സ്വന്തം ലേഖകൻ: കുവൈത്തിൽനിന്ന് ഇന്ത്യയിലേക്ക് നേരിട്ടുള്ള യാത്രാവിമാനങ്ങൾ നിർത്തിയ തീരുമാനം പിൻവലിച്ചു. അതേസമയം, നാട്ടിലുള്ളവർക്ക് കുവൈത്തിലേക്ക് വരാൻ സാഹചര്യം ഒരുങ്ങിയിട്ടില്ല. ഇന്ത്യ, പാകിസ്ഥാൻ, നേപ്പാൾ, ശ്രീലങ്ക, ബംഗ്ലാദേശ് എന്നീ രാജ്യങ്ങളിലേക്ക് കൂടി യാത്രാ വിമാനങ്ങൾക്ക് അനുമതി നൽകിയിട്ടുണ്ട്. ഇന്ത്യയിൽ കോവിഡ് വ്യാപനം രൂക്ഷമായ പശ്ചാത്തലത്തിലാണ് മേയ് ആദ്യം ഇവിടെനിന്ന് അങ്ങോട്ടുള്ള വിമാനങ്ങൾ കൂടി വിലക്കിയത്.
കഴിഞ്ഞ ദിവസങ്ങളിൽ മറ്റു രാജ്യങ്ങൾ വഴിയാണ് പ്രവാസികൾ നാട്ടിലേക്ക് പോയിരുന്നത്. ഇനി നേരിട്ട് പോകാം. ട്രാവൽസുകൾ ബുക്കിങ് ആരംഭിച്ചിട്ടുണ്ട്. ഇന്ത്യയിൽനിന്ന് കുവൈത്തിലേക്കുള്ള യാത്രാ വിമാനങ്ങൾ നേരത്തെ തന്നെ നിലച്ചിട്ടുണ്ട്. കുവൈത്തിലേക്ക് എല്ലാ വിദേശികൾക്കും പ്രവേശന വിലക്കും പ്രാബല്യത്തിലുണ്ട്. എന്നാൽ കാർഗോ വിമാനങ്ങൾക്ക് വിലക്കില്ല.
അതിനിടെ കോവിഡ് വാക്സീൻ സ്വീകരിച്ചിട്ടില്ലാ‍ത്ത സ്വദേശികൾക്ക് വിമാനയാത്ര സാധ്യമാകില്ലെന്ന് അറിയിപ്പ്. അത്തരക്കാർക്ക് യാത്രാനുമതി നൽകേണ്ടതില്ലെന്ന് സിവിൽ ഏവിയേഷൻ കുവൈത്തിൽ സർവീസ് നടത്തുന്ന വിമാന കമ്പനികൾക്ക് അയച്ച സർക്കുലറിൽ വ്യക്തമാക്കി.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല