റെ പരിധിയില്‍ വരുന്ന കാര്യങ്ങളാണ്.
രാജ്യത്തെ എല്ലാ സര്‍ക്കാര്‍, സ്വകാര്യ വിദ്യാഭ്യാസ സ്ഥാപനങ്ങളുമായും ബന്ധപ്പെട്ട അന്താരാഷ്ട്ര പരീക്ഷകള്‍ക്ക് മേല്‍നോട്ടം വഹിക്കേണ്ടതും വിദ്യാഭ്യാസ മന്ത്രാലയമാണ്. രാജ്യത്തിന് പുറത്ത് പ്രവര്‍ത്തിക്കുന്ന വിദ്യാഭ്യാസ സ്ഥാപനങ്ങള്‍ക്കുള്ള അംഗീകാരം നല്‍കല്‍, അവയുടെ സര്‍ട്ടിഫിക്കറ്റുകളും കോഴ്സുകളും അംഗീകരിക്കല്‍, രാജ്യത്തിനകത്ത് പ്രവര്‍ത്തിക്കുന്ന വിദ്യാഭ്യാസ സ്ഥാപനങ്ങളും പരിശീലന ഇന്‍സ്റ്റിറ്റ്യൂട്ടുകളും നല്‍കുന്ന സര്‍ട്ടിഫിക്കറ്റുകളും കോഴ്സുകളും അംഗീകരിക്കല്‍ തുടങ്ങിയവയും മന്ത്രാലയത്തിന് കീഴില്‍ വരുന്ന ചുമതലകളാണ്.
രാജ്യത്തെ വിദ്യാഭ്യാസത്തിന്റെ ഗുണനിലവാരം ഉറപ്പുവരുത്തുന്നതിന് മന്ത്രിസഭയ്ക്കു കീഴില്‍ പുതുതായി രൂപീകരിക്കപ്പെട്ടതാണ് ഫെഡറല്‍ അതോറിറ്റി ഫോര്‍ ക്വാളിറ്റി ആന്റ് സ്റ്റാന്റേര്‍ഡ്സ് ഓഫ് എഡ്യുക്കേഷന്. വിദ്യാഭ്യാസ മേഖലയുടെ നേട്ടങ്ങള്‍, വിദ്യാര്‍ഥികളുടെ വിദ്യാഭ്യാസ മേഖലയിലെ പ്രകടനം, മേഖലയുടെ കാര്യക്ഷമത എന്നിവ പരിശോധിച്ച് ഉറപ്പുവരുത്തുകയാണ് അതോറിറ്റിയുടെ ചുമതല. രാജ്യത്തെ എല്ലാ തലങ്ങളിലുമുള്ള വിദ്യാഭ്യാസത്തിന്റെ ഗുണനിലവാരം ഉറപ്പുവരുത്തേണ്ട ഉത്തരവാദിത്തം അതോറിറ്റിക്കാണ്. ഇതുമായി ബന്ധപ്പെട്ട ഓഡിറ്റുകള്‍ നടത്തി ആവശ്യമായ നയപരിപാടികള്‍ക്ക് രൂപം നല്‍കേണ്ടതും അതോറിറ്റി തന്നെ.
വിദ്യാഭ്യാസ മേഖലയുടെ ഭാവിയുമായി ബന്ധപ്പെട്ട കാര്യങ്ങളില്‍ മേല്‍നോട്ടം വഹിക്കേണ്ട ചുമതലയാണ് വിദേശകാര്യ മന്ത്രി ഷെയ്ഖ് അബ്ദുല്ല ബിന്‍ സായിദ് അല്‍ നഹ്യാന്റെ അധ്യക്ഷതയിലുള്ള എഡ്യുക്കേഷന് ആന്റ് ഹ്യൂമണ്‍ റിസോഴ്സ് കൗണ്‍സിലിനുള്ളത്. വിദ്യാഭ്യാസ മേഖലയ്ക്കാവശ്യമായ പുതിയ കാഴ്ചപ്പാടുകള്‍ രൂപീകരിക്കല്‍, അവയ്ക്ക് മന്ത്രാലയത്തിന്റെ അനുമതി ലഭ്യമാക്കല്‍ തുടങ്ങിയ കാര്യങ്ങളും കൗണ്‍സിലിന്റെ പരിധിയില്‍ വരുന്ന കാര്യങ്ങളാണ്.
യുഎഇ മന്ത്രിസഭയുടെ കീഴില്‍ വരുന്ന എമിറേറ്റ്സ് സ്‌കൂള്‍ എസ്റ്റാബ്ലിഷ്മെന്റ് എന്ന സ്ഥാപനത്തിനാണ് രാജ്യത്തെ സര്‍ക്കാര്‍ സ്‌കൂളുകളുടെയും നഴ്സറികളുടെയും കാര്യക്ഷമത വര്‍ധിപ്പിക്കാനുള്ള ചുമതല. രാജ്യത്തെ പൊതു വിദ്യാലയങ്ങള്‍ക്ക് മേല്‍നോട്ടം വഹിക്കുക, ഇവയുടെ കാര്യക്ഷമതയും ഗുണനിലവാരവും വര്‍ധിപ്പിക്കുന്നതിനുള്ള നയപരിപാടികള്‍ രൂപീകരിച്ച് നടപ്പിലാക്കുക, വിദ്യാര്‍ഥികള്‍ക്കായുള്ള വിവിധ പദ്ധതികള്‍ നടപ്പിലാക്കുക, സ്‌കൂളുകളിലെ വിവിധ പ്രവര്‍ത്തന പദ്ധതികള്‍ക്ക് മേല്‍നോട്ടം വഹിക്കുക, നവീനവും സര്‍ഗാത്മകവുമായ പുതിയ വിദ്യാഭ്യാസ മാതൃകകള്‍ അവതരിപ്പിക്കുക തുടങ്ങിയവയും ഇതിന്റെ പരിധിയില്‍ വരും.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല