മെൻസാ ഐക്യൂ ടെസ്റ്റിൽ റെക്കോർഡ് സ്‌കോർ സ്വന്തമാക്കി കെന്റിലെ പതിനൊന്നുകാരി

അലക്സ് വർഗീസ്: പതിനൊന്നാം വയസിൽ കെന്റിൽ നിന്നുള്ള സ്‌കൂൾ വിദ്യാർത്ഥിനി എലയ്‌ന ജിനു പാഡി ബ്രിട്ടീഷ് മെൻസാ ഐ ക്യൂ ടെസ്റ്റിൽ പരമാവധി സ്‌കോർ നേടി പഴമയിലും പ്രശസ്തിയിലും ഒന്നാമതുള്ള മെൻസ ഹൈ ഐക്യൂ സൊസൈറ്റിയുടെ അംഗത്വം കരസ്ഥമാക്കിയിരിക്കുന്നു. ഐക്യൂ ടെസ്റ്റിൽ ഏറ്റവും ഉയർന്ന സ്‌കോർ കരസ്ഥമാക്കുന്ന രണ്ട് ശതമാനം ആളുകൾക്ക് മാത്രമായി മെൻസ ഹൈ ഐ ക്യൂ സൊസൈറ്റി അംഗത്വം പരിമിതപ്പെടുത്തിയിട്ടുണ്ട്. പരമാവധി സ്കോറായ 162 കരസ്ഥമാക്കിയ എലയ്‌ന, ലോകത്തെമ്പാടുനിന്നും ഈ പരീക്ഷയിൽ പങ്കെടുക്കുന്നവരിലെ 99.998 ശതമാനത്തേയും പിന്നിലാക്കി.

കെന്റിലെ സെക്കന്ററി സ്‌കൂളായ ഇൻവിക്റ്റാ ഗ്രാമർ സ്‌കൂളിലേക്ക് 11+ പരീക്ഷയിൽ ഉയർന്ന മാർക്കോടെ എലയ്‌ന ഈയിടെ പ്രവേശനം നേടിയിരുന്നു. സഹോദരി ഹാനയുടെ പ്രോത്സാഹനത്താൽ പ്രചോദിതയായി മെൻസ പരീക്ഷക്ക് വേണ്ട കുറഞ്ഞ പ്രായപരിധിയായ പത്തര വയസെത്തിയപ്പോൾ തന്നെ എലയ്‌ന ടെസ്റ്റിന് തയ്യാറായിരുന്നെങ്കിലും കോവിഡ്-19 മഹാമാരികാരണം ടെസ്റ്റിന് നിശ്ചയിച്ച തീയതി 2020 ഒക്ടോബറിലേക്ക് നീണ്ടുപോവുകയായിരുന്നു. ഇൻവെസ്റ്റ്മെൻറ് കൺസൾട്ടന്റ് ജിനു മാത്യുവിൻറെയും ഗവേഷണ ശാസ്ത്രജ്ഞ ഡോ. സ്വപ്ന തോമസിന്റേയും മകളായ ഈ കൊച്ചുമിടുക്കിയാണ് 120,000 മാത്രം അംഗങ്ങളുള്ള മെൻസയുടെ ഹൈ ഐ ക്യൂ സൊസൈറ്റി അംഗത്വമെന്ന അഭിമാനകരമായ നേട്ടം കൈവരിച്ചത്.

പുസ്തകപ്രേമിയായ എലയ്‌ന ഇതിനോടകം 600-ലധികം പുസ്തകങ്ങൾ വായിച്ചുകഴിഞ്ഞിട്ടുണ്ട്. വായനയിൽ കുറ്റാന്വേഷണവും, മിസ്റ്ററിയും ത്രില്ലറുകളുമാണ് എലയ്‌നയുടെ ഇഷ്ടവിഷയങ്ങൾ. ബ്രൂക് തിയേറ്ററിൽ അവതരിപ്പിച്ച ‘മേക്കിങ് വെയ്‌വ്‌സ്’ എന്ന സംഗീത നാടകം തയ്യാറാക്കാനായി മെഡ് വേയിലെ പ്രൈമറി സ്‌കൂളുകളിൽനിന്ന് തിരഞ്ഞെടുക്കപ്പെട്ട സർഗ്ഗാത്മക രചനയിൽ പ്രതിഭയുള്ള കുട്ടികളിൽ എലയ്‌നയും ഉൾപ്പെട്ടിരുന്നു. നൃത്തത്തിലും പാട്ടിലും താല്പര്യമുള്ള എലയ്‌ന സഹോദരിയുടെ മാതൃക പിൻതുടർന്ന് മൂന്ന് വയസ് മുതൽതന്നെ ലാസ്യ സ്കൂൾ ഓഫ് പെർഫോമിങ് ആർട്സിൽ നിന്ന് ഇന്ത്യൻ ശാസ്ത്രീയ നൃത്തമായ ഭരതനാട്യം അഭ്യസിക്കുന്നു.

ലണ്ടനിലെ ഓറിയന്റൽ എക്‌സാമിനേഷൻ ബോർഡ് ഭരതനാട്യത്തിന് ഏർപ്പെടുത്തിയിട്ടുള്ള ഒന്നുമുതൽ നാലുവരെയുള്ള ഗ്രെയ്‌ഡുകൾ ഡിസ്റ്റിങ്ങ്ഷനോടെ പൂർത്തിയാക്കിയ എലയ്‌നയിപ്പോൾ അഞ്ചാം ഗ്രെയ്‌ഡിനുള്ള തയ്യാറെടുപ്പിലാണ്. മെഡ് വേ NHS ചാരിറ്റി ഫൗണ്ടേഷൻ ട്രസ്റ്റിന്റെ NHS70 ഫണ്ട്റേയ്സിങ്ങ് ചാരിറ്റി ഈവെന്റ്, ദി ഹെരിറ്റേജ്- മെഡ് വേ ആർട്ട് എക്സിബിഷൻ തുടങ്ങി വിവിധ വേദികളിൽ എലയ്‌ന ഭരതനാട്യവും ബോളിവുഡ് സിനിമാറ്റിക് ഡാൻസും അവതരിപ്പിച്ചിട്ടുണ്ട്. സ്‌കൂൾ പ്രൈമറി തലത്തിൽ നാലാം വർഷം തന്നെ എലയ്‌ന മുതിർന്ന കുട്ടികളെ വരെ പിന്നിലാക്കി ടാലന്റ് ഷോയിലും ഒന്നാമതെത്തിയിരുന്നു. കെ-പോപ്പും അനിമേയും ഇഷ്ടപ്പെടുന്ന എലയ്‌ന സഹോദരിയോടൊപ്പം മൂന്ന് വയസിൽ തന്നെ പള്ളിയിലെ കുട്ടികളുടെ ഗായകസംഘത്തിലെ അംഗമാവുകയും സ്‌കൂൾ ഗായകസംഘത്തിൽ പിയാനോ അഭ്യസിക്കുകയും ചെയ്യുന്നു.

ഫോറൻസിക്‌സിൽ പ്രത്യേക താത്പര്യത്തോടെ നിയമബിരുദം സമ്പാദിക്കണമെന്ന എലയ്‌നയുടെ ആഗ്രഹത്തിനും രക്ഷിതാക്കളുടെ പൂർണ്ണ പിന്തുണയുണ്ട്.

ലോകമെമ്പാടുമുള്ള ആയിരക്കണക്കിന് വിദ്യാർത്ഥികൾ എഴുതുന്ന മെൻസാ ഐക്യൂ ടെസ്റ്റിൽ പരമാവധി സ്കോർ നേടി മെൻസാ ഐക്യൂ സൊസൈറ്റിയിൽ അംഗത്വം കരസ്ഥമാക്കിയ മിടുമിടുക്കി എലയ്നാ ജിനുവിനെ യുക്മ ദേശീയ സമിതിയ്ക്ക് വേണ്ടി പ്രസിഡൻ്റ് മനോജ്കുമാർ പിള്ള, സെക്രട്ടറി അലക്സ് വർഗ്ഗീസ്, വൈസ് പ്രസിഡൻറ് അഡ്വ.എബി സെബാസ്റ്റ്യൻ എന്നിവർ അഭിനന്ദിച്ചു.