വീസ സംബന്ധമായ പ്രശ്നങ്ങൾക്ക് വീഡിയോ കോൾ സേവനം; ആദ്യഘട്ടം വിജയമെന്ന് ജിഡിആർഎഫ്‌എ

സ്വന്തം ലേഖകൻ: വീസ സംബന്ധമായ വിവിധ ആവശ്യങ്ങൾ പരിഹരിക്കുന്നതിന് വേണ്ടി ദുബായിലെ ജനറൽ ഡയറക്ടറേറ്റ് ഓഫ് റെസിഡൻസി ആൻഡ് ഫോറിൻ അഫയേഴ്‌സ് ആരംഭിച്ച വീഡിയോ കോൾ സർവീസസ് ഉപഭോക്താക്കൾക്ക് കൂടുതൽ ഗുണം ചെയ്തന്ന് ജിഡിആർഎഫ്‌എ. വിഷ്വൽ കമ്മ്യൂണിക്കേഷൻ സർവീസസ് എന്ന പേരിലുള്ള ഈ സേവനം എമിഗ്രേഷൻ ഓഫീസുകൾ സന്ദർശിക്കാത്ത തന്നെ വ്യക്തികളെ ഉദ്യോഗസ്ഥരുമായി വീഡിയോ കോളുകളിലൂടെ ബന്ധപ്പെടാൻ അനുവദിക്കുന്നു. അവരുടെ വീസ പ്രശ്‌നങ്ങൾ വേഗത്തിലും കാര്യക്ഷമമായും പരിഹരിക്കാനും സഹായിക്കുന്നു.

ദുബായിൽ വെച്ച് അപേക്ഷിച്ച സേവനങ്ങളെ കുറിച്ചറിയാനും, അപേക്ഷിച്ച രേഖകളിലെ ന്യൂനതകൾ പരിഹരിക്കാനും വീഡിയോ കോൾ ഉപഭോക്താക്കളെ ഏറെ സഹായിക്കുന്നുവെന്ന് ജിഡിആർഎഫ്‌എ അറിയിച്ചു. വേഗമേറിയതും സൗകര്യപ്രദവുമായ ഈ സംവിധാനം ഉപഭോക്താക്കളുടെ പ്രശ്നങ്ങൾ വേഗത്തിൽ പിരഹരിക്കുകയാണ് ലക്ഷ്യം വെക്കുന്നതെന്ന് മേധാവി ലഫ്റ്റനന്റ് ജനറൽ മുഹമ്മദ്‌ അഹ്‌മദ്‌ അൽ മർറി പറഞ്ഞു.

വീഡിയോ കോൾ ചെയ്യാൻ വളരെ വേഗത്തിൽ സാധിക്കുന്ന തരത്തിലാണ് ഈ സംവിധാനം ഒരുക്കിയിരിക്കുന്നത്. ജിഡിആർഎഫ്എ വെബ്സൈറ്റ് സന്ദർശിച്ച് വീഡിയോ കോൾ ഓപ്ഷൻ തിരഞ്ഞെടുക്കാവുന്നതാണ്. പേര്, ഇമെയിൽ ഐഡി, മൊബൈൽ നമ്പർ, എമിറേറ്റ്‌സ് ഐഡി അല്ലെങ്കിൽ പാസ്‌പോർട്ട് വിവരങ്ങൾ എന്നിവയുൾപ്പെടെയുള്ള വിവരങ്ങൾ നൽകണം. വീഡിയോ വഴി ഇമിഗ്രേഷൻ ഉദ്യോഗസ്ഥരുമായി നേരിട്ട് ബന്ധപ്പെടാനും സാധിക്കും.

വീഡിയോ കോൾ സേവനം ഇപ്പോൾ ഓഫീസ് സമയത്തിൽ മാത്രമാണ് ലഭ്യമായിട്ടുള്ളത്. ഭാവിയിൽ 24/7 മണിക്കൂറും സേവനങ്ങൾ ലഭ്യമാക്കാനുള്ള പദ്ധതിയുണ്ട്. വിഡിയോ കോൾ സർവീസസ് ആരംഭിച്ചത് മുതൽ നല്ല പ്രതികരണം ആണ് ലഭിക്കുന്നതെന്ന് ലഫ്റ്റനന്റ് ജനറൽ അറിയിച്ചു. 250,000 വീഡിയോ കോൾ സേവനങ്ങൾ വിജയകരമായി ഇതുവരെ പൂർത്തിയാക്കി. വീസ സംബന്ധമായ ഏത് അന്വേഷണങ്ങൾക്കും 8005111 എന്ന ടോൾഫ്രീ നമ്പറിലേക്ക് ബന്ധപ്പെടാവുന്നതാണെന്ന് അദ്ദേഹം കൂട്ടിച്ചേർത്തു.

സാങ്കേതിക സംവിധാനങ്ങൾ ഉപയോഗിക്കുന്നതിലൂടെ കൂടുതൽ സമയ ലാഭം ഉണ്ടാകുന്നു. ഇമിഗ്രേഷൻ ഉദ്യോഗസ്ഥരുമായി ഉപഭോക്താക്കൾക്ക് നേരിട്ട് സംസാരിക്കാൻ സാധിക്കുന്നതിലൂടെ പല പ്രശ്നങ്ങൾക്കും പെട്ടെന്ന് പരിഹാരം കണ്ടെത്താൻ സാധിക്കുന്നു. ഉപഭോക്താക്കൾക്ക് ഓഫീസുകളിൽ നേരിട്ടെത്തി നീണ്ട നേരം കാത്തിരിക്കേണ്ടി വരില്ല. വീസയുമായി ബന്ധപ്പെട്ട ആശങ്കകൾ വേഗത്തിൽ പരിഹരിക്കാൻ സാധിക്കും. വിനോദസഞ്ചാരികൾ, വിസിറ്റ് വീസയിൽ എത്തുന്നവർ, ബിസിനസ്സ് യാത്രക്കാർ എന്നിങ്ങളെ നിരവധി പേർക്ക് ഈ പുതിയ സംവിധാനം ഏറെ പ്രയോജനപ്പെടുമെന്നാണ് പ്രതീക്ഷിക്കപ്പെടുന്നത്.