സ്വന്തം ലേഖകൻ: അബുദാബിയിലെ ബിഗ് ടിക്കറ്റ് നറുക്കെടുപ്പില്‍ ഇരുപത് കോടി രൂപ (10 ദശലക്ഷം ദിര്‍ഹം) തേടിയെത്തിയത് ഒമാനിലെ പ്രവാസി മലയാളിക്ക്. രഞ്ജിത്ത് വേണുഗോപാല്‍ (42) ആണ് വെള്ളിയാഴ്ച നടന്ന നറുക്കെടുപ്പിലെ ഭാഗ്യശാലി. രണ്ടാം സമ്മാനമായ 1 ദശലക്ഷം ദിര്‍ഹം അല്‍ ഐനില്‍ താമസിക്കുന്ന മറ്റൊരു മലയാളിയായ അബ്ദുല്‍ മജീദിനാണ് കിട്ടിയത്.
നവംബര്‍ 27 ന് ബിഗ് ടിക്കറ്റിന്റെ 234ാമത് സീരിസ് നറുക്കെടുപ്പ് ഓണ്‍ലൈനിലാണ് രഞ്ജിത് എടുത്തത്. നമ്പര്‍ 052706 ആണ് ഭാഗ്യ നമ്പര്‍. സമ്മാനത്തുക തന്റെ അഞ്ചു സുഹൃത്തുക്കളുമായി പങ്കിടുമെന്ന് രഞ്ജിത്ത് പറഞ്ഞു. രണ്ടാം സമ്മാനം നേടിയത് 153520 എന്ന ടിക്കറ്റിനാണ്. മൂന്നാം സമ്മാനമായ ഒരു ലക്ഷം ദിര്‍ഹം നേടിയത് ഫിലിപ്പീന്‍സ് സ്വദേശിയായ റാഷിയ നവില മുഹമ്മദ് ഈസയാണ്.
021681 എന്ന ടിക്കറ്റിനാണ് മൂന്നാം സമ്മാനം. നാലാം സമ്മാനമായ 90,000 ദിര്‍ഹത്തിന്റെ നാലാം സമ്മാനം 254527 എന്ന ടിക്കറ്റ് നമ്പരിന് ഉടമയായ ഇന്ത്യക്കാരി പ്രിയങ്ക ആന്റോയ്ക്കാണ് ലഭിച്ചത്. ന്യൂസിലാന്‍ഡില്‍ നിന്നുള്ള ഗ്രിഗറി സാങ് വാങ്ങിയ 166271 നമ്പര്‍ ടിക്കറ്റ് അഞ്ചാം സമ്മാനമായ 80,000 ദിര്‍ഹത്തിന് അര്‍ഹമായി.
തത്സമയ നറുക്കെടുപ്പ് കണ്ടു കൊണ്ടിരിക്കുമ്പോള്‍ ആയിരുന്നു ബിഗ് ടിക്കറ്റ് അധികൃതര്‍ രഞ്ജിത്തിനെ വിളിച്ചത്. ‘എനിക്കത് വിശ്വസിക്കാന്‍ കഴിയുന്നില്ല. ഞാന്‍ വീട്ടിലുണ്ട്, ഒമാനില്‍. എനിക്ക് വളരെ ആവേശം തോന്നുന്നു’, സന്തോഷ വാര്‍ത്ത അറിഞ്ഞതിന് പിന്നാലെ രഞ്ജിത്ത് മറുപടി പറഞ്ഞു.
കഴിഞ്ഞ 12 വര്‍ഷത്തോളമായി ഒമാനില്‍ താമസിക്കുന്ന രഞ്ജിത്ത് ഒരു റിയല്‍ എസ്‌റ്റേറ്റ് കമ്പനിയില്‍ അക്കൗണ്ടന്റാണ്. ഒമാനിലെ തന്റെ അഞ്ച് സുഹൃത്തുക്കളുമായി ചേര്‍ന്നാണ് ടിക്കറ്റെടുത്തത്. ഇത് രണ്ടാം തവണയാണ് രഞ്ജിത്ത് ബിഗ് ടിക്കറ്റ് എടുക്കുന്നത്. ഒമാനില്‍ ഭാര്യയോടും അഞ്ച് വയസ്സുള്ള മകളോടൊപ്പമാണ് താമസം.
സമ്മാനത്തുക തന്റെ മകളുടെ വിദ്യാഭ്യാസം സുരക്ഷിതമാക്കാനാണ് ആദ്യം ഉപയോഗിക്കുകയെന്ന് രഞ്ജിത് പറഞ്ഞു. നാട്ടിലുള്ള കുടുംബത്തിന് ഒരു വീട് വെക്കാനും പദ്ധതിയുണ്ട്. സമ്മാനം വാങ്ങാനായി അടുത്തമാസം ദുബായില്‍ വരാനുള്ള ഒരുക്കത്തിലാണ് രഞ്ജിത്ത്.
ഒരു ബിഗ് ടിക്കറ്റിന്റെ വില വാറ്റ് ഉള്‍പ്പെടെ 500 ദിര്‍ഹം ആണ്. രണ്ട് ടിക്കറ്റുകള്‍ വാങ്ങുകയാണെങ്കില്‍ മൂന്നാമത്തേത് സൗജന്യമാണ്. ബിഗ് ടിക്കറ്റ് ഡ്രീം കാര്‍ ടിക്കറ്റുകളില്‍ ബൈ 2 ഗെറ്റ് ഫ്രീ പ്രമോഷനുമുണ്ട്.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല