സ്വന്തം ലേഖകൻ: ഇന്ത്യയുടെ അഭിമാനമാണെന്ന അവകാശവാദങ്ങളുയര്‍ത്തി വിക്ഷേപിച്ച ചന്ദ്രയാന്‍ രണ്ട് പൂര്‍ണ പരാജയമാണെന്ന് ഐ.എസ്.ആര്‍.ഒ മുന്‍ ശാസ്ത്രഞന്‍ നമ്പി നാരായണന്‍. പദ്ധതിയുടെ ലക്ഷ്യം 98 ശതമാനം കൈവരിച്ചുവെന്ന ഐ.എസ്.ആര്‍.ഒയുടെ വാദം പൊളളയാണെന്നും അദ്ദേഹം പറഞ്ഞു.
“ചന്ദ്രന്റെ ഉപരിതലത്തില്‍ സോഫ്റ്റ് ലാന്‍ഡിങ് നടത്തുക എന്നതായിരുന്നു ചന്ദ്രയാന്‍ രണ്ടിന്റെ ലക്ഷ്യം. ആ ലക്ഷ്യമാണ് പരാജയപ്പെട്ടത്. ജനങ്ങളുടെ മുന്നില്‍ ചന്ദ്രയാന്‍ രണ്ട് 98 ശതമാനം വിജയകരമായിരുന്നുവെന്ന് ഐ.എസ്.ആര്‍.ഒക്ക് എങ്ങനെ പറയാന്‍ കഴിഞ്ഞു?. പദ്ധതി നൂറുശതമാനം പരാജയമായിരുന്നവെന്ന് അംഗീകരിക്കുന്നതാണ് ഉചിതം,” നമ്പി നാരായണൻ പറഞ്ഞു.
“പരീക്ഷണം പരാജയപ്പെട്ടെന്ന് പറഞ്ഞാലും ജനങ്ങള്‍ അത് അംഗീകരിക്കും. കാരണം പരാജയങ്ങള്‍ സാധാരണമാണ്. അപ്പോള്‍ അത് തുറന്നുപറയാമായിരുന്നെന്നാണ് എന്റെ അഭിപ്രായം,” അദ്ദേഹം കൂട്ടിച്ചേർത്തു.
ബഹിരാകാശരംഗത്ത് ഏഷ്യന്‍ രാജ്യങ്ങള്‍ സഹകരിച്ച് പ്രവര്‍ത്തിക്കേണ്ട സമയമായെന്നും നമ്പി നാരായണന്‍ പറഞ്ഞു. ഇന്ത്യയും ചൈനയും അത്തരമൊരു ആശയത്തിന് നേതൃത്വം നല്‍കണമെന്നും അദ്ദേഹം അഭിപ്രായപ്പെട്ടു. യൂറോപ്യന്‍ സ്‌പേസ് ഏജന്‍സി മാതൃകയില്‍ ബഹിരാകാശ രംഗത്ത് ഏഷ്യന്‍ രാജ്യങ്ങളുടെ കൂട്ടായ്മ ആവശ്യമാണ്. ഇന്ത്യയും ചൈനയും അത്തരമൊരു ആശയത്തിന് നേതൃത്വം നല്‍കണം. അമേരിക്കയുടെ കൈയ്യില്‍ പണമില്ലെങ്കില്‍ നമുക്ക് സ്വന്തമായി ഇത് സാധ്യമാകും എന്ന് തോന്നുന്നുണ്ടോ? 20 രാജ്യങ്ങളും ഒരുമിച്ച് നിന്നാല്‍ എല്ലാവരുടെയും സാമ്പത്തിക സഹകരണമുണ്ടാവും,” നമ്പി നാരായണൻ വ്യക്തമാക്കി.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല