ദാരിദ്യനിര്‍മാര്‍ജനം: ഇന്ത്യയ്ക്ക് 22,000 കോടിയുടെ ലോകബാങ്ക് വായ്‌പ

ദാരിദ്യനിര്‍മാര്‍ജന പ്രവര്‍ത്തനങ്ങള്‍ക്കായി ഇന്ത്യയ്ക്ക് 430 കോടി ഡോളര്‍ (22,000 കോടി രൂപ) കൂടി വായ്പ നല്‍കാന്‍ ലോകബാങ്ക് തീരുമാനിച്ചു. സാധാരണ വായ്പയായി നല്‍കുന്നതിനു പകരം കടപ്പത്രത്തിന്റെ രൂപത്തിലാവും ഈ ധനസഹായം നല്‍കുക.

ഇന്ത്യയിലെ ജനങ്ങളുടെ മൂന്നിലൊന്നും ദാരിദ്ര്യത്തില്‍ കഴിയുന്ന പശ്ചാത്തലത്തിലാണ് ലോകബാങ്ക് പ്രത്യേകസഹായപദ്ധതി മുന്നോട്ടുവെച്ചത്. ലോകബാങ്ക് ചട്ടമനുസരിച്ച് ഇന്ത്യയ്ക്കു നല്‍കാവുന്ന മൊത്തം വായ്പത്തുക 1750 കോടി ഡോളറാണ്. ഈ പരിധി മറികടക്കുമെന്നതിനാല്‍ ഇന്ത്യയ്ക്ക് ഇനി വന്‍ തുക വായ്പ നല്‍കാനാവില്ല. അതു മറികടക്കാനാണ് പ്രത്യേകം കടപ്പത്രങ്ങളായി ധനസഹായം നല്‍കുന്നത്.

ഇതുവഴി ജനങ്ങളുടെ ജീവിതനിലവാരം ഉയര്‍ത്തുന്നതിനുള്ള വികസനപദ്ധതികള്‍ക്ക് കുറഞ്ഞ നിരക്കിലുള്ള ദീര്‍ഘകാലവായ്പയാണ് ഇന്ത്യയ്ക്ക് ലഭിക്കുക. ഇന്ത്യയുടെ അടിസ്ഥാനവികസന ആവശ്യങ്ങള്‍ക്കാവും ലോകബാങ്ക് പിന്തുണ.