സ്വന്തം ലേഖകൻ: 90 ശതമാനമാണ് യുഎഇയിലെ പ്രവാസി ജനസംഖ്യ. ഇവരിലേറെയും പേര്‍ സ്വന്തം വീട്ടുകാരുമായും നാട്ടിലെ സുഹൃത്തുക്കളുമായും ആശയ വിനിമയം നടത്താന്‍ ഉപയോഗിക്കുന്നത് പ്രധാനമായും സൗജന്യ ഇന്റര്‍നെറ്റ് കോളിംഗ് ആപ്പുകളിലൂടെയാണ്. എന്നാല്‍ യുഎഇയില്‍ ഇക്കാര്യത്തില്‍ കര്‍ശനമായ നിയന്ത്രണങ്ങള്‍ നിലനില്‍ക്കുന്നുണ്ട്. വോയിസ് ഓവര്‍ ഇന്റര്‍നെറ്റ് പ്രോട്ടോകോള്‍ അഥവാ വോയ്പ്പ് സാങ്കേതിക വിദ്യ ഉപയോഗിച്ചാണ് ഫോണിന്റെ സഹായമില്ലാതെ ഇന്റര്‍നെറ്റ് കണക്ഷന്‍ മാത്രം ഉപയോഗിച്ച് വോയ്‌സ്, വീഡിയോ കോളുകള്‍ ചെയ്യുന്നത്. യുഎഇയില്‍ വെര്‍ച്വല്‍ പ്രൈവറ്റ് നെറ്റ് വര്‍ക്ക് അഥവി വിപിഎന്‍ ഉപയോഗിച്ച് സൗജന്യ വീഡിയോ, ഓഡിയോ കോളിംഗ് ആപ്പുകള്‍ ഡൗണ്‍ലോഡ് ചെയ്ത് ഉപയോഗിക്കാം.
യുഎഇയില്‍ വാട്ട്‌സ്ആപ്പ് വഴി ഓഡിയോ കോള്‍ ചെയ്യാനോ വീഡിയോ കോള്‍ ചെയ്യാനോ അനുവാദമില്ല. അതുകൊണ്ടു തന്നെ അതിനുള്ള ഓപ്ഷനുകള്‍ വാട്ട്‌സ്ആപ്പ് യുഎഇ ഉപഭോക്താക്കള്‍ക്ക് നല്‍കുന്നുമില്ല. ടെക്‌സ്റ്റ് സന്ദേശം അയക്കാനും വോയ്‌സ് മെസേജുകള്‍ അയക്കാനും മാത്രമേ ഇവിടെ വാട്ട്‌സ്ആപ്പ് വഴി സാധിക്കൂ. വാട്ട്‌സ്ആപ്പ് കോളിന് അനുമതി ലഭിക്കുമെന്ന് നേരത്തേ റിപ്പോര്‍ട്ടുകള്‍ ഉണ്ടായിരുന്നു എങ്കിലും ഇക്കാര്യത്തില്‍ ഒരു തീരുമാനം ആയിട്ടില്ല. യുഎഇ നിയമ പ്രകാരം വിപിഎന്‍ ദുരുപയോഗം ചെയ്യുന്നത് 20 ലക്ഷം ദിര്‍ഹം വരെ പിഴയും തടവും ലഭിക്കാവുന്ന കുറ്റകൃത്യമാണ്.
എന്നാല്‍ പ്രതിസന്ധി മറികടക്കുന്നതിനായി യുഎഇയിലെ ടെലികോം സര്‍വീസ് ദാതാക്കളായ ഇത്തിസാലാത്ത്, ഡൂ എന്നീ കമ്പനികള്‍ ഗോചാറ്റ്, ബോട്ടിം, വോയ്‌സോ എന്നീ ആപ്പുകള്‍ വഴി ഇന്റര്‍നെറ്റ് ഉപയോഗിച്ച് ഓഡിയോ, വീഡിയോ കോളുകള്‍ ചെയ്യാന്‍ അവസരം നല്‍കുന്നുണ്ട്. ഇതിനായി ദിവസ പ്ലാനുകളും മാസ പ്ലാനുകളും കമ്പനികള്‍ ഓഫര്‍ ചെയ്യുന്നുണ്ട്. ഒരു ദിവസത്തേക്ക് അഞ്ച് ദിര്‍ഹം ആണ് കുറഞ്ഞ നിരക്ക്. യുഎഇയില്‍ പണം നല്‍കിയോ സൗജന്യമായോ ഇന്റര്‍നെറ്റ് കോളുകള്‍ ചെയ്യാവുന്ന ആപ്പുകള്‍ ഇവയൊക്കെയാണ്.
