സ്വന്തം ലേഖകൻ: കൊവിഡ് പ്രതിരോധ നടപടികളുടെ ഭാഗമായി കുവൈത്തിലെ ഇന്ത്യൻ എംബസി മാർച്ച് രണ്ടുമുതൽ നാലുവരെ അടച്ചിടും. അടിയന്തര കോൺസുലർ സേവനങ്ങൾ മുൻകൂട്ടിയുള്ള അപ്പോയൻറ്മെൻറുകളുെട അടിസ്ഥാനത്തിൽ തുടരും. ഇതിനായി cons1.kuwait@mea.gov.in എന്ന വിലാസത്തിലേക്ക് മെയിൽ അയക്കാം. മൂന്ന് പാസ്പോർട്ട് സേവന കേന്ദ്രങ്ങളും പ്രവർത്തിക്കും. മാർച്ചിൽ എംബസി നടത്താനിരുന്ന പരിപാടികളെല്ലാം പുനഃക്രമീകരിച്ചതായി അധികൃതർ വാർത്താക്കുറിപ്പിൽ അറിയിച്ചു.
കുവൈത്തിൽ വിദേശത്തുനിന്ന് എത്തുന്നവർക്ക് ഏർപ്പെടുത്തിയ നിർബന്ധിത ഇൻസ്റ്റിറ്റ്യൂഷനൽ ക്വാറൻറീനിൽനിന്ന് നാല് വിഭാഗങ്ങളെ കൂടി ഒഴിവാക്കാൻ ആരോഗ്യ അധികൃതർക്ക് മുന്നിൽ ശിപാർശ. ഈ വിഭാഗങ്ങളിൽപെടുന്നവർ പി.സി.ആർ പരിശോധന നടത്തി കൊവിഡ് മുക്ത സർട്ടിഫിക്കറ്റ് ഹാജരാക്കേണ്ടിവരും.
രണ്ടാഴ്ചത്തെ ഹോം ക്വാറൻറീൻ അനുഷ്ഠിക്കണമെന്നും നിർദേശത്തിൽ വ്യക്തമാക്കി. സ്വന്തം ചെലവിൽ ചികിത്സക്കായി വിദേശത്ത് പോയ കുവൈത്തികൾ (ചികിത്സ നടത്തിയ രാജ്യത്തെ ആരോഗ്യവിഭാഗം നൽകിയ സർട്ടിഫിക്കറ്റ് സഹിതം തിരിച്ചുവന്നാൽ), 60 വയസ്സിന് മുകളിലുള്ള ആരോഗ്യപരമായ ബുദ്ധിമുട്ട് നേരിടുന്ന പരസഹായം ആവശ്യമുള്ളവർ, ഭിന്നശേഷിക്കാർ, പ്രത്യേക പരിചരണം ആവശ്യമുള്ളവരുടെ സഹായി എന്നിവർക്ക് ഇളവ് നൽകണമെന്ന ശിപാർശയാണ് അധികൃതർക്ക് മുന്നിലുള്ളത്.
വിവിധ മന്ത്രാലയങ്ങളിൽ നിന്നുള്ള പ്രതിനിധികളെ ഉൾപ്പെടുത്തി രൂപവത്കരിച്ച കൊറോണ കമ്മിറ്റി കുവൈത്ത് വിമാനത്താവളത്തിൽ എത്തിയ കൊവിഡ് കേസുകൾ വിലയിരുത്തി ഇക്കാര്യത്തിൽ തീരുമാനമെടുക്കും.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല