തോമസ് കുക്ക് പാപ്പരായപ്പോള്‍ യൂറോപ്പിന്റെ പല ഭാഗങ്ങളിലായി കുടുങ്ങിയത്‌ ആയിരങ്ങള്‍; യാത്രക്കാരെ തിരികെയെത്തിക്കുമെന്ന് ബ്രിട്ടൻ

സ്വന്തം ലേഖകൻ: ലോകത്തിലെ ഏറ്റവും വലുതും പഴക്കമേറിയതുമായ ട്രാവൽ ഏജൻസി തോമസ് കുക്കിനു പൂട്ടുവീണു. 178 വര്‍ഷം പഴക്കമുള്ള സ്ഥാപനം തകർന്നതോടെ ലോകത്തിന്റെ വിവിധ ഭാഗങ്ങളിലുള്ള ഒന്നരലക്ഷത്തോളം വിനോദസഞ്ചാരികള്‍ കുടുങ്ങി. ഇവരെ തിരികെ അതതു സ്ഥലങ്ങളില്‍ എത്തിക്കുമെന്ന് ബ്രിട്ടീഷ് സര്‍ക്കാര്‍ പ്രഖ്യാപിച്ചിട്ടുണ്ട്.

പതിനാറ് രാജ്യങ്ങളിലായി പ്രതിവർഷം 19 ദശലക്ഷം യാത്രക്കാർക്കായി ഹോട്ടലുകൾ, റിസോർട്ടുകൾ, എയർലൈനുകൾ എന്നിവ സ്ഥാപിച്ച കമ്പനി 2018 ൽ 9.6 ബില്യൺ പൗണ്ട് വരുമാനം നേടിയിരുന്നു. നിലവിൽ വിദേശത്ത് 600,000 സഞ്ചാരികളുണ്ട്, ഇതിൽ 1,50,000 ബ്രിട്ടീഷ് പൗരന്മാരുണ്ട്.

കുടുങ്ങിക്കിടക്കുന്ന ബ്രിട്ടീഷ് യാത്രക്കാരെ നാട്ടിലേക്കു കൊണ്ടുപോകുമെന്ന് ബ്രിട്ടീഷ് പ്രധാനമന്ത്രി ബോറിസ് ജോൺസൺ ഉറപ്പുനൽകി. തോമസ് കുക്കിന്റെ 150 മില്യൺ പൗണ്ടിന് (187.1 മില്യൺ ഡോളർ) ജാമ്യം നൽകണമെന്ന ആവശ്യം സർക്കാർ നിരസിച്ചതായും പ്രധാനമന്ത്രി വെളിപ്പെടുത്തി.

“ഇത് വളരെ ബുദ്ധിമുട്ടേറിയ ഒരു സാഹചര്യമാണ്. തോമസ് കുക്കിന്റെ ഉപഭോക്താക്കളെക്കുറിച്ചാണ് ഞങ്ങൾ ചിന്തിക്കുന്നത്. ഞങ്ങൾ അവരെ ബന്ധപ്പെട്ടിരുന്നു. അവധിക്കാലം ചെലവഴിക്കാൻ പോയവർ ഇപ്പോൾ വീട്ടിലെത്താൻ ബുദ്ധിമുട്ടുകൾ നേരിടാനിടയുണ്ട്, അവരെ വീട്ടിലെത്തിക്കാൻ ഞങ്ങൾ പരമാവധി ശ്രമിക്കും,” അദ്ദേഹം മാധ്യമപ്രവർത്തകരോട് പറഞ്ഞു.

തോമസ് കുക്ക് ഉപഭോക്താക്കളെ യുകെയിലേക്കു രണ്ടാഴ്ചയ്ക്കുള്ളിൽ തിരികെ കൊണ്ടുവരാനുള്ള പരിപാടി ആരംഭിക്കാൻ ബ്രിട്ടീഷ് സർക്കാർ യുകെ സിവിൽ ഏവിയേഷൻ അതോറിറ്റിയോട് ആവശ്യപ്പെട്ടു.

പ്രാദേശിക റെയില്‍ ഉല്ലാസയാത്രകള്‍ സംഘടിപ്പിച്ച് 1841 ൽ പ്രവര്‍ത്തനം ആരംഭിച്ച ബ്രിട്ടനിലെ ഏറ്റവും പഴയ ട്രാവൽ കമ്പനികളിലൊന്നാണ് സാമ്പത്തിക പ്രതിസന്ധിയെത്തുടർന്ന് പ്രവർത്തനം അവസാനിപ്പിച്ചത്. പാക്കേജ് അവധിദിനങ്ങള്‍ക്കും മാസ് ടൂറിസത്തിനും തുടക്കമിട്ട തോമസ് കുക്ക് രണ്ട് ലോകമഹായുദ്ധങ്ങളെ അതിജീവിച്ചാണ് മുന്നേറ്റം തുടര്‍ന്നത്. നിലവിൽ കമ്പനിക്ക് 1.7 ബില്യൺ പൗണ്ട് കടമുണ്ട്.

അതേസമയം, തോമസ് കുക്ക് (ഇന്ത്യ) ബ്രിട്ടീഷ് കമ്പനിയുടെ ഭാഗമല്ലെന്നു ചെയര്‍മാനും മാനേജിങ് ഡയറക്ടറുമായ മാധവന്‍ മേനോന്‍ പ്രസ്താവനയില്‍ അറിയിച്ചു. 2012 ഓഗസ്റ്റില്‍ കാനഡ ആസ്ഥാനമായ ഫെയര്‍ഫാക്സ് ഫിനാന്‍ഷ്യല്‍ ഹോള്‍ഡിങ്സ് (ഫെയര്‍ഫാക്സ്) തോമസ് കുക്ക് ഇന്ത്യയെ ഏറ്റെടുത്തിരുന്നു. അന്നു മുതല്‍ ഇന്ത്യന്‍ കമ്പനിയ്ക്കു വ്യത്യസ്തമായ നിലനില്‍പ്പാണുള്ളത്.

തോമസ് കുക്ക് ഇന്ത്യയെ ഫെയര്‍ഫാക്സ് ഏറ്റെടുത്തശേഷം തോമസ് കുക്ക് യുകെ, പ്രൊമോട്ടറല്ലാതായി. ഇതേത്തുടര്‍ന്ന് തോമസ് കുക്ക് ഇന്ത്യയില്‍ ബ്രിട്ടീഷ് കമ്പനിക്ക് ഓഹരിവിഹിതം ഇല്ലാതായെന്നും മാധവന്‍ മേനോന്‍ അറിയിച്ചു.