സ്വന്തം ലേഖകൻ: ഖത്തർ-സൗദി കര അതിർത്തികളിലൂടെ ഈ ഞായറാഴ്ച മുതൽ വാണിജ്യ ചരക്കുനീക്കങ്ങൾക്ക് തുടക്കമാകും. ട്രക്ക് ഡ്രൈവർമാരും ഇറക്കുമതി വ്യാപാരികളും പാലിക്കേണ്ട എൻട്രി, എക്‌സിറ്റ് ചട്ടങ്ങളും കസ്റ്റംസ് ജനറൽ അതോറിറ്റി പ്രഖ്യാപിച്ചിട്ടുണ്ട്. സൗദിയുടെ സൽവ അതിർത്തിയിൽ നിന്നു ഖത്തറിന്റെ അബു സമ്ര വഴി രാജ്യത്തേക്കുള്ള പ്രവേശന, കൊവിഡ് നയങ്ങൾ പാലിച്ചു കൊണ്ടു വേണം ചരക്കു നീക്കം നടത്താൻ.
മൂന്നര വർഷത്തിന് ശേഷം ഇക്കഴിഞ്ഞ ജനുവരി 9 മുതലാണ് സൗദി അറേബ്യ ഖത്തറിലേക്കുള്ള സൽവ അതിർത്തി തുറന്നത്. ഖത്തർ-സൗദി അതിർത്തികളിലൂടെ ഇരു രാജ്യങ്ങൾക്കിടയിലുമുള്ള റോഡ് ഗതാഗതവും വിമാനസർവീസുകളും സുഗമമാണ്. വാണിജ്യ നീക്കത്തിന് തുടക്കമിടുന്നതോടെ ഇരുരാജ്യങ്ങളിലേയും ആഭ്യന്തര വിപണികളിലേക്ക് കൂടുതൽ വ്യത്യസ്ത ഉൽപന്നങ്ങളെത്തും.
പ്രവാസി വ്യാപാരികൾക്കും പുതിയ നടപടി ഗുണകരമാകും. ഈ വർഷം രണ്ടാം പാദത്തിൽ അബു സമ്ര അതിർത്തിയുടെ നവീകരണ, അറ്റകുറ്റപ്പണി ജോലികൾ തുടങ്ങും. 14 മാസത്തേക്കാണിതെങ്കിലും യാത്രാ, ചരക്കു നീക്കങ്ങൾ തടസ്സമില്ലാതെ തുടരും.
ട്രക്ക് ഡ്രൈവർമാർക്കുള്ള മാർഗനിർദേശങ്ങൾ
സൗദിയിലെ സൽവ അതിർത്തിയിലൂടെ ദോഹയിലേക്ക് എത്തുന്ന ട്രക്ക് ഡ്രൈവർമാർക്ക് സൗദി പൊതുജനാരോഗ്യമന്ത്രാലയത്തിന്റെ അംഗീകാരമുള്ള കൊവിഡ് നെഗറ്റീവ് സർട്ടിഫിക്കറ്റ് കൈവശമുണ്ടായിരിക്കണം. അബു സമ്രയിലേക്ക് എത്തുന്ന തീയതിക്ക് 72 മണിക്കൂർ മുൻപ് വേണം പരിശോധന നടത്താൻ.
സൗദിയിൽ നിന്നു അബു സമ്ര അതിർത്തിയിലേക്ക് ചരക്കുമായെത്തുന്ന ഡ്രൈവർമാർക്കും ട്രക്കുകൾക്കും രാജ്യത്തേക്ക് പ്രവേശനം ഇല്ല. ചരക്ക് ദോഹയിലേക്ക് ഇറക്കുമതി ചെയ്യുന്ന ഉടമ അല്ലെങ്കിൽ അദ്ദേഹത്തിന്റെ പ്രതിനിധിയ്ക്ക് അബു സമ്ര അതിർത്തിയിലെത്തി വേണം പ്രാദേശിക ട്രക്കുകളിലേക്ക് ചരക്കുകൾ മാറ്റാൻ. ചരക്കിറക്കാനായി അതിർത്തിയിലെ ഓഫിസ് അധികൃതരെ നേരത്തെ അറിയിച്ച് വേണ്ട നടപടികൾ സ്വീകരിക്കണം. അബു സമ്ര അതിർത്തിയിൽ ചരക്കിറക്കിയാലുടൻ തന്നെ ട്രക്കും ഡ്രൈവർമാരും സൗദിയിലേക്ക് മടങ്ങിയിരിക്കണം.
സൗദിയിൽ നിന്നെത്തുന്ന ചരക്കുകൾ സ്വീകരിച്ച് ദോഹയിലേക്ക് എത്തിക്കുന്നതിനും മറ്റുമായി എല്ലാ ഇറക്കുമതിക്കാരും ഉചിതമായ ട്രക്ക് സൗകര്യങ്ങളും മറ്റും നേരത്തെ തയാറാക്കിയിരിക്കണം. തീയതിയും എത്ര ട്രക്കുകൾ ഉണ്ടെന്നതും അധികൃതരെ നേരത്തെ അറിയിക്കണം.കസ്റ്റംസ് ചട്ടങ്ങളും നയങ്ങളും അനുസരിച്ച് മാത്രമേ ഇറക്കുമതി പാടുള്ളു. നിയന്ത്രിത ചരക്കുകൾ സംബന്ധിച്ച കസ്റ്റംസ് ഡിക്ലറേഷൻ ഇ-ക്ലിയറൻസ് സംവിധാനം (അൽനദീബ്) മുഖേന അധികൃതർക്ക് നൽകണം.
അബു സമ്ര അതിർത്തിയിലൂടെ സൗദിയിലേക്കുള്ള കയറ്റുമതി, പുനർകയറ്റുമതി നടപടിക്രമങ്ങളിലും ഉൽപന്നങ്ങളുടെ കാര്യത്തിലും സൗദി കസ്റ്റംസിന്റെ ചട്ടങ്ങൾ പാലിക്കണം.
അബു സമ്ര അതിർത്തി വഴി മൃഗങ്ങളെ കൊണ്ടുപോകുന്നതിനും കൊണ്ടുവരുന്നതിനും മുകളിൽ പറഞ്ഞിരിക്കുന്ന നടപടിക്രമങ്ങൾ പാലിക്കണം.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല