സ്വന്തം ലേഖകൻ: ഇന്ത്യയില്‍ നിന്ന് യുഎഇയിലേക്കുള്ള വിമാന സര്‍വീസ് ആഗസ്റ്റ് ഏഴു വരെ ഉണ്ടായിരിക്കില്ലെന്ന് എമിറേറ്റ്സ് എയര്‍ലൈന്‍സ് അറിയിച്ചു. ഇതുമായി ബന്ധപ്പെട്ട് യാത്രക്കാര്‍ ഉന്നയിച്ച അന്വേഷണങ്ങള്‍ക്കു നല്‍കിയ മറുപടിയിലാണ് എമിറേറ്റ്സ് ഇക്കാര്യം അറിയിച്ചത്. കോവിഡ് വ്യാപനത്തിന് പിന്നാലെയാണ് ഇന്ത്യയില്‍ നിന്ന് യുഎഇയിലേക്ക് വിമാന സര്‍വീസ് നിര്‍ത്തിവെച്ചത്.
ഇന്ത്യയില്‍ നിന്ന് യുഎഇയിലേക്കുള്ള വിമാന സര്‍വീസ് ആഗസ്ത് രണ്ടു വരെ നിര്‍ത്തിവച്ചതായി ഇത്തിഹാദ് എയര്‍വെയ്സ് അറിയിച്ചതിനു പിന്നാലെയാണ് എമിറേറ്റ്‌സും സര്‍വീസ് നീട്ടിയിരിക്കുന്നത്. യുഎഇ ജനറല്‍ സിവില്‍ ഏവിയേഷന്‍ അതോറിറ്റിയുടെ നിര്‍ദ്ദേശത്തെ തുടര്‍ന്നാണ് നടപടിയെന്ന് എമിറേറ്റ്സ് വ്യക്തമാക്കി.
കോവിഡ് വ്യാപനത്തിന്റെ പശ്ചാത്തലത്തില്‍ ഇന്ത്യ ഉള്‍പ്പെടെ യാത്രാവിലക്ക് നിലനില്‍ക്കുന്ന രാജ്യങ്ങളില്‍ നിന്ന് ഇനിയൊരു അറിയിപ്പുണ്ടാകുന്നതുവരെ വിമാന സര്‍വീസ് ഉണ്ടാകില്ലെന്ന് യുഎഇ ജനറല്‍ സിവില്‍ ഏവിയേഷന്‍ അതോറിറ്റിയും അറിയിച്ചിട്ടുണ്ട്. അതത് രാജ്യങ്ങളിലെ കോവിഡ് സ്ഥിതിഗതികള്‍ യുഎഇ സസൂക്ഷ്മം നിരീക്ഷിച്ചു വരികയാണ്. ഇതുമായി ബന്ധപ്പെട്ട എല്ലാ കാര്യങ്ങളും പരിശോധിച്ചു മാത്രമേ യാത്രാ വിലക്ക് നീക്കുന്ന കാര്യത്തില്‍ തീരുമാനം കൈക്കൊള്ളുകയുള്ളൂ എന്നും സിവില്‍ ഏവിയേഷന്‍ അതോറിറ്റി വ്യക്തമാക്കിയിരുന്നു.
യുഎഇയിലേക്കുള്ള യാത്രാവിലക്ക് എപ്പോള്‍ അവസാനിക്കുമെന്ന് പറയാന്‍ കഴിയില്ലെന്നും ഇക്കാര്യത്തില്‍ അന്തിമ തീരുമാനമെടുക്കേണ്ടത് യുഎഇ ഭരണകൂടമാണെന്നും ദുബായ് സര്‍ക്കാരിന്റെ ഉടമസ്ഥതയിലുള്ള എമിറേറ്റ്സ് എയര്‍ലൈന്‍സ് വ്യക്തമാക്കി. ഇന്ത്യയ്ക്കു പുറമെ, പാകിസ്താന്‍, ബംഗ്ലാദേശ്, ശ്രീലങ്ക എന്നിവിടങ്ങളില്‍ നിന്നുള്ള വിമാന സര്‍വീസുകളാണ് നീട്ടിയിരിക്കുന്നത്. പുതിയ സാഹചര്യത്തില്‍ പ്രവാസികളുടെ യുഎഇ യാത്ര ഇനിയും നീളാനാണ് സാധ്യത.
ഇന്ത്യയില്‍ നിന്നുള്ളവര്‍ക്കു മാത്രമല്ല, രണ്ടാഴ്ചയ്ക്കുള്ളില്‍ ഇന്ത്യയിലൂടെ യാത്ര ചെയ്തവര്‍ക്കും യുഎഇ യാത്രാവിലക്ക് ബാധകമാണ്. അതേസമയം, ഈ രാജ്യങ്ങളില്‍ നിന്ന് യുഎഇ പൗരന്മാര്‍, നയതന്ത്ര പ്രതിനിധികള്‍, ഗോള്‍ഡന്‍ വിസയോ നിക്ഷേപക വിസയോ ഉള്ളവര്‍, ദുബായ് എക്‌സ്‌പോയില്‍ പങ്കെടുക്കുന്നവര്‍ എന്നിവര്‍ക്ക് യുഎഇ യാത്രയ്ക്ക് തടസ്സമില്ല. കോവിഡ് വ്യാപനം ശക്തമായ സാഹചര്യത്തില്‍ ഏപ്രില്‍ 24നാണ് ഇന്ത്യയില്‍ നിന്നുള്ള വിമാന സര്‍വീസുകള്‍ക്ക് യുഎഇ വിലക്കേര്‍പ്പെടുത്തിയത്.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല