സ്വന്തം ലേഖകൻ: യുകെയിൽ സർക്കാരിൻ്റെ കോവിഡ് യാത്രാ നിയന്ത്രണങ്ങൾക്ക് വിമർശനം. ജനുവരി മുതൽ ഏപ്രിൽ വരെയുള്ള കാലയളവിൽ 15 ദശലക്ഷത്തിലധികം ആളുകൾ യുകെയിലേക്ക് പറന്നതായി പുതിയ കണക്കുകൾ വെളിപ്പെടുത്തുന്നു. അതിർത്തികളിൽ കർശന നിയന്ത്രണം പാലിക്കേണ്ട സമയത്തായിരുന്നു ഈ വരവ്.
2021 ൽ വന്നവരിൽ മൂന്നിൽ രണ്ട് പേരും യുകെ ഇതര പൗരന്മാരാണെന്ന് ഹോം ഓഫീസ് ഡാറ്റ കാണിക്കുന്നു. 2020 മാർച്ചിൽ ലോക്ക്ഡൗൺ ആരംഭിച്ചതു മുതൽ 12 ദശലക്ഷത്തിലധികം ആളുകൾ യുകെയിലേക്ക് പറന്നതായി പുതിയ സ്ഥിതിവിവര കണക്കുകൾ വെളിപ്പെടുത്തുന്നു, ഈ വർഷം ആദ്യ നാല് മാസങ്ങളിൽ 1.59 ദശലക്ഷം പേർ രാജ്യത്ത് പ്രവേശിച്ചു. സർക്കാരിന്റെ അതിർത്തി നയം ദുർബലവും അപകടകരവുമാണെന്ന് കണക്കുകൾ വ്യക്തമാക്കുന്നുവെന്ന് ലേബർ വൃത്തങ്ങൾ വിമർശനം ഉന്നയിച്ചു കഴിഞ്ഞു.
“കോവിഡിനെതിരായ കൺസർവേറ്റീവുകളുടെ അതിർത്തി നിയന്ത്രണ നയങ്ങൾ ദുർബലവും അപകടകരവുമാണെന്ന് ഷാഡോ ഹോം സെക്രട്ടറി നിക്ക് തോമസ്-സൈമണ്ട്സ് പറഞ്ഞു. ദശലക്ഷക്കണക്കിന് ആളുകൾ യുകെയിലേക്ക് വരുമ്പോൾ ഒരു ചെറിയ ശതമാനം മാത്രമാണ് ഹോട്ടൽ ക്വാ റൻ്റീനിൽ പോകുന്നതെന്നും സൈമണ്ട്സ് ചൂണ്ടിക്കാട്ടി.
അതിനിടെ യുകെയിലെ പുതിയ കോവിഡ് കേസുകളിൽ മുക്കാൽ ഭാഗവും ഇന്ത്യയിലെ വ്യാപകമായ ബി 1.617 വകഭേദമാണെന്ന് ആരോഗ്യ സെക്രട്ടറി മാറ്റ് ഹാൻകോക്ക് പറഞ്ഞു. പബ്ലിക് ഹെൽത്ത് ഇംഗ്ലണ്ട് ഡാറ്റ കാണിക്കുന്നത് വേരിയന്റിന്റെ കേസുകൾ കഴിഞ്ഞ ആഴ്ച മുതൽ ക്രമമായി വർദ്ധിച്ച് 6,959 ലെത്തി.
നിയന്ത്രണങ്ങൾ ലഘൂകരിച്ചതിനാൽ കേസുകൾ ഉയരുമെന്ന് സർക്കാർ പ്രതീക്ഷിച്ചിരുന്നതായി ഹാൻകോക്ക് ഡൗണിംഗ് സ്ട്രീറ്റ് വാർത്താ സമ്മേളനത്തിൽ പറഞ്ഞു. കേസുകളും ആശുപത്രി പ്രവേശിനങ്ങളും തമ്മിലുള്ള ബന്ധം നിരീക്ഷിക്കുന്നത് നിർണായകമാണെന്നും അദ്ദേഹം കൂട്ടിച്ചേർത്തു.
വ്യാഴാഴ്ച, 3,542 കൊറോണ വൈറസ് കേസുകളും പോസിറ്റീവായതിന് ശേഷം 28 ദിവസത്തിനുള്ളിൽ 10 മരണങ്ങളും യുകെയിൽ റിപ്പോർട്ട് ചെയ്തിട്ടുണ്ട്. തുടർച്ചയായ രണ്ടാം ദിവസമാണ് പുതിയ കോവിഡ് കേസുകളുടെ എണ്ണം 3,000 കടക്കുന്നത്. ഏപ്രിൽ പകുതിക്ക് ശേഷം ആദ്യമായാണ് വ്യാപന നിരക്ക് ഇത്തരത്തിൽ ഉയരുന്നത്. കഴിഞ്ഞ ഏഴു ദിവസങ്ങളിൽ കേസുകൾ 20.5% ഉയർന്നു.
അതേസമയം എല്ലാ കോവിഡ് നിയന്ത്രണങ്ങളും നീക്കുന്നതിന് കാത്തിരിക്കേണ്ടി വരുമെന്ന് പ്രധാനമന്ത്രി ബോറിസ് ജോൺസൺ പറഞ്ഞു. നിലവിൽ ജൂൺ 21 നാണ് കോവിഡ് നിയന്ത്രണങ്ങൾ പൂർണമായും നീക്കുന്നതിന് റോഡ് മാപ്പ് ലക്ഷ്യമിടുന്നത്. പുതിയ വകഭേദം മൂലമുള്ള കേസുകളുടെ എണ്ണത്തിൽ വർധനയുണ്ടായതായും കണക്കുകൾ കാണിക്കുന്നു.
നിയന്ത്രണങ്ങൾ കുറയുമ്പോൾ അണുബാധയുടെ തോത് വർദ്ധിക്കുമെന്ന് സർക്കാർ ശാസ്ത്രജ്ഞർ വ്യക്തമാക്കിയിരുന്നു, പ്രത്യേകിച്ച് ഇൻഡോറിൽ ഒത്തുചേരലുകൾ അനുവദിച്ചതിനാൽ. ജൂൺ 21 ന് റോഡ്മാപ്പിന്റെ അവസാന ഘട്ടത്തിലേക്ക് നീങ്ങുമെന്ന പ്രതീക്ഷയിലാണ് സർക്കാർ ഇപ്പോഴും. ഈ ഘട്ടത്തിൽ ഇടപഴകുന്നതിനുള്ള എല്ലാ നിയമപരമായ പരിധികളും നീക്കം ചെയ്യുകയും നൈറ്റ്ക്ലബ്ബുകൾ വീണ്ടും തുറക്കുകയും ചെയ്യും. കൂടാതെ വലിയ ഇവന്റുകളിലെയും കൂടിച്ചേരലുകളിലെയും നിയന്ത്രണങ്ങളും നീക്കും.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല