30നും 40നും ഇടയില്‍ പ്രായമുള്ളവരില്‍ ഗര്‍ഭനിരക്ക് വര്‍ധിക്കുന്നു;കൗമാരക്കാരില്‍ കുറയുന്നു

ലണ്ടന്‍: കൗമാരക്കാലത്ത് ഗര്‍ഭിണികളാവുന്നവരുടെ നിരക്ക് വളരെ കുറയുന്നതായി റിപ്പോര്‍ട്ട്. അതേസമയം 30നും 40നും ഇടയില്‍ പ്രായമുള്ളവരില്‍ ഗര്‍ഭിണികളാവുന്നവരുടെ നിരക്ക് വന്‍തോതില്‍ വര്‍ധിക്കുന്നുമുണ്ട്. കഴിഞ്ഞമുപ്പതുവര്‍ഷത്തിനിടയിലെ ഏറ്റവും കുറഞ്ഞ നിലയിലേക്ക് കൗമാരക്കാരിലെ ഗര്‍ഭനിരക്ക് എത്തിച്ചേര്‍ന്നിട്ടുണ്ട്.

2008നും 2009നും ഇടയില്‍ 18വയസിന് താഴെയുള്ളവരില്‍ ഗര്‍ഭണികളാവുന്നവരുടെ നിരക്ക് 5.9% ആയിരുന്നു. ഇതിപ്പോള്‍ ആയിരത്തിന് 38.3 എന്ന് നിലയില്‍ കുറഞ്ഞാതായാണ് ഓഫീസ് ഫോര്‍ നാഷണല്‍ സ്റ്റാറ്റിറ്റ്ക്‌സില്‍ നിന്നു ലഭിച്ചവിവരം.

2009ല്‍ ഈ പ്രായത്തിനിടയിലുള്ള 38259 ഗര്‍ഭിണികളാണുണ്ടായിരുന്നത്. 2008ല്‍ ഇത് 41,361ആയിരുന്നു. പതിനാറുവയസില്‍ താഴെയുള്ള ഗര്‍ഭിണികള്‍ 2008ല്‍ 7,586 പേരുള്ളത് 2009ല്‍ 7,158 ആയി കുറഞ്ഞു. ഇതില്‍ 60% പേരും അബോര്‍ഷന് വിധേയരായിട്ടുമുണ്ട്.

30-34വയസിനിടയിലുള്ളവരിലാണ് ഗര്‍ഭനിരക്ക് ഏറ്റവും കൂടിയതായി കാണുന്നത്. 1990ല്‍ 30-34 പ്രായമുള്ള 161,400പേരാണ് ഗര്‍ഭിണികളായത്. എന്നാല്‍ 2009ല്‍ ഇത് 213,300ആയി കൂടി. നാല്‍പതിനുമുകളിലുള്ളവരില്‍ ഗര്‍ഭനിരക്ക് 90കളിലേതുമായി താരതമ്യം ചെയ്യുമ്പോള്‍ ഇരട്ടിയായിട്ടുണ്ട്.

ബ്രൂക്ക് സെക്ഷ്വല്‍ ഹെല്‍ത്ത് ചാരിറ്റിയുടെ നാഷണല്‍ ഡയറക്ടര്‍ സൈമണ്‍ ബ്ലക് ഈ വാര്‍ത്തയെ സ്വാഗതം ചെയ്തു. കൗമാരക്കാരുടെ ഗര്‍ഭനിരക്ക് കുറയ്ക്കുന്നതിനുവേണ്ടി പ്രാദേശിക തലത്തിലും ദേശീയ തലത്തിലും സര്‍ക്കാര്‍ നടത്തുന്ന ശ്രമങ്ങളെ പ്രോത്സാഹിപ്പിക്കുമെന്നും അല്ലാത്ത പക്ഷം കൗമാരക്കാലത്ത് ഗര്‍ഭണികളാകുന്നവരുടെ നിരക്ക് വീണ്ടും കൂടാന്‍ ഇടയുണ്ടെന്നും അദ്ദേഹം പറഞ്ഞു.