സ്വന്തം ലേഖകൻ: യുഎഇയിൽ വർക് പെർമിറ്റ് ലഭിക്കാൻ ആറു വ്യവസ്ഥകൾ പ്രധാനമെന്ന് അധികൃതർ. 18 വയസ്സ് തികയാത്തവർക്ക് തൊഴിൽ വിസ ലഭിക്കില്ലെന്നും മാനവവിഭവശേഷി സ്വദേശിവൽക്കരണ മന്ത്രാലയം അറിയിച്ചു. എന്നാൽ കൗമാരക്കാർക്കും വിദ്യാർഥികൾക്കും തൊഴിൽ പരിശീലനത്തിന് നൽകുന്ന പ്രത്യേക വർക് പെർമിറ്റുകൾക്ക് ഇതു ബാധകമല്ല.
പ്രഫഷനൽ തസ്തികകൾക്കുള്ള വർക് പെർമിറ്റിന് ഉയർന്ന യോഗ്യത തെളിയിക്കുന്ന സർട്ടിഫിക്കറ്റുകൾ നിർബന്ധമാണ്.ഇവ തസ്തികയ്ക്കു ചേരുന്നതാകണം. സ്ഥാപനങ്ങളുടെ പ്രവർത്തന സ്വഭാവവുമായി ബന്ധമില്ലാത്ത തസ്തികകളും സർട്ടിഫിക്കറ്റുകളും സ്വീകരിക്കില്ല. കമ്പനികളുടെ പേരിൽ മന്ത്രാലയത്തിൽ നിയമ ലംഘനമുണ്ടെങ്കിലും അപേക്ഷകൾ നിരസിക്കും. സ്ഥാപന ഉടമയ്ക്ക് പകരം കമ്പനികളുടെ ഇടപാടുകൾക്ക് ചുമതലപ്പെടുത്തിയ വ്യക്തിയാണു അപേക്ഷകളിൽ ഒപ്പുവയ്ക്കുന്നതെങ്കിൽ അതു തെളിയിക്കുന്ന രേഖയും വേണം.
സ്ഥാപനത്തിന്റെ ട്രേഡ് ലൈസൻസ് കാലാവധി തീർന്നാലും വിസ അപേക്ഷകൾ സ്വീകരിക്കില്ല. തൊഴിൽ വിസകൾ പുതുക്കുമ്പോഴും നിശ്ചിത വ്യവസ്ഥകൾ പാലിക്കണം. യോഗ്യത തെളിയിക്കേണ്ട തസ്തികകളിൽ സർട്ടിഫിക്കറ്റ് നൽകിയാണ് പുതുക്കൽ പ്രക്രിയകൾ പൂർത്തിയാക്കേണ്ടത്. പുതിയതും പുതുക്കുന്നതുമായ തൊഴിൽ വിസകൾക്ക് ഫീസ് നിശ്ചയിക്കുന്നത് മന്ത്രാലയത്തിലെ പട്ടികയിൽ കമ്പനിയുടെ സ്ഥാനം പരിഗണിച്ചാണ്.
നിങ്ങളുടെ അഭിപ്രായങ്ങള് ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള് എന് ആര് ഐ മലയാളിയുടെ അഭിപ്രായമാവണമെന്നില്ല