സ്വന്തം ലേഖകൻ: ബജറ്റ് എയർലൈനായ എയർ അറേബ്യ അബുദാബി കേരളത്തിലേക്കു സർവീസ് ആരംഭിക്കുന്നതോടെ നിരക്കു കുറയുമെന്ന പ്രതീക്ഷയിൽ പ്രവാസി മലയാളികൾ. ദുബായ്, ഷാർജ സെക്ടറിലതിനെക്കാൾ 100–300 ദിർഹം വരെ കൂടുതലാണ് അബുദാബി സെക്ടറിൽ ടിക്കറ്റിന് ഈടാക്കിയിരുന്നത്.
പുതിയ എയർലൈന്റെ വരവോടെ കുറഞ്ഞ നിരക്കിൽ നാട്ടിലെത്താനാകുമെന്ന പ്രതീക്ഷയിലാണ് മലയാളികൾ. നിലവിൽ എയർ ഇന്ത്യ എക്സ്പ്രസ്, ഇൻഡിഗോ, ഗോ എയർ, ഇത്തിഹാദ് എയർവേയ്സ് എന്നിവയാണ് അബുദാബിയിൽനിന്ന് കേരളത്തിലേക്കു സർവീസ് നടത്തുന്നത്. കൊച്ചി, കോഴിക്കോട്, തിരുവനന്തപുരം സെക്ടറുകളിലേക്കാണ് എയർ അറേബ്യ അബുദാബി സർവീസ് ആരംഭിക്കുന്നത്.
വൺവേയ്ക്ക് 449 ദിർഹമാണ് (9159 രൂപ) നിരക്ക്. കോഴിക്കോട്, കൊച്ചി സെക്ടറിൽ ദിവസേനയും തിരുവനന്തപുരത്തേക്കു ആഴ്ചയിൽ 3 ദിവസവുമാണ് സർവീസ്. കൊച്ചിയിലേക്കുള്ള കന്നി വിമാനം 3ന് രാത്രി 10.55നു പുറപ്പെട്ട് പുലർച്ചെ 4.15നു നെടുമ്പാശേരി വിമാനത്താവളത്തിലെത്തും. തിരിച്ച് പുലർച്ചെ 5ന് പുറപ്പെട്ട് അബുദാബിയിൽ രാവിലെ 7.55ന് എത്തും.
കോഴിക്കോട്ടേക്കുള്ള വിമാന സർവീസ് 5ന് തുടങ്ങും. രാത്രി 11.30ന് പുറപ്പെട്ട് പുലർച്ചെ 4.45ന് കരിപ്പൂരിൽ ഇറങ്ങും. തിരിച്ച് പുലർച്ചെ 5.25ന് പുറപ്പെട്ട് 8.10ന് അബുദാബിയിലെത്തും. തിരുവനന്തപുരത്തേക്ക് 16 മുതലാണ് സർവീസ് ആരംഭിക്കുക. ഞായർ, ചൊവ്വ, വെള്ളി ദിവസങ്ങളിൽ ഉച്ചയ്ക്ക് 1.15ന് പുറപ്പെട്ട് വൈകിട്ട് 6.50ന് തിരുവനന്തപുരത്തെത്തും. തിരിച്ച് വൈകിട്ട് 7.30ന് പുറപ്പെട്ട് രാത്രി 10.30ന് അബുദാബിയിലെത്തും.
കോവിഡ്, ടിക്കറ്റ് നിരക്ക് വർധന തുടങ്ങി നാട്ടിൽ കുടുങ്ങിയവർക്ക് കുറഞ്ഞ നിരക്കിൽ അബുദാബിയിലേക്കു തിരിച്ചെത്താൻ പുതിയ സർവീസ് സഹായകമാണ്. ഇത്തിഹാദ് എയർവേയ്സും എയർ അറേബ്യ അബുദാബിയും സർവീസ് നടത്തുന്ന രാജ്യങ്ങളിലേക്ക് കണക്ഷൻ വിമാനവും ലഭിക്കുമെന്നതാണ് മറ്റൊരു നേട്ടം.ടിക്കറ്റ് ബുക്കിങ് airarabia.com
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല