സ്വന്തം ലേഖകൻ: ഓസ്ട്രേലിയയിൽ വാർത്തകൾക്ക് ഏർപ്പെടുത്തിയ വിലക്ക് പിൻവലിക്കുമെന്ന് ഫേസ്ബുക്ക്. ഓസ്ട്രേലിയ പാസാക്കിയ പുതിയ മാധ്യമ നിയമത്തിൽ ഏതാനും ഭേദഗതികൾ വരുത്താൻ സർക്കാർ തയാറായതിനെത്തുടർന്നാണ് ഫെയ്സ്ബുക്കിൻ്റെ നിലപാടു മാറ്റം. ഫേസ്ബുക്കില് പ്രത്യക്ഷപ്പെടുന്ന എല്ലാ വാർത്തകളുടെയും പ്രസാധകർക്ക് പ്രതിഫലം നൽകുന്നതിനു പകരം തങ്ങൾ തെരഞ്ഞെടുക്കുന്ന മാധ്യമ സ്ഥാപനങ്ങൾക്കു മാത്രം പണം നൽകിയാൽ മതിയെന്നു സർക്കാർ സമ്മതിച്ചതായി കമ്പനി അറിയിച്ചു.
ഓസ്ട്രേലിയൻ സർക്കാരുമായി ധാരണയിലെത്തിയതിനെത്തുടർന്നു വാർത്തകൾ പങ്കിടുന്നതു ഫെയ്സ്ബുക്ക് പുനരാരംഭിച്ചു. ഓരോ മാധ്യമസ്ഥാപനവുമായി കരാർ ഉണ്ടാക്കാമെന്ന് ഫെയ്സ്ബുക്ക് സമ്മതിച്ചതായി കമ്പനിയുടെ ഓസ്ട്രേലിയൻ പ്രതിനിധികളും സ്ഥിരീകരിച്ചു.
വാർത്തകൾക്കു മാധ്യമ സ്ഥാപനങ്ങൾക്കു പ്രതിഫലം നൽകണമെന്ന നിയമം സർക്കാർ തയാറാക്കിയതോടെ വാർത്തകൾ ഷെയർ ചെയ്യുന്നതു ഫെയ്സ്ബുക്ക് നിർത്തിവച്ചിരുന്നു. തുടർന്ന് ഓസ്ട്രേലിയൻ സർക്കാരിന്റെ ഔദ്യോഗിക അറിയിപ്പുകളും കോവിഡ് മുന്നറിയിപ്പുകളും വരെ ഫേസ്ബുക്കിൽ നിന്ന് അപ്രത്യക്ഷമായത് വൻ പ്രതിഷേധത്തിനും കാരണമായി.
വാർത്തകൾ പങ്കിടുന്നതിനു മാധ്യമ സ്ഥാപനങ്ങൾക്കു സമൂഹ മാധ്യമങ്ങൾ പണം നൽകണമെന്നു വ്യവസ്ഥ ചെയ്യുന്ന നിയമം ഓസ്ട്രേലിയൻ പാർലമെൻ്റിൻ്റെ പരിഗണനയ്ക്ക് വരാനിരിക്കുകയാണ്.
നിങ്ങളുടെ അഭിപ്രായങ്ങള് ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള് എന് ആര് ഐ മലയാളിയുടെ അഭിപ്രായമാവണമെന്നില്ല