സ്വന്തം ലേഖകന്: വിദേശ വനിതയുടെ കൊലപാതകം, നടന്നത് ക്രൂരമായ പീഡനമെന്ന് റിപ്പോര്ട്ട്; പ്രതികളെ പൊലീസ് കസ്റ്റഡിയില് വിട്ടു. കോവളത്ത് വിദേശവനിതയെ ലഹരിമരുന്ന് നല്കി പീഡിപ്പിച്ച് കൊന്ന കേസിലെ പ്രതികളെ 14 ദിവസത്തേക്ക് പൊലീസ് കസ്റ്റഡിയില് വിട്ടു. വനിതയെ പ്രലോഭിപ്പിച്ചു കൊണ്ടുപോയി കഞ്ചാവ് നല്കി ബോധം കെടുത്തിയ ശേഷമാണ് ബലാത്സംഗം ചെയ്തത്. ഉമേഷാണ് യുവതിയെ കൊലപ്പെടുത്തിയതെന്ന് റിമാന്റ് റിപ്പോര്ട്ടില് പറയുന്നു.
യുവതിയുടെ വസ്ത്രങ്ങള് കാട്ടിലേക്ക് വലിച്ചെറിഞ്ഞുവെന്നും അത് കണ്ടെത്തിതരാമെന്നും പ്രതികള് പറഞ്ഞതായും റിപ്പോര്ട്ടിലുണ്ട്. കേസിലെ പ്രതികളായ ഉമേഷ്, ഉദയന് എന്നിവരെ കൊലപാതകം, ബലാത്സംഗം എന്നീ വകുപ്പുകള് ചുമത്തിയാണ് അറസ്റ്റ് ചെയ്തത്. വിദേശ വനിതയെ ബലാത്സംഗം ചെയ്ത ശേഷം കൊലപ്പെടുത്തിയതാണെന്ന് പൊലീസ് കണ്ടെത്തിയിരുന്നു. മാര്ച്ച് 14നാണ് പോത്തന്കോട് ധര്മ ആയുര്വേദ റിസോട്ടില്നിന്ന് വിദേശവനിതയെ കാണാതായത്.
ഇതേദിവസം തന്നെ കോവളത്തെ ഗ്രോവ് ബീച്ചില് ഇവര് എത്തി. ഓട്ടോറിക്ഷയിലാണ് ഇവര് ഇവിടെ വരെയെത്തിയത്. തുടര്ന്ന് പനത്തുറയിലെ ക്ഷേത്രപരിസരത്തേക്ക് പോവുകയും ചെയ്തു. ഇവിടെവച്ചാണ് ഉമേഷും ഉദയനും വിദേശവനിതയെ കാണുന്നത്. തുടര്ന്ന് കാഴ്ചകള് കാണിച്ചു തരാമെന്നും കഞ്ചാവു നല്കാമെന്നും പറഞ്ഞ് ഇവരെ കൂട്ടിക്കൊണ്ടു പോവുകയായിരുന്നു. ഫൈബര് ബോട്ടിലാണ് ഇവരെ വാഴമുട്ടത്തെ കണ്ടല്ക്കാട്ടിലെത്തിച്ചത്. തുടര്ന്ന് ഇവര് ലഹരി ഉപയോഗിക്കുകയും ചെയ്തു. വൈകുന്നേരം അഞ്ചരയ്ക്കു ശേഷമാണ് കൊലപാതകം നടന്നതെന്നാണ് പോലീസ് കണ്ടെത്തിയിരിക്കുന്നത്.
ഫോറന്സിക്ഫലവും രാസപരിശോധനാഫലവും ലഭിച്ചതിനു ശേഷമാണ് ഇവരെ ബലാത്സംഗം ചെയ്ത ശേഷം കൊലപ്പെടുത്തിയെന്ന നിഗമനത്തിലേക്ക് പോലീസ് എത്തിച്ചേര്ന്നിരിക്കുന്നത്. കഴിഞ്ഞയാഴ്ചയാണ് വിദേശവനിതയുടെ ഒരുമാസം പഴക്കമുള്ള മൃതദേഹം കണ്ടെത്തിയത്. മൃതശരീരത്തില്നിന്ന് കണ്ടെത്തിയ ജാക്കറ്റ് ഉദയന്റേതാണെന്ന് കണ്ടെത്തിയിട്ടുണ്ട്. കൂടാതെ കണ്ടല്ക്കാട്ടില്നിന്നു കണ്ടെത്തിയ മുടിയിഴകള് പ്രതികളുടേതാണെന്നും തിരിച്ചറിഞ്ഞിട്ടുണ്ട്.
നിങ്ങളുടെ അഭിപ്രായങ്ങള് ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള് എന് ആര് ഐ മലയാളിയുടെ അഭിപ്രായമാവണമെന്നില്ല