ഗോചാറ്റ്: ജൂലൈ ഒന്ന് മുതലാണ് സൗജന്യ ഓഡിയോ, വീഡിയോ കോളിംഗ് ആപ്പായ ഗോചാറ്റ് മെസഞ്ചര്‍ ഇത്തിസാലാത്ത് യുഎഇ മുന്നോട്ടുവച്ചത്. ആന്‍ഡ്രോയിഡ്, ആപ്പിള്‍ പ്ലാറ്റ്‌ഫോമുകളില്‍ നിന്ന് ആപ്പ് ഡൗണ്‍ലോഡ് ചെയ്യാം. യുഎഇക്ക് അകത്തും പുറത്തും ഇത് ഡോണ്‍ലോഡ് ചെയ്‌തെടുക്കാം. രജിസ്റ്റര്‍ ചെയ്യാന്‍ ഒരു മൊബൈല്‍ നമ്പര്‍ വേണമെന്ന് മാത്രമേയുള്ളൂ. യുഎഇയിലെ താമസക്കാര്‍ക്ക് ബില്ലുകള്‍ അടക്കാനും പണം അയക്കാനും ഗെയിം കളിക്കാനും ഭക്ഷണം ഓര്‍ഡര്‍ ചെയ്യാനുമൊക്കെ ഈ ആപ്പ് ഉപയോഗിക്കാം. മൊബൈല്‍ ഡാറ്റ ഉപയോഗിക്കാതെ ഗോചാറ്റ് വഴി ആഭ്യന്തര, അന്താരാഷ്ട്ര കോളുകള്‍ ചെയ്യാനുള്ള രണ്ട് പാക്കേജുകളും ഇത്തിസാലാത്ത് മുന്നോട്ടുവച്ചിട്ടുണ്ട്. 50 ദിര്‍ഹമിന്റെ പ്ലാന്‍ പ്രകാരം 250 മിനുട്ട് അന്താരാഷ്ട്ര കോളുകള്‍ ചെയ്യാം. 99 ദിര്‍ഹം പ്ലാന്‍ ഉപയോഗിച്ച് 1500 മിനുട്ട് വിളിക്കാനാണ് അവസരമുള്ളത്.
ബോട്ടിം: വിപിഎന്‍ കണക്ഷന്‍ ഉപയോഗിച്ച് യുഎഇയില്‍ ഉപയോഗിക്കുന്ന മറ്റൊരു ആപ്പാണ് ബോട്ടിം. ഇതു വഴി ഓഡിയോ, വീഡിയോ കോളുകള്‍ ചെയ്യാമെന്നു മാത്രമല്ല, ഫോട്ടോകള്‍, വീഡിയോകള്‍, വോയിസ് ക്ലിപ്പുകള്‍, എസ്എംഎസ്സുകള്‍, കോണ്‍ടാക്ടുകള്‍, ലോക്കേഷനുകള്‍, വെബ് ക്ലിപ്പുകള്‍ തുടങ്ങിയവ അയക്കാനും ഇതിലൂടെ സാധിക്കും. അതിനു പുറമെ, 500 പേരെ വരെ പങ്കെടുപ്പിച്ച് ഗ്രൂപ്പ് ചാറ്റിനുള്ള സൗകര്യവും ഇതിലുണ്ട്.
വോയിസോ: ഇത്തിസാലാത്ത് തങ്ങളുടെ വരിക്കാര്‍ക്ക് കോള്‍ ചെയ്യാന്‍ അനുമതി നല്‍കിയിരിക്കുന്ന മറ്റൊരു ആപ്പാണ് വോയ്‌സോ. വിദേശത്തുള്ളവരുമായി ബന്ധപ്പെടാന്‍ ഈ ആപ്പ് ഡൗണ്‍ലോഡ് ചെയ്യാം. വ്യക്തമായ ഓഡിയോ വീഡിയോ കോളുകള്‍ ചെയ്യാമെന്നതാണ് ഇതിന്റെ സവിശേഷത. മൊബൈലിലും ഡെസ്‌ക്ടോപ്പിലും ഇത് ഡൗണ്‍ലോഡ് ചെയ്യാം. ഫോട്ടോകള്‍, വീഡിയോകള്‍, അനിമേറ്റഡ് സ്റ്റിക്കറുകള്‍ എന്നിവയും ഇതു വഴി അയക്കാം. ചാറ്റുകളെ 100ലേറെ ഭാഷകളിലേക്ക് വിവര്‍ത്തനം ചെയ്യാനുള്ള സൗകര്യവും ഇതിലുണ്ട്.
ഗൂഗ്ള്‍ മീറ്റ്: കോവിഡ് മഹാമാരി ലോകമൊട്ടാകെ വ്യാപിച്ച കാലത്താണ് ആശയ വിനിയത്തിനുള്ള പ്രധാന ഉപാധിയായി ഗൂഗ്ള്‍ മീറ്റ് ആപ്പ് മാറിയത്. ഈ കാലത്ത് വലിയ ഡിമാന്റ് ആഗോള തലത്തില്‍ ഈ ആപ്പിനുണ്ടായി. ഇതുവഴി വലിയ യോഗങ്ങള്‍ വിളിച്ചുകൂട്ടാമെന്നതാണ് പ്രധാന സവിശേഷത. യുഎഇയില്‍ ഇത് വ്യക്തികള്‍ക്കും ബിസിനസ് സ്ഥാപനങ്ങള്‍ക്കും സൗജന്യമായി ഡൗണ്‍ലോഡ് ചെയ്ത് ഉപയോഗിക്കാന്‍ അനുമതിയുണ്ട്. ഡെസ്‌ക്ടോപ്പിലും ഐഒഎസ്, ആന്‍ഡ്രോയിഡ് പ്ലാറ്റ്‌ഫോമുകളിലും ഇത് ഉപയോഗിക്കാം.
മൈക്രോസോഫ്റ്റ് ടീംസ്: ഗൂഗ്ള്‍ മീറ്റ് പോലെ തന്നെ കോവിഡ് കാലത്താണ് മൈക്രോസോഫ്റ്റ് ടീംസ് ആപ്പിനും വലിയ പ്രചാരണം ലഭിച്ചത്. ബിസിനസ് സ്ഥാപനങ്ങളാണ് പ്രധാനമായും ഇത് ഉപയോഗിക്കാന്‍ മുന്നോട്ടുവന്നത്. കോവിഡ് കാലത്ത് ഇതുപയോഗിച്ച് വീഡിയോ കോണ്‍ഫറന്‍സ് വഴി യോഗങ്ങള്‍ നടത്താന്‍ സാധിച്ചു. 60 മിനുട്ട് വരെ ഈ രീതിയില്‍ സൗജന്യമായി യോഗം ചേരാന്‍ ഇതുവഴി സാധിക്കും. മിതമായ നിരക്കില്‍ പണം കൊടുത്ത് ഇത് കൂടുതല്‍ സമയം ഉപയോഗിക്കും ചെയ്യാം.
സ്‌കൈപ്പ് ബിസിനസ്: യുഎഇയിലെ ബിസിനസ് സ്ഥാപനങ്ങള്‍ക്ക് തങ്ങളുടെ ആശയ വിനിമയങ്ങള്‍ക്കായി സ്‌കൈപ്പ് ബിസിനസ് ആപ്പ് ഉപയോഗിക്കാന്‍ അനുമതിയുണ്ട്. ഇതു വഴി തങ്ങളുടെ ഉപഭോക്താക്കളുമായി ഓഡിയോ, വീഡിയോ കോളുകള്‍ ചെയ്യാം. എല്ലാ പ്ലാറ്റ്‌ഫോമിലും സൗജന്യമായി ഡൗണ്‍ലോഡ് ചെയ്യാന്‍ സാധിക്കുന്ന ആപ്പാണിത്.
സൂം: ആഗോള തലത്തില്‍ തന്നെ ഏറ്റവും പ്രചാരത്തിലുള്ള ഓഡിയോ, വീഡിയോ കോളിംഗ് ആപ്പാണ് സൂം. യുഎഇയില്‍ ഇത് ഡൗണ്‍ലോഡ് ചെയ്ത് ഉപയോഗിക്കാന്‍ അനുമതിയുണ്ട്. വ്യക്തികള്‍ക്കും സ്ഥാപനങ്ങള്‍ക്കും ഇത് ഉപയോഗിച്ച് കോളുകള്‍ ചെയ്യാം.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല