സ്വന്തം ലേഖകൻ: ചില ആഫ്രിക്കന്‍ രാജ്യങ്ങളില്‍ കൊവിഡിന്റെ പുതിയ വകഭേദമായ ഒമിക്രോണ്‍ വൈറസ് റിപ്പോര്‍ട്ട് ചെയ്യപ്പെട്ട സാഹചര്യത്തില്‍ പ്രത്യേക റെഡ് ലിസ്റ്റില്‍ ഉള്‍പ്പെടുത്തിയ രാജ്യങ്ങളില്‍ നിന്ന് വരുന്നവര്‍ക്ക് പുതിയ യാത്രാ നയം പ്രഖ്യാപിച്ച് ഖത്തര്‍ ആരോഗ്യ മന്ത്രാലയം. ബോട്സ്വാന, ഈജിപ്ത്, എസ്വാതിനി, ലെസോത്തോ, നമീബിയ, ദക്ഷിണാഫ്രിക്ക, സിംബാബ്വേ ഉള്‍പ്പെടെയുള്ള രാജ്യങ്ങളില്‍ നിന്ന് വരുന്നവര്‍ക്കാണ് പുതുക്കിയ നിബന്ധന.
പൗരന്മാര്ക്ക് ഏഴ് ദിവത്തെ ഹോം അല്ലെങ്കില്‍ ഹോട്ടല്‍ ക്വാറന്റൈന്‍, ജിസിസി പൗരന്മാര്ക്ക് ഏഴ് ദിവസം ഹോട്ടല്‍ ക്വാറന്റൈന്‍, പ്രവാസികള്‍ക്ക് രണ്ട് ദിവസം ഹോട്ടലിലും അഞ്ച് ദിവസം വീട്ടിലും ക്വാറന്റൈന്‍ എന്നിവയാണ് പുതിയ നിബന്ധനകള്‍. ഇവിടങ്ങളില്‍ നിന്ന് എത്തുന്ന സന്ദര്‍ശകര്‍ക്കും ഹോട്ടല്‍ ക്വാറന്റൈന്‍ നിര്‍ബന്ധമാണ്. ഡിസംബര്‍ ഒന്ന് വൈകീട്ട് ആറു മണി മുതലാണ് പുതിയ നയം പ്രാബല്യത്തില്‍ വരിക.
പ്രത്യേക റെഡ് ലിസ്റ്റില്‍ ഉള്‍പ്പെട്ട രാജ്യങ്ങളില്‍ നിന്ന് വരുന്ന ഖത്തരി പൗരന്മാര്ക്ക് ഏഴ് ദിവസത്തെ ഹോം ക്വാറന്റൈന്‍ നിര്‍ബന്ധമാണ്. താല്‍പര്യമുള്ളവര്‍ക്ക് ഹോട്ടല്‍ ക്വാറന്റൈനിലും താമസിക്കാം. ഖത്തറിലേക്ക് യാത്ര തിരിക്കുന്നതിന് മുമ്പ് 72 മണിക്കൂറിനുള്ളില്‍ എടുത്ത പിസിആര്‍ നെഗറ്റീവ് സര്‍ട്ടിഫിക്കറ്റ് വേണം. പിസിആര്‍ ടെസ്റ്റിന്റെ കാര്യത്തില്‍ പ്രായപരിധിയില്ല. ഖത്തറിലെത്തിയ ഉടനെയും ആറാം ദിവസവും പിസിആര്‍ പരിശോധന നടത്തണം. ആറാമത്തെ ദിവസം നടത്തുന്ന പരിശോധനയുടെ ഫലം നെഗറ്റീവാണെങ്കില്‍ ഏഴാം ദിവസം ക്വാറന്റൈന്‍ അവസാനിപ്പിക്കാം.
ജിസിസി രാജ്യങ്ങളിലെ പൗരന്‍മാര്‍ ഖത്തറിലെത്തിയാല്‍ ഏഴ് ദിവസത്തെ ഹോട്ടല്‍ ക്വാറന്റൈന്‍. നിര്‍ബന്ധമാണ്. പൂര്‍ണമായും വാക്സിനെടുത്തവരായാലും അല്ലാത്തവരായാലും ഇക്കാര്യത്തില്‍ വ്യത്യാസമില്ല. ഖത്തറിലേക്കുള്ള യാത്രയുടെ 72 മണിക്കൂറിനുള്ളില്‍ എടുത്ത പിസിആര്‍ നെഗറ്റീവ് സര്‍ട്ടിഫിക്കറ്റ് വേണം. ഖത്തറിലെത്തിയ ഉടനെയും ആറാം ദിവസവും പിസിആര്‍ പരിശോധന നടത്തണം. ആറാം ദിവസത്തെ ടെസ്റ്റ് ഫലം നെഗറ്റീവാണെങ്കില്‍ ക്വാറന്റൈന്‍ ഒഴിവാക്കി വീട്ടിലേക്കു തിരിക്കാം.
