സ്വന്തം ലേഖകൻ: പെരുന്നാൾ അവധി ദിവസങ്ങളിൽ അബുദാബിയിലും ദുബായിലും പാർക്കിങ് സൗജന്യമാക്കി. അബുദാബിയിൽ ടോളും സൗജന്യമാണ്.ചൊവ്വാഴ്ച മുതൽ പൊതു അവധി തീരുന്നതുവരെ ആനുകൂല്യം ലഭിക്കും. ദുബായിൽ മൾട്ടിലെവൽ പാർക്കിങ് ഒഴികെയുള്ള സ്ഥലങ്ങളിൽ പാർക്കിങ് സൗജന്യമാണെന്ന് ആർ.ടി.എ അറിയിച്ചു.അബുദാബിയിൽ ‘ഡാർബ്’ ട്രാഫിക് ടോളും സൗജന്യമാക്കിയതായി മുനിസിപ്പാലിറ്റീസ് ആൻഡ് ഗതാഗത വകുപ്പിന് കീഴിൽ പ്രവർത്തിക്കുന്ന ഗതാഗത കേന്ദ്രം അറിയിച്ചു.
എം 18ലെ ട്രക്ക് പാർക്കിങ് യാർഡിലെ പാർക്കിങ് ഫീസ് ഈ കാലയളവിൽ സൗജന്യമായിരിക്കും.എന്നാൽ, നിരോധിത സ്ഥലങ്ങളിൽ വാഹനങ്ങൾ പാർക്ക് ചെയ്യരുതെന്നും മറ്റ് വാഹനങ്ങളുടെ സഞ്ചാരത്തിന് തടസ്സമുണ്ടാക്കരുതെന്നും പാർക്കിങ്ങിനായി നിശ്ചയിച്ച സ്ഥലങ്ങളിൽ ശരിയായി വാഹനം നിർത്തണമെന്നും അധികൃതർ ചൂണ്ടിക്കാട്ടി. എന്നാൽ, താമസക്കാർക്കായി നിശ്ചയിച്ച സ്ഥലങ്ങളിൽ രാത്രി ഒമ്പത് മുതൽ രാവിലെ എട്ടുവരെ മറ്റുവാഹനങ്ങൾ പാർക്ക് ചെയ്യരുതെന്നും ഇൻറഗ്രേറ്റഡ് ട്രാൻസ്പോർട്ട് സെൻറർ അറിയിച്ചു.
അബുദാബി നഗരത്തിലേക്കും നഗരത്തിൽനിന്ന് പുറത്തേക്കുമുള്ള പാതകളിൽ ശൈഖ് സായിദ് പാലം, മക്തപാലം, മുസഫ പാലം, ശൈഖ് ഖലീഫ പാലം എന്നിവിടങ്ങളിലെ ദർബ് ടോൾ ഗേറ്റുകളിലൂടെ കടന്നുപോകുന്നതിന് ഫീസ് ഈടാക്കില്ല. വെള്ളിയാഴ്ചയും പൊതുഅവധി ദിവസങ്ങളിലും മുമ്പ് നിശ്ചയിച്ചതനുസരിച്ച് ഈദുൽ ഫിത്ർ അവധിദിവസങ്ങളിലും പൊതു ഗതാഗത ബസ് സർവിസുകൾ സമയമാറ്റമില്ലാതെ പ്രവർത്തിക്കുമെന്നും കേന്ദ്രം വ്യക്തമാക്കി.
പെരുന്നാൾ അവധി പ്രമാണിച്ച് മെട്രോ, ബസ്, ട്രാം, മറൈൻ എന്നിവയുടെ സമയങ്ങളിൽ മാറ്റം പ്രഖ്യാപിച്ചു. വാഹന പരിശോധന കേന്ദ്രം, കസ്റ്റമസ് ഹാപ്പിനസ് സെൻറർ എന്നിവക്ക് അവധിയായിരിക്കുമെന്നും ആർ.ടി.എ അറിയിച്ചു. അതേസമയം ഉമ്മുറമൂൽ, ദേര, അൽബർഷ, അൽ മനാറ എന്നിവിടങ്ങളിലെ സ്മാർട്ട് കസ്റ്റമർ സെൻററുകളും ആർ.ടി.എ ഹെഡ്ഓഫിസും 24 മണിക്കൂറും പ്രവർത്തിക്കും.
ബസ് സർവിസ് സമയം സംബന്ധിച്ച വിവരങ്ങൾക്ക് www.itc.gov.ae എന്ന വെബ്സൈറ്റ് സന്ദർശിക്കുകയോ 800 88888 എന്ന ടോൾ ഫ്രീ നമ്പറിൽ ബന്ധപ്പെടുകയോ സ്മാർട്ട് ‘ദർബ്’ ആപ് സന്ദർശിക്കുകയോ ചെയ്യണമെന്നും അധികൃതർ അറിയിച്ചു.
നിങ്ങളുടെ അഭിപ്രായങ്ങള് ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള് എന് ആര് ഐ മലയാളിയുടെ അഭിപ്രായമാവണമെന്നില്ല