സ്വന്തം ലേഖകൻ: ഒമാനിൽ കോവിഡ് മൂലം ബുദ്ധിമുട്ടുന്ന ഇന്ത്യക്കാരായ പ്രവാസികൾക്ക് ഓക്സിജൻ കോൺസെൻട്രേറ്റർ സൗജന്യമായി നൽകും. ഇന്ത്യൻ എംബസിയാണ് ഇത് ആവശ്യക്കാരിൽ എത്തിക്കുക. ഇതിനായി അഞ്ച് ഓക്സിജൻ കോൺസെൻട്രേറ്ററുകൾ വാങ്ങി. ഇന്ത്യക്കാരല്ലാത്തവർക്കും ആവശ്യമുണ്ടെങ്കിൽ നൽകുന്നത് പരിഗണിക്കുമെന്ന് എംബസി അധികൃതർ പറഞ്ഞു.
രോഗികൾ വർധിക്കുന്ന സാഹചര്യമുണ്ടായാൽ അതിനാവശ്യമായ കാര്യങ്ങൾ എത്തിക്കുമെന്നും അധികൃതർ പറഞ്ഞു. ഒമാനിൽ ഇന്ത്യക്കാരായ പ്രവാസികൾക്കിടയിൽ ധാരാളം കോവിഡ് കേസുകൾ റിപ്പോർട്ട് ചെയ്യപ്പെടുന്ന സാഹചര്യത്തിലാണ് തീരുമാനം. ലോക്ഡൗൺ അടക്കമുള്ള നിയന്ത്രണം നിലവിൽവന്നതോടെ പ്രതിദിന രോഗികളുടെ എണ്ണം കുറെഞ്ഞങ്കിലും മരണനിരക്കിൽ കാര്യമായ മാറ്റമുണ്ടായില്ല. നിലവിലെ സാഹചര്യത്തിൽ ജാഗ്രത കൈവിടരുതെന്നും സുരക്ഷ നിർദേശങ്ങൾ പാലിക്കണമെന്നും ആരോഗ്യ മന്ത്രാലയം അറിയിച്ചു.
ലോക്ഡൗൺ ആരംഭിച്ചതോടെ ഒമാനിലെ ചെറുകിട ഹോട്ടലുകൾ മിക്കതും അടഞ്ഞു കിടക്കുകയാണ്. ഇതോടെ ഇഫ്താറിനും റമദാൻ വിഭവങ്ങൾക്കും ചെറുകിട ഹോട്ടലുകളെ ആശ്രയിക്കുന്ന മലയാളികൾ അടക്കമുള്ള പ്രവാസികൾ പ്രയാസത്തിലായി. റൂവി പോലുള്ള സ്ഥലങ്ങളിൽ മലയാളികൾ അടക്കമുള്ളവർ ആശ്രയിക്കുന്ന നിരവധി ഹോട്ടലുകളാണ് ശനിയാഴ്ച മുതൽ ലോക്ഡൗൺ അവസാനിക്കുന്നതുവരെ പ്രവർത്തനം നിർത്തിയത്.
നിങ്ങളുടെ അഭിപ്രായങ്ങള് ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള് എന് ആര് ഐ മലയാളിയുടെ അഭിപ്രായമാവണമെന്നില്ല