ഖത്തര്‍ വിസയുള്ള പ്രവാസികളില്‍ പൂര്‍ണമായും വാക്സിനെടുത്തവര്‍ രണ്ട് ദിവസം ഹോട്ടല്‍ ക്വാറന്റൈനിലും അഞ്ചു ദിവസം ഹോം ക്വാറന്റീനിലും കഴിയണമെന്നതാണ് പുതിയ നിബന്ധന. യാത്രയുടെ 72 മണിക്കൂറിനുള്ളില്‍ എടുത്ത പിസിആര്‍ നെഗറ്റീവ് സര്‍ട്ടിഫിക്കറ്റും വേണം. ഖത്തറിലെത്തിയ ഉടനെയും ആറാം ദിവസവും പിസിആര്‍ പരിശോധന നടത്തും. ഹോട്ടല്‍ ക്വാറന്റൈനില്‍ കഴിയുമ്പോള്‍ ഹോട്ടലിലും ഹോം ക്വാറന്റൈനില്‍ കഴിയുമ്പോള്‍ പ്രൈമറി ഹെല്‍ത്ത് സെന്ററുകളിലോ സ്വകാര്യ ക്ലിനിക്കുകളിലോ ആണ് പിസിആര്‍ പരിശോധന നടത്തേണ്ടത്.
വാക്സിനെടുക്കാത്തവരാണെങ്കില്‍ ഏഴ് ദിവസമാണ് ഹോട്ടല്‍ ക്വാറന്റൈന്‍. യാത്രയുടെ 72 മണിക്കൂറിനുള്ളില്‍ എടുത്ത പിസിആര്‍ നെഗറ്റീവ് സര്‍ട്ടിഫിക്കറ്റ് വേണം. ഖത്തറിലെത്തിയ ഉടനെയും ആറാം ദിവസവും പിസിആര്‍ പരിശോധന നടത്തും. സന്ദര്‍ശക വിസയില്‍ വരുന്നവര്‍ പൂര്‍ണമായും വാക്സിനെടുത്തവരാണെങ്കില്‍ ഏഴ് ദിവസമാണ് ഹോട്ടല്‍ ക്വാറന്റൈനില്‍ കഴിയേണ്ടത്. യാത്രയുടെ 72 മണിക്കൂറിനുള്ളില്‍ എടുത്ത പിസിആര്‍ നെഗറ്റീവ് സര്‍ട്ടിഫിക്കറ്റ് വേണം. ഖത്തറിലെത്തിയ ഉടനെയും ആറാം ദിവസവും പിസിആര്‍ പരിശോധന നടത്തും. വാക്സിനെടുക്കാതെ ഈ രാജ്യങ്ങളില്‍ നിന്ന് വിസിറ്റ് വിസയില്‍ പ്രവേശനം അനുവദിക്കില്ലെന്നും മന്ത്രാലയം വ്യക്തമാക്കി.
ഖത്തര്‍ വിസയുള്ള പ്രവാസികള്‍ പൂര്‍ണമായും വാക്സിനെടുത്തവരാണെങ്കില്‍ രണ്ട് ദിവസം ഹോട്ടല്‍ ക്വാറന്റൈനില്‍ കഴിയണം. യാത്രയുടെ 72 മണിക്കൂറിനുള്ളിലെ കോവിഡ് പിസിആര്‍ നെഗറ്റീവ് സര്‍ട്ടിഫിക്കറ്റ്, ഖത്തറിലെത്തിയാല്‍ ഹോട്ടലില്‍ ആദ്യ ദിവസം പിസിആര്‍ പരിശോധന എന്നിവയും നിര്‍ബന്ധം.
വാക്സിനെടുക്കാത്തവരാണെങ്കില്‍ ഏഴ് ദിവസമാണ് ഹോട്ടല്‍ ക്വാറന്റൈന്‍. പിസിആര്‍ നെഗറ്റീവ് സര്‍ട്ടിഫിക്കറ്റും ആറാം ദിവസം പിസിആര്‍ പരിശോധനയും ഇവര്‍ക്കും നിര്‍ബന്ധമാണ്. എന്നാല്‍ പൂര്‍ണമായും വാക്സിനെടുത്ത് സന്ദര്‍ശക വിസയില്‍ വരുന്നവര്‍ക്ക് രണ്ട് ദിവസമാണ് ഹോട്ടല്‍ ക്വാറന്റൈന്‍. പിസിആര്‍ നെഗറ്റീവ് സര്‍ട്ടിഫിക്കറ്റ്, ഹോട്ടലിലെ ആദ്യ ദിവസം പിസിആര്‍ പരിശോധന എന്നിവയും വേണം. വാക്സിനെടുക്കാത്തവര്‍ക്ക് ഇന്ത്യയില്‍ നിന്ന് സന്ദര്‍ശക വിസയില്‍ പ്രവേശനമില്ല.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല